សៀមរាប ៖ រដ្ឋបាលខេត្តសៀមរាប រៀបចំព្រឹត្តិការណ៍វាយកូនហ្គោល ដើម្បីត្រៀមស្វាគមន៍ទទួលអ្នកទេសចរចូលមកកម្ពុជា
ដែលរៀបចំដោយ រដ្ឋបាលខេត្ត សហការជាមួយក្រសួងទេសចរណ៍។ ការរៀបចំព្រឹត្តិការណ៍វាយកូនគោលដណ្តើមពានរង្វាន់ សៀមរាបថ្មី២០២១ នៅលើទឹកដីសៀមរាប-អង្គរនេះ ក្រោមអធិបតីភាពដ៏ខ្ពង់ខ្ពស់ សម្ដេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានសហព័ន្ធកីឡា វាយកូន ហ្គោល កម្ពុជា ដោយសម្តេច អញ្ជើញជាធិបតីបើកការប្រកួតកីឡានេះ នាព្រឹកថ្ងៃទី១០ ខែធ្នូ ឆ្នាំ២០២១ នៅភូគីត្រាខោនទ្រីក្លឹប (Phokeethra Country Club Angkor Golf Resort) ស្ថិតក្នុងស្រុកពួក ខេត្តសៀមរាប ព្រមទាំងវត្តមាន ឯកឧត្តម ទៀ សីហា អភិបាល នៃគណ:អភិបាលខេត្ត ថ្នាក់ដឹកនាំ និងផ្នែកឯកជនពាក់ព័ន្ឋជាមួយវិស័យទេសចរណ៍ សរុបប្រមាណជាជាង១៣១នាក់បានចូលរួមប្រកួត។

ព្រឹត្តិការណ៍នេះមានរយ:ពេល ២ថ្ងៃ ពីថ្ងៃទី១០ និងទី១១ ខែធ្នូ ឆ្នាំ២០២១ ការប្រកួតបែងចែកជាពីរក្រុម ក្នុងការវាយកូនគោលដណ្តើមពានរង្វាន់ សៀមរាបថ្មី២០២១ ក្នុងនោះក្រុមAមាន ១៧ក្រុម មានកីឡាករ ៧៩នាក់ ហើយក្រុមនិមួយៗមានគ្នាពី០៤ ទៅ០៧នាក់ ធ្វើការប្រកួតនៅទីលានវាយកូនគោល ភូគីត្រា ខោនទ្រីក្លីប ស្ថិតនៅឃុំល្វា ស្រុកពួក ខេត្តសៀមរាប និង ក្រុមB មាន ១៦ក្រុម មានកីឡាករ ៥២នាក់ ហើយក្រុម និមួយៗ មានគ្នាពី០៣ ទៅ០៤នាក់ ធ្វើការប្រកួតនៅទីលានវាយកូនគោល អង្គរហ្គោលរីស៊ត ស្ថិតក្នុងសង្កាត់ស្រង៉ែ ក្រុងសៀមរាប ដោយធ្វើការប្រកួត ទៅតាមរូបមន្តសនំ្សពិន្ទុ នៅតាមឡូត៌និមួយៗ ។

ឯកឧត្តម ទៀ សីហា អភិបាលខេត្ត មានប្រសាសន៍ថា ការរៀបចំព្រឹត្តិការណ៍ កីឡាវាយកូន គោល ដណ្តើមពានរង្វាន់ សៀមរាបថ្មី២០២១ នៅលើទឹកដីសៀមរាប-អង្គរ ធ្វើឡើងជាលើក ដំបូងក្រោយពីយើងទាំងអស់គ្នា ត្រូវរងនូវផលប៉ះពាល់ដោយសារវិបត្តិនៃជម្ងឺកូវីដ-១៩ ធ្វើឲ្យរាំងស្ទះលើគ្រប់វិស័យ ជាពិសេសវិស័យទេសចរណ៍ នៅខេត្តសៀមរាបនេះ ។ អ្នកទេសចរជាតិ និងអន្តរជាតិមានការថយចុះជាលំដាប់ សេដ្ឋកិច្ច នៃវិស័យនានា ក្នុងខេត្តក៏ធ្លាក់ចុះ តែដោយទទួលបានការផ្តល់នូវអនុសាសន៍ដ៏ខ្ពង់ខ្ពស់ពីសម្តេចតេជោ ហ៊ុន សែន នាយករដ្ឋមន្ត្រី និង ការខិតខំប្រឹងប្រែងរបស់សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះជួយខេត្តនេះ បានផ្តល់នូវវ៉ាក់សាំងចាក់ជូនប្រជាពលរដ្ឋ ក្នុងខេត្តបានស្ទើរតែ១០០% បានបង្កឲ្យមានទំនុកចិត្ត និងឈានទៅបើកប្រទេសឡើងវិញ។ ឯកឧត្តមបញ្ជាក់ថា ព្រឹត្តិការណ៍វាយកូនគោលនេះ ជាឱកាសសម្រាប់ទាក់ទាញភ្ញៀវទេសចរជាតិ និងអន្តរជាតិមកទស្សនាតំបន់ប្រាសាទជាថ្មីឡើងវិញ ជាមួយគ្នានេះរដ្ឋបាលខេត្ត បានត្រៀមលក្ខណ: រួចជាស្រេចសម្រាប់ទទួលភ្ញៀវទេសចរជាតិ និងអន្តរជាតិ ដែលបានចាក់វ៉ាក់សាំងពេញលេញ ព្រមទាំងអ្នកវិនិយោគទាំងជិតឆ្ងាយ ប៉ុន្តែទោះជាយ៉ាងនេះក្តីក៏យើងត្រូវតែរៀនរស់តាមបែបគន្លងថ្មី ជាមួយកូវីដ-១៩ ដោយបន្តអនុវត្តឲ្យបានខ្ជាប់ខ្ជួនតាមវិធានរបស់រាជរដ្ឋាភិបាលក៏ដូចជាសេចក្តីណែនាំផ្សេងៗ របស់ក្រសួងសុខាភិបាល ដើម្បីទប់ស្កាត់ការឆ្លងជម្ងឺកូវីដ-១៩នេះផងដែរ ។

