(ហ្វីលីពីន)៖ កីឡាការិនី Hindilyn Diaz បានក្លាយជាអ្នកយកមេដាយមាស ជូនប្រទេសហ្វីលីពីន ជាលើកដំបូង ក្នុងប្រវត្តិសាស្ត្រ បន្ទាប់ពីឈ្នះលើវិញ្ញាសារ លើកទម្ងន់ចំនួន ៥៥គីឡូក្រាម ផ្នែកស្ត្រី។ នេះបើតាមការចេញផ្សាយ ដោយគេហទំព័រ Olympics នៅយប់ថ្ងៃទី២៦ ខែកក្កដា ឆ្នាំ២០២១។

សេចក្តីរាយការណ៍បន្តថា កីឡាការិនីចិន Liao Qiuyun បានឈ្នះមេដាយប្រាក់ ខណៈឯកីឡា​ការិនី​កា​សាក់​ស្ថាន Zulfiya Chinshanlo ឈ្នះមេដាយសំរឹទ្ធ។

កីឡាការិនីហ្វីលីពីន ឈ្នះមេដាយមាស ដោយសារតែ អាចលើកទម្ងន់ ២២៤គីឡូក្រាម លើសកីឡា​ការិនី​ចិន ចំនួន ១លើក។ ប៉ុន្តែ គួរកត់សម្គាល់ថា កីឡាការិនីចិន Liao Qiuyun នៅតែខ្លាំងដដែល គឺ​ធ្លាប់​បំបែកកំណត់ត្រាពិភពលោក ដែលអាចលើកទម្ងន់បាន ២២៧គីឡូក្រាម ដែលមិនទាន់​មាន​កីឡា​ការិនី​ណា ធ្វើបានដូចគាត់ឡើយ៕