ស្រីលង្កាបន្តដំឡើងថ្លៃប្រេង ខណៈប្រតិភូសហរដ្ឋអាមេរិកទៅដល់ប្រទេសនេះ
ក្រុមហ៊ុនលក់ប្រេងក្នុងប្រទេសស្រីលង្កាបានដំឡើងថ្លៃប្រេងឥន្ធនៈបន្ថែមទៀតកាលពីថ្ងៃអាទិត្យ ក្រោយរដ្ឋមន្ត្រីថាមពលប្រកាសពីការពន្យាពេលក្នុងការទទួលបានការនាំចូលប្រេងថ្មីទៀត រីឯអាមេរិកចាប់ផ្តើមផ្តល់ហិរញ្ញប្បទានជិត១៦០លានដុល្លារដើម្បីសង្គ្រោះសេដ្ឋកិច្ច។
យោងតាមការចេញផ្សាយរបស់ទីភ្នាក់ងារព័ត៌មានបារាំង AFP ក្រុមហ៊ុនប្រេងឥន្ធនៈ Ceylon Petroleum Corporation (CPC) នៃប្រទេសស្រីលង្កា បាននិយាយថា ខ្លួនបានដំឡើងតម្លៃប្រេងម៉ាស៊ូត ដែលត្រូវបានប្រើប្រាស់យ៉ាងទូលំទូលាយក្នុងវិស័យដឹកជញ្ជូនសាធារណៈ ចំនួន១៥ភាគរយបន្ថែមទៀត ដល់តម្លៃប្រហែល១,២៧ដុល្លារក្នុងមួយលីត្រ និង តម្លៃប្រេងសាំង២២ភាគរយដល់ ១,៥២ដុល្លារ។
សេចក្តីប្រកាសរបស់ក្រុមហ៊ុនប្រេងនោះកើតមានតែមួយថ្ងៃបន្ទាប់ពីលោក Kanchana Wijesekera រដ្ឋមន្ត្រីថាមពលស្រីលង្កា បាននិយាយថា នឹងមានការពន្យាពេលទទួលបានការនាំចូលប្រេងថ្មី។
លោករដ្ឋមន្ត្រី បាននិយាយថា ដល់សប្តាហ៍ចុងក្រោយនេះ ប្រេងមិនត្រូវបាននាំចូលទេ ខណៈពេលដែលកាលបរិច្ឆេទដឹកជញ្ជូនទៅដល់សប្តាហ៍បន្ទាប់វិញ ដោយសារហេតុផលធនាគារ។
លោករដ្ឋមន្ត្រី បានសុំអភ័យទោសចំពោះអ្នកជិះម៉ូតូ ហើយជំរុញឲ្យពួកគេមិនចូលរួមការចាក់សាំងបន្តកន្ទុយគ្នានៅខាងក្រៅស្ថានីយ៍ប្រេងឥន្ធនៈ ។ អ្នកជិះរថយន្តជាច្រើនបានទុករថយន្តជាជូរដើម្បីចាក់ប្រេង ពេលដែលការផ្គត់ផ្គង់ត្រូវបានស្តារឡើងវិញនោះ។
ប្រភពមន្ត្រីបាននិយាយថា ការផ្គត់ផ្គង់ប្រេងដែលនៅសេសសល់របស់ប្រទេសស្រីលង្កា មានប្រសិទ្ធភាពប្រហែលរយៈពេល២ថ្ងៃ ប៉ុន្តែថា អាជ្ញាធរកំពុងសង្គ្រោះវាសម្រាប់សេវាកម្មសំខាន់ផ្សេងៗ។
ស្ថានទូតអាមេរិកក្នុងទីក្រុងកូឡុំបូ បាននិយាយថា គណៈប្រតិភូពីរតនាគារអាមេរិក និងក្រសួងរដ្ឋ បានមកដល់សម្រាប់ការពិភាក្សា ដើម្បីរុករកមធ្យោបាយប្រសិទ្ធភាពបំផុតសម្រាប់អាមេរិក ដើម្បីគាំទ្រសេចក្តីត្រូវការរបស់ស្រីលង្កា។
ឯកអគ្គរដ្ឋទូតអាមេរិកប្រចាំប្រទេសស្រីលង្កា ជូលី ចុង (Julie Chung) បានលើកឡើងក្នុងសេចក្តីប្រកាសព័ត៌មានថា «នៅពេលដែលប្រជាជនស្រីលង្កាស៊ូទ្រាំនឹងការប្រឈមផ្នែកសេដ្ឋកិច្ចដ៏ខ្លាំងក្លាក្នុងប្រវត្តិសាស្រ្ត កិច្ចខិតខំប្រឹងប្រែងរបស់យើងដើម្បីគាំទ្រកំណើនសេដ្ឋកិច្ច និងដើម្បីពង្រឹងស្ថាប័នប្រជាធិបតេយ្យ មិនសំខាន់ជាងនេះនោះទេ»។
ស្ថានទូតសហរដ្ឋអាមេរិកបាននិយាយថា ខ្លួនបានប្តេជ្ញាផ្តល់ហិរញ្ញប្បទានថ្មីតម្លៃ១៥៨,៧៥លានដុល្លារក្នុងរយៈពេល២សប្តាហ៍កន្លងទៅ ដើម្បីជួយប្រទេសស្រីលង្កា។
អង្គការសហប្រជាជាតិ បានចេញសេចក្តីអំពាវនាវបន្ទាន់មួយដើម្បីរៃអង្គាសប្រាក់៤៧លានដុល្លារដើម្បីផ្តល់ជំនួយដល់ផ្នែកដែលងាយរងគ្រោះបំផុតនៃប្រជាជនប្រទេសដែនកោះដែលមាន២២លាននាក់។
ប្រជាជនប្រហែល១,៧លាននាក់ត្រូវការ«ជំនួយសង្គ្រោះជីវិត»។ នេះបើយោងតាមអង្គការសហប្រជាជាតិ ដោយមនុស្ស៤នាក់ក្នុងចំណោម៦នាក់បានកាត់បន្ថយរបបអាហាររបស់ពួកគេ ដោយសារតែការខ្វះខាតខ្លាំងពេក និងតម្លៃហក់ឡើងខ្ពស់។
នាយករដ្ឋមន្ត្រី Ranil Wickremesinghe បានព្រមានសភាកាលពីថ្ងៃពុធថា ភាពលំបាកកាន់តែច្រើនកំពុងកើតមាន។
លោក Wickremesinghe បាននិយាយថា «សេដ្ឋកិច្ចរបស់យើងបានប្រឈមមុខនឹងការដួលរលំទាំងស្រុង»។ «ឥឡូវនេះយើងកំពុងប្រឈមមុខនឹងស្ថានភាពធ្ងន់ធ្ងរជាងការខ្វះខាតប្រេងឥន្ធនៈ ឧស្ម័ន អគ្គិសនី និងអាហារ»។ ដោយមិនអាចសងបំណុលបរទេសចំនួន៥១ពាន់លានដុល្លាររបស់ខ្លួនបានទេ រដ្ឋាភិបាលបានប្រកាសថាខ្លួនបានខកខានក្នុងខែមេសា ហើយកំពុងចរចាជាមួយមូលនិធិរូបិយវត្ថុអន្តរជាតិសម្រាប់ថវិកាសង្គ្រោះដែលអាចធ្វើទៅបាន៕