សម្ដេចពិជ័យសេនា ទៀ បាញ់ បានចាត់ទុកការរៀបចំព្រឹត្តិការណ៍ កីឡាវាយកូនគោលដណ្តើមពានរង្វាន់ សៀមរាបថ្មី២០២១ ថា ជាសារដ៏មានសារ:សំខាន់មួយ ដើម្បីផ្សព្វផ្សាយទៅកាន់ពិភពលោកឲ្យបានដឹងថា ខេត្តសៀមរាប ក៏ដូចជាខេត្តផ្សេងៗទៀតនៅក្នុងទូទាំងព្រះរាជាណាចក្រកម្ពុជា បានបើកដំណើរការឡើងវិញលើគ្រប់វិស័យ ហើយក៏បានត្រៀមលក្ខណ:សម្បត្តិគ្រប់យ៉ាង ក្នុងការទទួលស្វាគមន៍ភ្ញៀវទេសចរពីគ្រប់មជ្ឈដ្ឋានរាប់ទាំងអ្នកទេសចរទាំងឡាយ ដែលមានបំណងចូលមកធ្វើជំនួញក្តី ចូលមកបែបទេសចរណ៍ក្តី ដោយសារតែក្នុងពេលបច្ចុប្បន្ននេះ កម្ពុជាបានពង្រឹងការការពារសុវត្ថិភាពក៏ដូចជាទប់ស្កាត់ការឆ្លងជម្ងឺកូវីដ-១៩ ទទួលបានលទ្ឋផលល្អ តាមរយ:ការអនុវត្តវិធានការនានារបស់ក្រសួងសុខាភិបាល ។ សម្តេចពិជ័យសេនា ទៀ បាញ់ ក៏បានលើកផងដែរថា ព្រឹត្តិការណ៍កីឡាវាយកូនគោលនេះ គឺស្របទៅនឹងគោលនយោបាយរបស់រាជរដ្ឋាភិបាលកម្ពុជា ក៏ដូចជាក្រសួងទេសចរណ៍ ដែលកំពុងខិតខំជម្រុញវិស័យទេសចរណ៍កីឡាវាយកូលគោលនេះ ឲ្យរីកដុះដាលឡើង ដើម្បីផ្សព្វផ្សាយពីវិស័យទេសចរណ៍នៅកម្ពុជាផង និង ដើម្បីត្រៀមខ្លួនក្នុងការប្រកួតកីឡា ស៊ីហ្គេម ឆ្នាំ២០២៣ផងដែរ។
សូមជូនដំណឹងផងដែរថា នៅក្នុងអំឡុងចាប់ពីថ្ងៃទី១០ ខែធ្នូនេះទៅដល់ដំណាច់ឆ្នាំ២០២១ ខេត្តសៀមរាប មានរៀបចំកម្មវិធីព្រឹត្តិការណ៍ជាច្រើន ដូចជាព្រឹត្តិការណ៍មហោស្រពសិល្ប:អន្តរជាតិអង្គរ ដើម្បីអបអរសាទរក្រុងសៀមរាប ជាទីក្រុងវប្បធម៌អាស៊ាន ពិធីរំឭកគុណអង្គរ ទិវារត់ម៉ារ៉ាតុង កម្មវិធិជិះកង់ និងកម្មវិធីសម្តែងសិល្ប:ផ្សេងៗទៀតផងដែរ ៕ ដោយ ស៊ាន សុផាត