នៅថ្ងៃទី០៩ ខែកញ្ញា ឆ្នាំ២០២១ ឯកឧត្តម ជា សុមេធី អភិបាលខេត្តព្រៃវែង បានអញ្ជេីញចុះពិនិត្យស្ថានភាពជាក់ស្តែង និងមើលលើការរៀបចំវិទ្យាល័យព្រះអង្គឌួង ក្រុងព្រៃវែង និងវិទ្យាល័យសម្តេចតេជោ ហ៊ុន សែន ស្រុកពារាំង ដើម្បីត្រៀមក្នុងការបើកអោយដំណើរការចូលរៀនឡើងវិញ នាពេលខាងមុខនេះ។

សូមបញ្ជាក់ថា យោងតាមអនុសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អោយឯកឧត្តម លោកជំទាវ អភិបាលរាជធានី-ខេត្ត ត្រូវត្រៀមរៀបចំបើកសាលារៀនឡើងវិញនៅតំបន់ដែលគ្មានការឆ្លង និងមានការឆ្លងចំនួន តិចនៃជំងឺកូវីដ-១៩ ដែលត្រូវរៀបចំឡើងវិញនូវហេដ្ឋារចនាសម្ព័ន្ធ នៅក្នុងសាលារៀនទាំងអស់ក្នុងភូមិសាស្ត្រ ក្រុង-ស្រុក នីមួយៗ ជាពិសេស កាលពីកន្លងមក សាលារៀនមួយចំនួន ត្រូវបានយកធ្វើជាកន្លែងសម្រាប់ចត្តាឡីស័ក និងជាកន្លែងសម្រាប់ព្យាបាលអ្នកជំងឺកូវីដ-១៩ ត្រូវរៀបចំអោយបានស្អាតឡើងវិញ។

ឯកឧត្តម អភិបាល ខេត្ត ស្នេីអោយលោក ប្រធានមន្ទីរអប់រំ យុវជន និងកីឡាខេត្ត ពិនិត្យ និងណែនាំតាមសាលានីមួយៗ ជាពិសេស នាយកសាលានីមួយៗ ត្រូវសហការជាមួយនឹងមន្ទីរពេទ្យបង្អែក ការិយាល័យអប់រំស្រុក និងអភិបាលស្រុកនិមួយៗ ដើម្បីពិនិត្យ និងវាយតម្លៃមើលលទ្ធភាពទីតាំងដែលមានហានិភ័យទាប ហានិភ័យមធ្យម និងហានិភ័យខ្ពស់មុននឹងស្នើសុំបើកសាលាឡើងវិញ។

សារជាថ្មីម្តងទៀត ឯកឧត្តម អភិបាល ខេត្ត បានជំរុញដល់លោក លោកស្រី អភិបាលក្រុង/ស្រុក និងមន្ទីរពាក់ព័ន្ធត្រូវបន្តអប់រំ និងផ្សព្វផ្សាយជូនប្រជាពលរដ្ឋត្រូវរៀនរស់នៅតាមបែបគន្លងថ្មី ដោយអនុវត្តតាម វិធានការរបស់ក្រសួងសុខាភិបាល ជាពិសេសប្រសាសន៍ដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៣ការពារ ៣កុំ អោយបានគ្រប់ៗគ្នា ដើម្បីរួមគ្នា បង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ ជាពិសេសមេរោគបំប្លែងថ្មី ឌែលតា (Delta) អោយមានប្រសិទ្ធភាពខ្ពស់ ក្នុងខណៈដែលអាជ្ញាធរគ្រប់លំដាប់ថ្នាក់ ក៏ត្រូវជំរុញការចាក់វ៉ាក់សាំងកូវីដ-១៩ ជូនប្រជាពលរដ្ឋ អោយបានគ្រប់ៗគ្នាផងដែរ៕ដោយ-រ៉ាវុធ