ប៉ាគីស្ថាន៖ មន្ទីរពេទ្យភាគខាងត្បូង កំពុងចាល់ណែនដោយអ្នកជំងឺ ក្រោយជំនន់ទឹកភ្លៀង
ប៉ាគីស្ថាន៖ទឹកជំនន់ធ្ងន់ធ្ងរនៅប៉ាគីស្ថានកាលពីសប្តាហ៍កន្លងទៅ មិនត្រឹមតែផ្តាច់យកជីវិតមនុស្សខ្ទង់ពាន់នាក់នោះទេ តែវិបត្តិអាកាសធាតុនេះ កំពុងបន្តរុញច្រានឱ្យប្រជាជនរាប់លាននាក់ ត្រូវរស់នៅក្នុងស្ថានភាពដ៏លំបាកជាមួយជំងឺអាសន្នរោគដែលឆ្លងតាមទឹក។
ជំងឺអាសន្នរោគបង្កចេញពីគ្រោះទឹកជំនន់ កំពុងធ្វើឱ្យកន្លែងសម្រាកសង្គ្រោះបន្ទាន់នៅតាមមន្ទីរពេទ្យធំៗរបស់រដ្ឋ នៅក្រុងSehwan ខេត្ត Sindh ភាគខាងកើតប្រទេសប៉ាគីស្ថាន កំពុងចាល់ណែនទៅដោយអ្នកជំងឺ រងចាំការព្យាបាល។ បើតាមការឱ្យរបស់អ្នកកាសែតរបស់ទីភ្នាក់ងារព័ត៌មានរ៉យទ័រ ដែលបានចុះយកព័ត៌មានដល់កន្លែង មានមនុស្សរាប់រយនាក់ អង្គុយតម្រៀបចាំចូលបន្ទប់ពេទ្យយ៉ាងអន្ទះសា ដើម្បីស្វែងរកការព្យាបាលជំងឺផ្សេងៗដូចជា ជំងឺគ្រុនចាញ់ រាគរូស និងជំងឺផ្សេងទៀត។
មន្ត្រីសុខាភិបាល និងគ្រូពេទ្យវិញកំពុងតែមានភាពលំបាកខ្លាំង ចំពោះការទប់ទល់លំហូរអ្នកជំងឺដ៏ច្រើនបែបនេះ។ រដ្ឋាភិបាល និងអាជ្ញាធរសុខាភិបាលក្នុងតំបន់កំពុងប្រកាសជួលគ្រូពេទ្យបន្ថែមដល់ទៅប្រាំពាន់នាក់។
យ៉ាងហោចណាស់ ១ភាគ៣ នៃផ្ទៃដីប៉ាគីស្ថាន ត្រូវបានលិចលង់ដោយទឹកជំនន់ រយៈពេលប្រមាណ២ខែជាប់គ្នាមកនេះ។ ទឹកជន់ដោយភ្លៀងបន្តល្ហល្ហេវនៅលើផ្ទៃដីរាប់រយគីឡូម៉ែត្រ និងទម្រាំស្រកគឺត្រូវការរយៈពេល ២-៦ ខែ ខណៈប្រជាជន ពិសេសស្ត្រី មនុស្សចាស់ និងក្មេង បានឆ្លងមេរោគលើស្បែក រាគរូស គ្រុនចាញ់ គ្រុនពោះវៀន និងគ្រុងឈាមជាដើម។ កង្វះចំណីអាហារ កត្តាអនាម័យសុខភាព កំពុងតែបង្កការលំបាកទៅលើប្រជាជនប៉ាគីស្ថានដែលមានជីវភាពក្រីក្រខ្លាំងស្រាប់ទៅហើយ។
ប្រជាជនប៉ាគីស្ថានរាប់រយពាន់នាក់ ភៀសចេញពីផ្ទះទៅរស់នៅជំរំបណ្តោះអាសន្នរបស់រដ្ឋាភិបាល។ មានមនុស្ស១៧០០នាក់ រួមទាំងកុមារជាង ៦០០ នាក់បានបាត់បង់ជីវិត និងមនុស្ស៣៣លាននាក់ កំពុងរងផលប៉ះពាល់ដោយផ្ទាល់។
អង្គការសុខភាពពិភពលោក (WHO) ដាក់ការព្រួយបារម្ភអំពី គ្រោះមហន្តរាយលើកទីពីរ ដែលនឹងកើតឡើងពីជំងឺឆ្លងតាមទឹក ដែលរីករាលដាលពាសពេញប្រទេស ជាពិសេសនៅក្នុងខេត្ត Sindh ។
នៅក្នុងរបាយការណ៍ចុងក្រោយរបស់អង្គការសហប្រជាជាតិផ្នែកមនុស្សធម៌ (OCHA) ចេញផ្សាយកាលពីចុងសប្តាហ៍កន្លងទៅ ឱ្យដឹងថា ប្រជាជនប៉ាគីស្ថានជាង ៨លាននាក់ ក្នុងស្រុកចំនួន២៨ ត្រូវបានប៉ាន់ប្រមាណថាកំពុងស្ថិតនៅក្នុងវិបត្តិ និងត្រូវការការសង្គ្រោះផ្នែកសន្តិសុខស្បៀងបន្ទាន់នៅរវាងខែកញ្ញា-វិច្ឆិកា ឆ្នាំ២០២២នេះ។ របាយការណ៍នេះ ក៏បានដាក់ក្តីបារម្ភជាខ្លាំងចំពោះជំងឺឆ្លងក្រោយទឹកជំនន់ នៅក្នុងខេត្ត Sindh និង Balochistan ដែលជាតំបន់រងគ្រោះខ្លាំងជាងគេ៕
ដោយ៖ បណ្តូល ពេជ្រ
