អូស្ត្រាលីការពារការលុបចោលការបញ្ជាទិញនាវាមុជទឹកបារាំង ខណៈម៉ាក្រុង និងបៃដិនគ្រោងពិភាក្សាលើបញ្ហានេះ
កាលពីថ្ងៃអាទិត្យ ទី១៩ កញ្ញាប្រទេសអូស្ត្រាលីបានធ្វើការការពារការសម្រេចចិត្តលុបចោលការបញ្ជាទិញនាវាមុជទឹកក្នុងតម្លៃរាប់ពាន់លានដុល្លារពីប្រទេសបារាំង ហើយជ្រើសរើសជម្រើសពីអាមេរិកនិងអង់គ្លេសវិញ ដោយនិយាយថាខ្លួនបានផ្ដល់ដំណឹងជូនក្រុងប៉ារីសជាមុនរួចទៅហើយ។
កាលពីសប្ដាហ៍សហរដ្ឋអាមេរិក ចក្រភពអង់គ្លេស និងអូស្ត្រាលីបានប្រកាសភាពជាដៃគូសន្តិសុខត្រីភាគីថ្មីមួយ ដែលនឹងអនុញ្ញាតឱ្យអូស្ត្រាលីសាងសង់នាវាមុជទឹកដើរដោយថាមពលនុយក្លេអ៊ែរផ្អែកលើបច្ចេកវិទ្យាសម្ងាត់របស់អាមេរិក និងអង់គ្លេស។ ការប្រកាសនេះគឺស្របពេលជាមួយនឹងការប្រកាសរបស់អូស្ត្រាលីលុបចោលការបញ្ជាទិញនាវាមុជទឹកពីប្រទេសបារាំង ក្នុងតម្លៃប្រមាណជាង ៤០ ពាន់លានដុល្លារ។
ការសម្រេចចិត្តរបស់អូស្ត្រាលីបានធ្វើឱ្យប្រទេសបារាំងខឹងសម្បារ ហើយបង្កឱ្យមានវិបត្តិដ៏ធំមួយ ដែលអ្នកវិភាគមួយចំនួនគិតថានឹងប៉ះពាល់យ៉ាងខ្លាំងដល់ទំនាក់ទំនងសម្ព័ន្ធមិត្តទាំងនេះ។ ក្រុងប៉ារីសបានកោះហៅឯកអគ្គរដ្ឋទូតរបស់ខ្លួនប្រចាំក្រុងវ៉ាស៊ីនតោន និងក្រុងកង់បេរ៉ាឱ្យត្រឡប់មកប្រទេសបារាំងវិញ។ ប្រទេសចិន ក៏បានបង្ហាញកំហឹងចំពោះចែករំលែកបច្ចេកវិទ្យារវាងប្រទេសទាំងបីផងដែរ។
នាយករដ្ឋមន្ត្រីអូស្ត្រាលីលោកស្កត ម៉ូរីសុនបាននិយាយថា៖ «ខ្ញុំមិនសោកស្ដាយចំពោះការសម្រេចចិត្តដាក់ផលប្រយោជន៍ជាតិអូស្ត្រាលីជាចម្បងទេ»។
លោកម៉ូរីសុននិយាយថាលោកយល់ពីការខកចិត្តរបស់បារាំងចំពោះការលុបចោលការបញ្ជាទិញនេះប៉ុន្តែបានបញ្ជាក់ជាថ្មីថាអូស្ត្រាលីត្រូវតែធ្វើការសម្រេចចិត្តជានិច្ចដើម្បីផលប្រយោជន៍ល្អបំផុត។ លោកបន្តទៀតថា៖ «នេះគឺជាបញ្ហាដែលខ្ញុំបានលើកឡើងដោយផ្ទាល់កាលពីប៉ុន្មានខែមុនហើយយើងបានបន្តពិភាក្សាបញ្ហាទាំងនោះរួមទាំងដោយរដ្ឋមន្ត្រីការពារជាតិនិងអ្នកផ្សេងទៀត»។
យ៉ាងណាមិញរដ្ឋាភិបាលបារាំងបាននិយាយថានៅប៉ុន្មានថ្ងៃខាងមុខនេះលោកប្រធានាធិបតីអេម៉ានុយអែល ម៉ាក្រុង នឹងធ្វើការទំនាក់ទំនងតាមទូរស័ព្ទទៅកាន់សមភាគីអាមេរិកលោកចូ បៃដិនដើម្បីទាមទារការបំភ្លឺអំពីការសម្រេចចិត្តរបស់អូស្ត្រាលី។ អ្នកនាំពាក្យរដ្ឋាភិបាលបារាំងក៏និយាយថាបន្ទាប់មកការពិភាក្សានឹងត្រូវធ្វើឡើងលើលក្ខខណ្ឌកិច្ចសន្យាបញ្ជាទិញជាពិសេសសំណងសម្រាប់ភាគីបារាំង៕
ប្រភព៖ Reuters
