សហរដ្ឋអាមេរិកនឹងចាត់វិធានការដំបូងក្នុងពេលឆាប់ៗ ក្រោយពីបាតុកម្មនៅគុយបា
ហួន ឌីណា
វ៉ាស៊ីនតោន៖ មន្រ្តីក្រសួងការបរទេសបាននិយាយកាលពីថ្ងៃចន្ទ ទី ១៩ កក្កដា ថា សហរដ្ឋអាមេរិកត្រូវបានគេរំពឹងថា នឹងប្រកាសជំហានដំបូងដែលជាផ្នែកមួយនៃការពិនិត្យឡើងវិញរបស់រដ្ឋបាលលោកបៃដិន អំពីគោលនយោបាយរបស់ប្រទេសគុយបា និងឆ្លើយតបទៅនឹងការបង្ក្រាបហ្វូងបាតុករទ្រង់ទ្រាយធំប្រចាំទសវត្សរ៍ក្នុងក្រុងឡាហាវ៉ាន។
យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ក្រុមមន្រ្តីដែលសុំថ្លែងជាអនាមិក បាននិយាយថា រដ្ឋបាលលោក បៃដិន នៅតែស្វែងរកមធ្យោបាយដើម្បីបន្ធូរបន្ថយស្ថានភាពទុក្ខលំបាករបស់ប្រជាជនគុយបា ខណៈពេលដែលរក្សាការដាក់សម្ពាធលើរដ្ឋាភិបាលកុម្មុយនីស្តរបស់លោកប្រធានាធិបតី Miguel Díaz-Canel។
កាលពីសប្តាហ៍មុន លោកប្រធានាធិបតីលោក ចូ បៃដិន បាននិយាយថា លោកមិនបានត្រៀមខ្លួនក្នុងការបន្ធូរបន្ថយការរឹតត្បិតសម្រាប់ការផ្ទេរប្រាក់ ឬការបង់ប្រាក់ ដែលជនជាតិអាមេរិកផ្ញើរទៅឱ្យក្រុមគ្រួសាររបស់ខ្លួននៅលើកោះនោះទេដោយសារតែមានការព្រួយបារម្ភថារដ្ឋាភិបាលគុយបា នឹងរឹបអូសយកថវិកាមួយចំនួនធំ។
ប្រជាជនគុយបារាប់ពាន់នាក់ បានលើកគ្នាធ្វើបាតុកម្មប្រឆាំងរដ្ឋាភិបាលដោយស្ម័គ្រចិត្តកាលពីមួយសប្តាហ៍មុន ជុំវិញបញ្ហាវិបត្តិសេដ្ឋកិច្ចដែលបង្កជាកង្វះខាតទំនិញទូទៅ រួមទាំងការដាច់ចរន្តអគ្គិសនីប្រើប្រាស់។ ក្រុមបាតុករ ក៏តវ៉ាប្រឆាំងនឹងវិធានការគ្រប់គ្រងរបស់រដ្ឋាភិបាលលើការឆ្លងនៃជំងឺរាតត្បាតកូវីដ-១៩ និងការទប់ស្កាត់លើសេរីភាពសង្គមស៊ីវិល។ មកទល់ពេលនេះ សកម្មជនជាច្រើនត្រូវបានចាប់ឃុំខ្លួន។
យ៉ាងណាមិញ រដ្ឋាភិបាលគុយបាបានស្តីបន្ទោសការតវ៉ានេះ ដោយហៅថាជាការប្រឆាំងបដិវត្តក្រោមហិរញ្ញប្បទានរបស់អាមេរិកដើម្បីទាញយកផលចំណេញពីសេដ្ឋកិច្ចត្រដខ្យល់ដែលបណ្តាលមកពីទណ្ឌកម្មរបស់ក្រុងវ៉ាស៊ីនតោន។
ប្រភព៖
1 EXCLUSIVE U.S. expected to take initial steps soon in aftermath of Cuba protests https://www.reuters.com/world/americas/exclusive-us-expected-take-initial-steps-soon-aftermath-cuba-protests-officials-2021-07-19/
