យោធាចិនធ្វើសមយុទ្ធវាយប្រហារឡើងគោកនៅលើឆ្នេរក្នុងខេត្តទល់មុខនឹងកោះតៃវ៉ាន់
ប៉េកាំង៖ យោធាចិនបាននិយាយនៅថ្ងៃចន្ទសប្តាហ៍នេះថា ខ្លួនបានធ្វើសមយុទ្ធវាយប្រហារឡើងគោកនៅលើឆ្នេរក្នុងខេត្តទល់មុខនឹងកោះតៃវ៉ាន់ តែទោះជាយ៉ាងណា យោធាចិនមិនបានភ្ជាប់ការហ្វឹកហាត់នេះ ទៅនឹងភាពតានតឹងបច្ចុប្បន្នជាមួយទីក្រុងតៃប៉ិ ទេ។
ចិនចាត់ទុកតៃវ៉ាន់ជាខេត្តផ្តាច់ខ្លួនមួយរបស់ខ្លួន ដោយរង់ចាំតែបង្រួបបង្រួមជាមួយប្រទេសចិនឡើងវិញ និងអាចប្រើកម្លាំងបើចាំបាច់។ ចំណែកតៃវ៉ាន់វិញនិយាយថា ខ្លួននឹងការពារសេរីភាព និងលទ្ធិប្រជាធិបតេយ្យរបស់ខ្លួន ហើយបន្ទោសចិនថា ជាអ្នកបង្កភាពតឹនតឹង។ បើតាមកាសែតកងទ័ពចិនPeople’s Liberation Army Daily សមយុទ្ធខាងលើនេះ ត្រូវបានធ្វើឡើងអស់ពេលប៉ុន្មានថ្ងៃមកហើយ នៅប៉ែកខាងត្បូងនៃខេត្តហ៊្វុយជៀន (Fujian)។ សមយុទ្ធនេះពាក់ព័ន្ធនឹងទាហានវាយលុក អ្នកលបលួចបាញ់ និងអ្នកជំនាញទូក។ ទាហានចូលរួមត្រូវបានបែងចែកជាច្រើនក្រុម ដើម្បីឡើងដណ្តើមឆ្នេរ និងអនុវត្តការងារប្រយុទ្ធនៅដំណាក់កាលផ្សេងៗគ្នា។
គួរបញ្ជាក់ផងដែរថា ការធ្វើសមយុទ្ធយោធារបស់ចិនខាងលើនេះបានកើតមានឡើងក្រោយកាលពីចុងសប្តាហ៍នេះ ប្រធានាធិបតីចិនលោក ស៊ី ជីនពីង បានប្តេជ្ញាបង្រួបបង្រួមតៃវ៉ាន់ជាមួយចិនដីគោក តែនៅមួយថ្ងៃបន្ទាប់ប្រធានាធិបតីតៃវ៉ាន់លោកស្រី ត្សៃ អ៊ីងវិន ក៏បានអះអាងដែរថា តៃវ៉ាន់នឹងមិនឱនក្បាលចំពោះចិនឡើយ៕ ប្រភព៖ CNA
