គីម ជុងអ៊ុន៖ អាមេរិកជាឫគល់បង្កភាពតានតឹង នៅឧបទ្វីបកូរ៉េ
មេដឹកនាំកូរ៉េខាងជើង លោក គីម ជុង អ៊ុន បានស្តីបន្ទោសដល់សហរដ្ឋអាមេរិកថា ជាឫគល់បង្កភាពតានតឹង នៅតំបន់ឧបទ្វីបកូរ៉េ នេះបើតាមទីភ្នាក់ងារសារព័ត៌មានរដ្ឋកូរ៉េខាងជើង ចេញផ្សាយ នាព្រឹកថ្ងៃទី១២ តុលា ២០២១នេះ។
ផ្អែកតាមប្រភពដដែល អំឡុងពេលថ្លែងសុន្ទរកថា នៅទីកន្លែងតាំងពិព័រណ៍គ្រឿងសព្វាវុធមួយ កាលពីពេលថ្មីៗនេះ លោក គីម បានចោទថា អាមេរិកគឺជាមូលហេតុដើមនៃអស្ថិរភាព។
ការថ្លែងរបស់លោកគីមបានធ្វើឡើង ក្រោយពេលកូរ៉េខាងជើងបានបាញ់មីស៊ីល ជាបន្តបន្ទាប់ ក្នុងប៉ុន្មានសប្តាហ៍ចុងក្រោយនេះ។ កូរ៉េខាងជើងកំពុងស្ថិតក្រោមគំនាបទណ្ឌកម្មអន្តរជាតិកាន់តែច្រើនព្រោះតែបញ្ហានេះ។ ប៉ុន្តែកូរ៉េខាងជើងតែងអះអាងថា ខ្លួនត្រូវការអាវុធបែបនេះ ដើម្បីការពារខ្លួនពីការឈ្លានពានពីសហរដ្ឋអាមេរិក។
លោក គីម ថា រដ្ឋបាលលោក បៃឌិន តែងតែលើកឡើងថា ខ្លួនគ្មានបំណងធ្វើសត្រូវជាមួយកូរ៉េខាងជើងទេ ប៉ុន្តែ លោកចេះតែឆ្ងល់ខ្លាំងណាស់ ថាតើមានមនុស្សឬប្រទេសនានាជឿទៅកើត ដោយលោកថា គ្មានតឹកតាងក្នុងសកម្មភាពណាមួយដែលគួរឲ្យជឿថា អាមេរិកមិនចង់ធ្វើជាសត្រូវនោះទេ៕
