ពោធិ៍សាត់៖ ឯកឧត្តម គន់ គីម ទេសរដ្ឋមន្ត្រីទទួលបន្ទុកកិច្ចការអតីតយុទ្ធជន និងជនពិការ ជាអនុប្រធានទី១ គណៈកម្មាធិការ​ជាតិគ្រប់គ្រងគ្រោះមហន្តរាយ នាថ្ងៃទី២១ ខែមករា ឆ្នាំ២០២១ បានអញ្ជើញជួបសំណេះសំណាល និងចាប់ឆ្នោតប្រគល់ដីសម្បទានសង្គមកិច្ច (ដីលំនៅដ្ឋាន និងដីកសិកម្ម) នៅចំណុចដំណាក់ត្រយឹង ស្ថិតក្នុងភូមិសាយ ឃុំព្រងិល ស្រុកភ្នំវាញ ជូនដល់អតីតកងកម្លាំងប្រដាប់អាវុធ និងគ្រួសារ ក្នុងខេត្តពោធិ៍សាត់ ចំនួន៦២៨គ្រួសារ។

លោកឧត្តមសេនីយ៍ទោ ប៉ែន ណាវណ្ណ បានឱ្យដឹងថា សមាគមអតីតយុទ្ធជនកម្ពុជាខេត្តពោធិ៍សាត់ មិនទុកចោលអតីត​យុទ្ធជន​នោះទេ និង បានឱ្យមន្ទីរសុរិយោដីខេត្ត យកដីដែលបម្រុងទុករបស់ខេត្ត ត្រង់ចំណុចដំណាក់ត្រយឹង ស្ថិតក្នុង​ភូមិសាយ ស្រុកភ្នំក្រវាញ ខេត្តពោធិ៍សាត់ ធ្វើការឈូសឆាយដែលមានផ្ទៃដីសរុប៧៩៥ហិកតា សម្រាប់ចែកជូនអតីត​យុទ្ធជនក្រីក្រ ចំនួន៦២៨គ្រួសារ ដោយក្នុង១គ្រួសារ ទទួលបានដីទំហំ៧០×១៥០ម៉ែត្រ សរុបអស់ផ្ទៃដីចំនួន​៦៥៩,៤​ហិកតា ចំពោះដីដែលនៅសល់ ខេត្តទុកសម្រាប់កសាងហេដ្ឋា រចនាសម្ព័ន្ធផ្សេងៗបន្តទៅទៀត។

ឯកឧត្តម ម៉ៅ ធនិន អភិបាលខេត្ត បានថ្លែងអំណរគុណចំពោះ គុណបំណាច់ដ៏ធំធេង ដែលអតីតយុទ្ធជនបានលៈបង់នោះ គឺនិងធ្វើការចងចាំទុក ជាប្រវត្តិសាស្រ្ត ទៅលើគុណបំណាច់ទាំងអស់នេះ ហើយនឹងរៀនសូត្រតាម នូវគំរូវីរៈភាពដ៏ក្លាហាន​នេះបន្ថែមទៀត។

ទេសរដ្ឋមន្ដ្រី គន់ គីម ក៏បានផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ជូនដល់អតីតយុទ្ធជន ដែលរស់នៅទីនេះទាំងអស់គ្នា និងផ្តាំផ្ញើដល់បងប្អូន ត្រូវចេះប្រុងប្រយត្ន័ការពារខ្លួនពីជំងឺកូវីដ១៩ និងខិតខំប្រឹងប្រែង បំពេញការងារ​ដែលមានស្រាប់ ដើម្បីជួយជីវភាពគ្រួសារ និងត្រូវចេះសាមគ្គី ជួយគ្នាពេលមានធុរៈ ដោយមិនប្រកាន់ ពណ៌សម្បុរ ជាតិសាសន៍ ឬនិន្នាការនយោបាយ។

ឯកឧត្តមទេសរដ្ឋមន្ត្រី បាននាំយកអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនដល់បងប្អូនអតីតយុទ្ធជន ទាំង៦២៨គ្រួសារ ដោយក្នុងមួយគ្រួសារៗ ទទួលបានអង្ករ២៥គីឡូក្រាម, ភួយ១, មុង១, កន្ទេល១ និងឃីត១កញ្ចប់។

ឯកឧត្ត បានចុះពិនិត្យមើលការស្តារឡើងវិញ នូវដំណាំស្រូវរបស់ប្រជាពលរដ្ឋ ក្នុងឃុំអូរតាប៉ោង ស្រុកបាកាន ព្រមទាំងបានសង្កេតឃើញថាដំណាំស្រូវលូតលាស់ល្អ និងសង្ឃឹមថាឆ្នាំនេះ ស្រូវទទួលបានទិន្នផលខ្ពស់៕