រាជរដ្ឋាភិបាល៖មានកត្តាហានិភ័យធំៗ៣ក្នុងពេលអនុវត្តផែនការយុទ្ធសាស្ត្រយុទ្ធនាការជាតិចាក់វ៉ាក់សាំង
ភ្នំពេញៈរាជរដ្ឋាភិបាលកម្ពុជាបានដាក់ចេញ«ផែនការយុទ្ធសាស្ត្រយុទ្ធនាការជាតិចាក់វ៉ាក់សាំងបង្ការជំងឺកូរឹង-១៩ សំដៅបង្កើតឲ្យបាននូវភាពស៊ាំសង្គម-សេដ្ឋកិច្ចនៅកម្ពុជាក្នុងឆ្នាំ២០២១» ដែលរៀបចំឡើងដោយឧត្តមក្រុមប្រឹក្សាសេដ្ឋកិច្ចជាតិនៅក្នុងខែឧសភា២០២១។ ជាមួយផែនការនេះ រាជរដ្ឋាភិបាលក៏បានព្យាករណ៍ផងដែរនូវកត្តាហានិភ័យធំៗចំនួន៣សម្រាប់ការអនុវត្តផែនការយុទ្ធសាស្ត្រយុទ្ធនាការជាតិចាក់វ៉ាក់សាំងនេះ។
ការចាក់វ៉ាក់សាំងបង្ការជំងឺកូវី-១៩ សំដៅបង្កើតឲ្យបាននូវភាពស៊ាំសហគមន៍នៅក្នុងទូទាំងព្រះរាជាណាចក្រកម្ពុជា គឺជាវិធានការយុទ្ធសាស្ត្រគន្លឹះដ៏មានប្រសិទ្ធភាពមួយដែលត្រូវអនុវត្តគួបផ្សំជាមួយ នឹងវិធានការចាំបាច់ផ្សេងទៀតជាពិសេសវិធានការ៣-កុំ និង៣-ការពារ ដើម្បីធានាឲ្យកម្ពុជាអាចបន្តដំណើរអភិវឌ្ឍទៅមុខលើគន្លងនៃ “ប្រក្រតីភាពថ្មី»។
ទាក់ទងនឹងផែនការនេះ រាជរដ្ឋាភិបាលក៏បានប្រមើមើលដែរថា រាល់ការឈានទៅសម្រេចបានជោគជ័យវាក៏មានកត្តាហានិភ័យដែលអាចបង្កឲ្យមានភាពបរាជ័យក្នុងការអនុវត្តផែនការយុទ្ធសាស្ត្រនេះផងដែរ។ ភាពមិនប្រាកដប្រជា និងការវិវត្តលឿននៃជំងឺកូវីដ-១៩ រួមជាមួយនឹងភាពមានកម្រិត និងភាពស្មុគស្មាញនៃការផ្គត់ផ្គង់វ៉ាក់សាំងអាចបង្កជាហានិភ័យដែលបណ្តាលឲ្យប៉ះពាល់ដោយផ្ទាល់ ឬដោយប្រយោលដល់ការអនុវត្តផែនការយុទ្ធសាស្ត្រយុទ្ធនាការជាតិចាក់វ៉ាក់សាំង។ ការណ៍នេះទាមទារឲ្យរាជរដ្ឋាភិបាលកម្ពុជាមានភាពបុរេសកម្មដោយត្រូវកំណត់ និងគ្រប់គ្រងហានិភ័យធំៗ ដែលអាចបង្កឲ្យមានភាពបរាជ័យក្នុងការអនុវត្តផែនការយុទ្ធសាស្ត្រនេះ។ ជារួមកត្តាហានិភ័យធំៗចំនួន៣ សម្រាប់ការអនុវត្តផែនការយុទ្ធសាស្ត្រយុទ្ធនាការជាតិចាក់វ៉ាក់សាំងនេះត្រូវបានកំណត់ដូចខាងក្រោម៖
១).ការទទួលបានវ៉ាក់សាំងមិនគ្រប់តាមតម្រូវការ ភាពមានកម្រិតនៃការផ្គត់ផ្គង់វ៉ាក់សាំង និងតម្រូវការខ្ពស់ពីបណ្តាប្រទេសនានានៅទូទាំងពិភពលោកអាចបង្កឲ្យមានហានិភ័យ ក្នុងការទទួលបានវ៉ាក់សាំងដើម្បីបំពេញតម្រូវការជាក់ស្តែងរបស់កម្ពុជា។ បន្ថែមលើនេះភាពស្មុគស្មាញនៃបញ្ហាបច្ចេកទេសក្នុងការគ្រប់គ្រង និងផ្គត់ផ្គង់វ៉ាក់សាំងក៏អាចបង្កឲ្យមានភាពយឺតយ៉ាវក្នុងការអនុវត្តផែនការយុទ្ធសាស្ត្រនេះឲ្យសម្រេចបាននៅក្នុងឆ្នាំ២០២១ យ៉ាងឆាប់តាមតែអាចធ្វើបានផងដែរ។ ការណ៍នេះទាមទារឲ្យរាជរដ្ឋាភិបាលខិតខំធានារកប្រភពសម្រាប់ទិញ និងផ្គត់ផ្គង់វ៉ាក់សាំងឲ្យបានគ្រប់គ្រាន់តាមតម្រូវការ និងតាមកាលកំណត់ព្រមទាំងខិតខំកសាងសមត្ថភាពសម្រាប់ត្រៀមដោះស្រាយបញ្ហាបច្ចេកទេសនានាពាក់ព័ន្ធនឹងការគ្រប់គ្រង,ការបែងចែក,ការដឹកជញ្ជូន និងការថែរក្សាវាក់សាំងជាដើមដែលអាចកើតមានឡើងជាយថាហេតុ។ យ៉ាងណាមិញ,ការសម្រេចចិត្តដ៏ត្រឹមត្រូវរបស់រាជរដ្ឋាភិបាលក្នុងការចាប់យកដៃគូយុទ្ធសាស្ត្រជាមួយមិត្តចិនធ្វើជាស្នូលសម្រាប់ការស្វះស្វែងរកទិញវាក់សាំង និងទទួលបានជំនួយវ៉ាក់សាំងបានក្លាយជាកត្តាគន្លឹះមួយដ៏សំខាន់ផងដែរ ដែលអាចជួយដោះស្រាយហានិភ័យនៃការខ្វះវ៉ាក់សាំង និងការផ្គត់ផ្គង់វ៉ាក់សាំងឲ្យបានគ្រប់គ្រាន់ និងទាន់ពេល។
២).សមត្ថភាពក្នុងការអនុវត្តផែនការចាក់វ៉ាក់សាំង៖ចំនួនដ៏ច្រើននៃប្រជាពលរដ្ឋដែលត្រូវទទួលបានការចាក់វ៉ាក់សាំង និងរយៈពេលខ្លីនៃយុទ្ធនាការជាតិចាក់វ៉ាក់សាំងអាចបង្កឲ្យមានបញ្ហាប្រឈមនិងភាពខ្វះខាតនូវសមត្ថភាព ស្ថាប័ន និងធនធានមនុស្សដែលមានសមត្ថភាពគ្រប់គ្រាន់ ដើម្បីចូលរួមក្នុងយុទ្ធនាការជាតិចាក់វ៉ាក់សាំងប្រកប ដោយប្រសិទ្ធភាព និងទាន់ពេល ។ ការណ៍នេះទាមទារនូវការត្រៀមរៀបចំឲ្យបានល្អនូវផែនការលម្អិតសម្រាប់អនុវត្តក្នុងគ្រប់ទិដ្ឋភាព និងការកៀរគរក៏ដូចជាការប្រើប្រាស់កម្លាំងសរុប និងមធ្យោបាយ សរុបរបស់ជាតិដើម្បីចូលរួមអនុវត្តយុទ្ធនាការជាតិចាក់វ៉ាក់សាំងនេះឲ្យបានប្រកបដោយប្រសិទ្ធភាពខ្ពស់បំផុត។
៣).ការកើតឡើង ឬការឆ្លងចូលមកកម្ពុជានូវសកូវីដ-១៩បំប្លែងថ្មី៖ ប្រភេទវីរុសបំប្លែងថ្មីគឺជាក្តីបារម្ភមួយដែលអាចធ្វើឲ្យវ៉ាក់សាំងដែលមានស្រាប់បច្ចុប្បន្ននេះ បាត់បង់ ឬក៏លែង មានប្រសិទ្ធភាព។ ការណ៍នេះទាមទារឲ្យរាជរដ្ឋាភិបាលបង្កើនការយកចិត្តទុកដាក់ខ្ពស់ដល់ការតាមដាននូវស្ថានការណ៍វិវឌ្ឍនៅតាមបណ្តាប្រទេស ដែលបាននិងកំពុងទទួលរងឥទ្ធិពលខ្លាំងនៃការឆ្លងរាលដាលជំងឺកូវី៨-១៩ និងរឹតបន្តឹងវិធានការសុខាភិបាលក៏ដូចជាវិធានការពាក់ព័ន្ធផ្សេងទៀតពិសេស ការគ្រប់គ្រងឲ្យបានម៉ត់ចត់លើការចេញ-ចូល របស់មនុស្ស និងទំនិញដែលអាចមានហានិភ័យនៃការចម្លងជំងឺកូវី៨-១៩ នៅតាមច្រកទ្វារព្រំដែនអន្តរជាតិ និងការអនុវត្តដោយម៉ឺងម៉ាត់នូវវិធានចត្តាឡីស័កជាដើមដើម្បីបញ្ចៀសឱ្យបាននូវការនាំចូលជំងឺកូវី៦-១៩ ប្រភេទថ្មីណាមួយដែលអាចចម្លងបន្តទៅដល់សហគមន៍កម្ពុជា។
គិតមកត្រឹមថ្ងៃទី៧ខែឧសភាឆ្នាំ ២០២១ ប្រជាជនកម្ពុជាចំនួន១៨.១៧៩ នាក់បានឆ្លងជំងឺកូវីដ១៩,អ្នកជំងឺចំនួន៦.៨៨៤ នាក់ បានជាសះស្បើយ និងចំនួន១១៤ នាក់ បានបាត់បង់ជីវិត៕
ដោយៈជម្ពូនុទ
