អតីតអនុប្រធាននៃអតីតគណបក្សសង្គ្រោះជាតិ និងមេធាវីលោក កឹម សុខា ស្នើសុំសិទ្ធិធ្វើនយោបាយឡើងវិញ
ភ្នំពេញៈ អតីតអនុប្រធាននៃអតីតគណបក្សសង្គ្រោះជាតិ លោក ប៉ុល ហំម រួមទាំងលោក ផាន់ ច័ន្ទស័ក្តិ មេធាវីការពារ លោកកឹម សុខា បានដាក់ពាក្យស្នើសុំសិទ្ធិធ្វើនយោបាយឡើងវិញទៅក្រសួងមហាផ្ទៃនៅថ្ងៃទី១៧ ខែឧសភា ឆ្នាំ២០២១ នេះ។
មន្ត្រីជាន់ខ្ពស់ក្រសួងមហាផ្ទៃបានប្រាប់ AMS នៅព្រឹកថ្ងៃទី១៧ ខែឧសភានេះថា លោក ប៉ុល ហំម លោក ផាន់ ច័ន្ទស័ក្តិ បានដាក់ពាក្យមកក្រសួងមហាផ្ទៃស្នើសុំសិទ្ធិធ្វើនយោបាយឡើងវិញ ប៉ុន្តែដោយសារខុសបច្ចេកទេស និងមិនទាន់មានឯកសារគ្រប់គ្រាន់ ហើយខាងក្រសួងបានឱ្យគាត់យកពាក្យស្នើសុំទៅបំពេញឡើងវិញ និងភ្ជាប់ជាមួយឯកសារមួយចំនួន។
ចំណែកលោក ប៉ុល ហំម អតីតអនុប្រធាន នៃអតីតគណបក្សសង្គ្រោះជាតិសុំមិនធ្វើអត្ថាធិប្បាយទេចំពោះការស្នើសុំសិទ្ធិធ្វើនយោបាយឡើងវិញនេះ។ រីឯលោក ផាន់ ច័ន្ទស័ក្តិ មេធាវីការពារលោកកឹម សុខាមិនអាចសុំការអត្ថាធិប្បាយបានទេ។
គួរបញ្ជាក់ថា រហូតមកដល់ពេលនេះ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ចំនួន២១រូប ដែលត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់ផ្តល់នីតិសម្បទាឡើងវិញដែលត្រូវបានហាមឃាត់មិនឲ្យធ្វើសកម្មភាពនយោបាយសម្រាប់រយៈពេល៥ឆ្នាំ តាមអំណាចសាលដីកាចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល៕
ដោយៈ ពលជ័យ
