EU ទំនងនឹងអនុម័តការដាក់ទណ្ឌកម្មលើប្រេងរុស្ស៊ីឆាប់ៗនេះ
នៅសប្ដាហ៍នេះសមាជិកសហភាពអឺរ៉ុបទំនងនឹងអនុម័តការដាក់ទណ្ឌកម្មជាដំណាក់កាលលើប្រេងរុស្ស៊ី ជាការឆ្លើយតបនឹងការលុកលុយរបស់ក្រុងមូស្គូលើប្រទេសអ៊ុយក្រែន នេះបើតាមការរាយការណ៍របស់កាសែត The New York Times ដែលនឹងបង្កផល់ប៉ះពាល់យ៉ាងខ្លាំងទៅលើសេដ្ឋកិច្ចរបស់រុស្ស៊ី។
ដោយផ្អែកលើប្រភពជាមន្ត្រី និងអ្នកការទូតអឺរ៉ុប កាសែតនេះរាយការណ៍ថាឯកអគ្គរដ្ឋទូតនៃប្រទេសនីមួយៗនឹងជួបប្រជុំនៅថ្ងៃពុធខាងមុខនេះដើម្បីបង្ហើយការចរចាលើសំណើនេះ ដោយមានការរំពឹងថានឹងមានការអនុម័តនៅចុងសប្ដាហ៍។
ខណៈពេលដែលការដាក់ទណ្ឌកម្មចាប់ផ្ដើមចូលជាធរមានជាដំណាក់កាល ប្រទេសនៅអឺរ៉ុបនឹងបង្កើនការនាំចូលប្រេងពីប្រភពដទៃទៀតដូចជាប្រទេសអារ៉ាប់នៅឈូងសមុទ្រពែរ្ស នីហ្សេរីយ៉ា កាហ្សាក់ស្ថាន និងអាហ្សេបៃហ្សង់។
មុនការរាយការណ៍ខាងលើ កាសែត The Wall Street Journal បានរាយការណ៍ការហាមឃាត់ទាំងស្រុងលើការនាំចូលប្រេងរុស្ស៊ីអាចធ្វើទៅបាន បន្ទាប់ពីប្រទេសអាល្លឺម៉ង់សម្រេចចិត្តផ្លាស់ប្ដូរជំហររបស់ខ្លួនកាលពីសប្ដាហ៍មុន។
ដើមឡើយប្រទេសអាល្លឺម៉ង់បានប្រឆាំងយ៉ាងខ្លាំងចំពោះវិធានការហាមឃាត់ការនាំចូលប្រេងរុស្ស៊ី ប៉ុន្តែបានផ្លាស់ប្ដូរជំហររបស់ខ្លួនវិញនៅពេលដែលមានការចុះហត្ថលេខាលើកិច្ចព្រមព្រៀងប្រើប្រាស់កំពង់ផែរបស់ប៉ូឡូញដើម្បីនាំចូលប្រេងពីប្រភពផ្សេង។
យ៉ាងណាមិញ បន្ថែមពីលើការហាមឃាត់ការនាំចូលប្រេងពីរុស្ស៊ី កិច្ចប្រជុំនេះក៏ទំនងនឹងអនុម័តការដាក់ទណ្ឌកម្មលើធនាគារធំជាងគេរបស់រុស្ស៊ី Sberbank និងបុគ្គលជនជាតិរុស្ស៊ីមួយចំនួនទៀត៕
ប្រភព៖ Business Fox
