បើតំណាងរាស្ត្រធ្វើដំណើរទៅកាន់តំបន់បិទខ្ទប់ តំបន់ក្រហម មិនមែនជាការទៅជួយរាស្ត្រទេតែជាការនាំហានិភ័យ និងបំពានច្បាប់
ភ្នំពេញៈកាលពីព្រឹកថ្ងៃទី៣ខែឧសភាជាមួយនឹងរូបថតជាច្រើនសន្លឹកនៅលើបណ្តាញសង្គមគេឃើញសកម្មភាពលោកជំទាវ គឹម សុវណ្ណា តំណាងរាស្ត្រមណ្ឌលរាជធានីភ្នំពេញ ធ្វើដំណើរ តាមរថយន្តចែកបន្លែស្រស់ៗជូនដល់បងប្អូន ប្រជាពលរដ្ឋតាម បណ្តោយផ្លូវ៣៧៦ សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ។
លោកជំទាវ គឹម សុវណ្ណា តំណាងរាស្ត្រមណ្ឌលរាជធានីភ្នំពេញ ចែកបន្លែស្រស់ៗជូនដល់បងប្អូននៅខណ្ឌបឹងកេងកង
ចំណែកកាលពីព្រឹកថ្ងៃទី២ ខែឧសភាម្សិលមិញលោកជំទាវ ម៉ាណ ណាវី តំណាងរាស្ត្រមណ្ឌលរាជធានីភ្នំពេញ បាននាំយកអំណោយដ៏ថ្លៃថ្លារបស់ឯកឧត្តម ហ៊ុន ម៉ានី ប្រធានគណៈកម្មការ អប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា តាមរយៈឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានសហភាពសហព័ន្ធយុវជនកម្ពុជារាជធានីភ្នំពេញចែកជូនប្រជាពលរដ្ឋ ខ្វះខាតចំនួន២២៦គ្រួសារ ស្ថិតក្នុងភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ និងចែកជូនប្រជាពលរដ្ឋខ្វះខាតចំនួន៧៤គ្រួសារទៀត នៅក្នុងភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល។
លោកជំទាវ ម៉ាណ ណាវី តំណាងរាស្ត្រមណ្ឌលរាជធានីភ្នំពេញ នាំយកអំណោយចែកជូនប្រជាពលរដ្ឋ នៅខណ្ឌច្បារអំពៅ
ក៏នៅមានសកម្មភាពរបស់តំណាងរាស្ត្រ និងសមាជិកព្រឹទ្ធសភាប្រចាំភូមិភាគជាច្រើនរូបទៀតបានធ្វើជាបន្តបន្ទាប់ ក្នុងអំឡុងពេលដែលប្រជាពលរដ្ឋកំពុងជួបការលំបាកនៅតាមទីកន្លែងមិនមែនជាតំបន់មានហានិភ័យខ្ពស់ដោយជំងឺកូវីដ និងទទួលបាននូវការអនុញ្ញាត។ ចំពោះតំបន់ក្រហម តំបន់បិទខ្ទប់ គឺមិនអាចធ្វើសកម្មភាពដូចនេះបានទេ។ ប៉ុន្តែសកម្មភាពទាំងឡាយនោះ ហាក់ត្រូវបានធ្វើជាមិនឃើញដោយក្រុមជន និងក្រុមសង្គមស៊ីវិលដែលមានគំនិតទុច្ចរិតធ្វើអាជីវកម្មនយោបាយលើទុក្ខលំបាករបស់ប្រជាជន និងនិយាយមួលបង្កាច់ការពិតទៅវិញ។
