ក្រុមបាល់ទាត់ខេត្តកំពង់ចាម ដែលមានប្រជាប្រិយភាព មានអ្នកគាំទ្រច្រើន និងសម្បូរដោយកីឡាករមានទេពកោសល្យ សិតសឹងតែយុវជនក្នុងភូមិរកា ឃុំសំបូរមាស ក្រុងកំពង់ចាម ខេត្តកំពង់ចាម បានបង្ហាញទម្រង់លេងយ៉ាងល្អ ដោយយកឈ្នះក្រុមយុវជន២ធ្នូត្នោត ក្នុងលទ្ធផល ៤ទល់០ នៅវគ្គ១៦ក្រុម ពានរង្វាន់បាល់ទាត់ ឯកឧត្តម បណ្ឌិត ហ៊ុន ម៉ាណែត រដូវកាលទី១ ឆ្នាំ២០២២ កាលពីល្ងាចថ្ងៃទី១៥ ខែមីនាម្សិលមិញ នាទីលានបាល់ទាត់ស្ថិតនៅភូមិពោធិរោងលើ ឃុំកោងកាង ស្រុកពញាក្រែក ខេត្តត្បូងឃ្មុំ ។

លទ្ធផល៤គ្រាប់របស់ក្រុមបាល់ទាត់ខេត្តកំពង់ចាម រកបានដោយកីឡាករ ចាន់ ថាអាឡាហ្វីន , អ៊ន់ សីហា , សុខ ម៉ាន់សូត្រ និងកីឡាករ យ៉ា ទើត ម្នាក់មួយគ្រាប់ ខណៈក្រុមយុវជន២ធ្នូត្នោត មិនអាចរកគ្រាប់បាននោះទេ ។ ជ័យជំនះនេះបានធ្វើក្រុមមានមូលដ្ឋាន នៅខេត្តកំពង់ចោម ក្លាយជាបេក្ខភាពចុងក្រោយគេឈានទៅវគ្គ៨ក្រុម ក្នុងចំណោម៧ក្រុមផ្សេងៗទៀត រួមមាន ក្រុមយុវជនសន្តិភាពពោធិរោងលើ , ក្រុមយុវជនឥន្រ្ទី១០០ហិចតា ខេត្តរតនៈគីរី , ក្រុមយុវជនរស្មីសន្តិភាពពង្រ១ , ក្រុម យុវជននាគកំណាចសាច់សូរ , ក្រុមយុវជនសាលាអន្តរជាតិ រ៉ះម៉ាស់ , ក្រុមយុវជនមហាហង្សឈើទាលភ្លោះ , និងក្រុមកីឡាបាល់ទាត់ត្រពាំងថ្ម ។

គួរបញ្ជាក់ថា ព្រឹត្តការណ៍ប្រកួតបាល់ទាត់ ពានរង្វាន់ ឯកឧត្តមបណ្ឌិត ហ៊ុន ម៉ាណែត រដូវកាលទី១ ឆ្នាំ២០២០ មាន៣២ក្រុមចូលរួម ការប្រកួតធ្វើតាមរូបមន្តចាញ់ធ្លាក់ រហូតដល់វគ្គផ្តាច់ព្រ័ត្រ រកជើងឯកតែម្តង ។ លោក នៅ សារី ស្ថាបនិកពានរង្វាន់នេះ បានបញ្ជាក់ថា ការបង្កើតពាននេះ ធ្វើឡើងក្នុងគោលបំណង ក្រោមដំបូលសន្តិភាព ជាមួយនឹងការអបអរ និងគាំទ្រ ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រ្តី នៃកម្ពុជា នាថ្ងៃអនាគត ជាពិសេសចូលរួមលើកកម្ពស់វិស័យកីឡាបាល់ទាត់តាមភូមិ ឃុំ ស្រុក ស្របតាមអនុសាស្រ្តដ៏ខ្ពង់ខ្ពស់របស់សម្តេចតេជោ ហ៊ុន សែន « ប្រជាពលរដ្ឋម្នាក់គប្បីលេងកីឡាអោយបានមួយមុខប្រចាំជីវិត » និងផ្តល់ឪកាសអោយយុវជនលេងកីឡាដើម្បីសុខភាព មិត្តភាព សាមគ្គីភាពផងដែរ ។

សូមបញ្ជាក់ថា ប្រកួតបាល់ទាត់ ពានរង្វាន់ ឯកឧត្តមបណ្ឌិត ហ៊ុន ម៉ាណែត រដូវកាលទី១ ឆ្នាំ២០២០ វគ្ក៨ក្រុមចុងក្រោយ ក្រុម សាលារ៉ះម៉ាស់ ត្រូវប៉ះ ក្រុមយុវជនមហាហង្សឈើទាលភ្លោះ , ក្រុម ក្រុមយុវជនសន្តិភាពពោធិរោងលើ ប៉ះ ក្រុមយុវជនឥន្រ្ទី១០០ហិចតា ខេត្តរតនៈគីរី , ក្រុមយុវជនរស្មីសន្តិភាពពង្រ១ និងក្រុមយុវជនណាកកំណាចសាច់សូរ និងក្រុមកីឡាបាល់ទាត់ត្រពាំងថ្ម ប៉ះ ក្រុមបាល់ទាត់ខេត្តកំពង់ចាម ៕ ចាន់ វិចិត្រ