នៅថ្ងៃទី៣ខែឧសភានេះ ឯកឧត្តម ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានសរសេរនៅលើទំព័រហ្វេសប៊ុករបស់លោកថា”ប៉ុន្មានថ្ងៃនេះឃើញគេបង្ហោះសារជាមួយរូបថតទាមទារឱ្យតំណាងរាស្ត្រមណ្ឌលភ្នំពេញ ចុះជួបសួរសុខទុក្ខ និងជួយពលរដ្ឋក្នុងតំបន់ក្រហម “។ ឯកឧត្តមបន្តថា ចេះតែនឹកឆ្ងល់ចំនួន៣ចំណុច៖
១.តើអ្នកបង្ហោះសារទាមទារនោះសុទ្ធតែបានបោះឆ្នោតឱ្យអ្នកតំណាងរាស្ត្រទាំងនោះដែរឬទេឬមួយគ្រាន់តែ ចង់បន្តុះបង្អាប់? មិនប្រាកដទេ តែទោះជាយ៉ាងណាតំណាងរាស្ត្រជាប់ឆ្នោតគឺតំណាងឱ្យរាស្ត្រទូទាំងប្រទេសដោយ មិនត្រូវប្រកាន់និន្នាការនយោបាយអ្វីនោះឡើយ។
២.នៅក្នុងតំបន់ក្រហម វិធានរឹតត្បិតតឹងរ៉ឹង រាល់ការធ្វើដំណើរនិងសកម្មភាពនានាត្រូវបានហាមឃាត់រួមទាំង តំណាងរាស្ត្រផងដែរ ដើម្បីទប់ស្កាត់ការឆ្លងរាលដាលកូវីដ-១៩។ ដូច្នេះ រាល់ជំនួយរបស់តំណាងរាស្ត្រ អាចផ្តល់ឱ្យបានតាមរយៈ និងដោយសហការជាមួយអាជ្ញាធរមានសមត្ថកិច្ចអនុវត្តវិធានការបិទខ្ទប់ដែលមានសិទ្ធិចេញចូលឆ្លងកាត់តំបន់ក្រហមនោះបាន។
៣.កន្លងមកមានអង្គការសង្គមស៊ីវីលមួយចំនួនទាមទារចុះចែកអំណោយក្នុងតំបន់ក្រហមដោយខ្លួនឯងតាមបែបអនាធិបតេយ្យតែមិនត្រូវបានអនុញ្ញាតនោះទេ ព្រោះបំពានវិធានការបិទខ្ទប់។ អង្គការសង្គមស៊ីវីលទាំងនោះមិនព្រមស្តាប់ តាមការណែនាំ និងសហការជាមួយសមត្ថកិច្ចនោះទេ តែបែជាធ្វើការរិះគន់ និងចោទប្រកាន់សមត្ថកិច្ចទៅវិញ។ អត់យល់!។
ឯកឧត្តម ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភាបានមានប្រសាសន៍ប្រាប់ AMSនៅរសៀលថ្ងៃទី៣ខែឧសភានេះថា ការទាមទាររបស់អង្គការសង្គមស៊ីវិលមួយចំនួនតូចឱ្យតំណាងរាស្ត្រក្នុងមណ្ឌលភ្នំពេញចុះសួរសុខទុក្ខ និងពិនិត្យមើលលើបញ្ហាប្រឈមរបស់ប្រជាពលរដ្ឋនៅក្នុងតំបន់បិទខ្ទប់ក្នុងភូមិសាស្ត្ររាជធានីភ្នំពេញ គឺជាការមិនត្រឹមត្រូវ។តំណាងរាស្ត្របានចូលរួមជាថវិកាក្នុងការចាក់វ៉ាក់សាំងក្នុងការទប់ស្កាត់ការរីករាលដាលជំងឺកូវីដ១៩ ជាមួយរាជរដ្ឋាភិបាលរួចហើយ ហើយរាជរដ្ឋាភិបាលធ្វើនេះ គឺត្រឹមត្រូវអស់ហើយ។ ជាស្មារតីនៃច្បាប់ ក៏ដូចជាស្មារតីវិធានការរបស់រដ្ឋាភិបាល គឺទប់ស្កាត់កុំឲ្យរីករាលដាលជំងឺកូវីដ១៩ និងទប់ស្កាត់ដោយវិធានការ ផ្សេងៗ រួមទាំងការបិទខ្ទប់តំបន់មួយចំនួន និងចាត់ជាតំបន់ក្រហកម លឿងទុំ និងពណ៌លឿង សមស្របតាមច្បាប់ដែលបានអនុញ្ញាតហើយ។
អ្នកនាំពាក្យរដ្ឋសភាបានបន្តថា ជាស្មារតីជៀសវាងការឆ្លងរីករាលដាលជំងឺកូវីដ១៩ ដូចសម្តេចនាយករដ្ឋមន្ត្រី ហ៊ុន សែន មានប្រសាសន៍ថា អ្នកណានៅផ្ទះណានៅផ្ទះនឹង នៅភូមិណានៅភូមិនឹងហើយសំខាន់ដើម្បីរាំងខ្ទប់ ការរីករាលដាលកូវីដ១៩ គឺល្អបំផុតតំបន់ដែលមានហានិភ័យខ្ពស់ ប្រជាពលរដ្ឋគឺត្រូវតែនៅផ្ទះ។ ចំពោះតំណាងរាស្ត្រចុះទៅគឺខុសពីស្មារតីនៃច្បាប់ហើយបើតំណាងរាស្ត្រចុះទៅជួបប្រជាពលរដ្ឋនៅក្នុងអំឡុងពេលបិទខ្ទប់នេះ គឺមិនមែនជាការជួយទេ តែទៅបន្ថែមហានិភ័យ។
ម្យ៉ាងទៀតរាជរដ្ឋាភិបាលបានចាត់ចែងជួយផ្គត់ផ្គង់ជួយដល់ជីវភាពប្រជាពលរដ្ឋមិនឲ្យអ្នកណាស្លាប់ដោយអត់បាននៅពេលនេះទេ។ គឺមានសេវាលក់ដូរទាំងខាងរដ្ឋាភិបាល និងឯកជន និងចែកអង្ករនិងគ្រឿងឧបភោគបរិភោគទៅ ដល់ប្រជាពលរដ្ឋ ហើយយើងមិនគួរទៅប្រមូលផ្តុំចែកអំណោយដោយឲ្យមានហានិភ័យបន្ថែមទៀតទេ គឺខុសពីស្មារតីច្បាប់។ ហេតុនេះហើយបានជាតំណាងរាស្ត្ររង់ចាំពេលវេលាសមស្របចុះទៅជួយប្រជាពលរដ្ឋ ហើយមិនបោះបង់ប្រជាពលរដ្ឋចោលទេ។ នៅពេលនេះតំណាងរាស្ត្រគិតថា វិធានការរបស់រដ្ឋាភិបាលត្រឹមត្រូវ និងគ្រប់ជ្រុងជ្រោយ ហេតុនេះតំណាងរាស្ត្របានត្រៀមខ្លួនចុះទៅជួបប្រជាពលរដ្ឋនៅពេលសមស្រប។
រីឯលោកជំទាវ ឡោក ខេង តំណាងរាស្ត្រមណ្ឌលភ្នំពេញបានបញ្ជាក់ថា តំណាងរាស្ត្រមានអភ័យឯកសិទ្ធិ ប៉ុន្តែមិនអាចយកអភ័យឯកសិទ្ធិនេះទៅរំលោភលើវិធានសុខាភិបាលវិធានរដ្ឋបាលឬវិធាននានា ដែលធ្វើឱ្យប៉ះពាល់ដល់សណ្តាប់ធ្នាប់សាធារណៈ និងដល់សន្តិសុខជាតិឡើយ។ គឺមាត្រា៥ នៃច្បាប់ស្តីពីលក្ខន្តិកៈតំណាងរាស្ត្រ។ ប៉ុន្តែតំណាងរាស្ត្រមានសិទ្ធិតាមដានការអនុវត្តរបស់រាជរដ្ឋាភិបាល៕
ដោយៈពលជ័យ
