ជីឌីភីរបស់ប្រទេសចិនក្នុងត្រីមាសទី៣ ស្ទុះងើបឡើងវិញក្នុងល្បឿនលឿន
ចិន៖សេដ្ឋកិច្ចរបស់ប្រទេសចិនបានស្ទុះងើបឡើងវិញក្នុងល្បឿនលឿនជាងការរំពឹងទុកនៅក្នុងត្រីមាសទី៣។នេះបើតាមទិន្នន័យផ្លូវការនៅថ្ងៃទី២៤ខែតុលា។ប៉ុន្តែការទប់ស្កាត់កូវីដ១៩ដ៏តឹងរ៉ឹងវិបត្តិអចលនទ្រព្យកាន់តែជ្រៅ និងហានិភ័យនៃការធ្លាក់ចុះសេដ្ឋកិច្ចពិភពលោក កំពុងក្លាយជាក្តីប្រឈមចំពោះកិច្ចខិតខំប្រឹងប្រែងរបស់ទីក្រុងប៉េកាំងក្នុងការជំរុញការងើបឡើងវិញនៅឆ្នាំក្រោយ។
ផលិតផលក្នុងស្រុកសរុប(ជីឌីភី,GDP) នៅក្នុងប្រទេសដែលមានសេដ្ឋកិច្ចធំបំផុតទីពីររបស់ពិភពលោកបានកើនឡើង ៣.៩ភាគរយនៅក្នុងត្រីមាសទី៣ ពីខែកក្កដា ដល់ខែកញ្ញា ធៀបនឹងរយៈពេលដូចគ្នាកាលពីឆ្នាំមុន។ នេះបើតាមទិន្នន័យផ្លូវការ ដែលចេញផ្សាយនៅថ្ងៃចន្ទ ទី២៤ ខែតុលា ឆ្នាំ២០២២។ ទិន្នន័យនេះគឺខ្ពស់ជាងការព្យាកររបស់សារព័ត៌មានរ៉យទ័រ(Reuters)ដែលថាកំណើនជីឌីភីរបស់ចិនកើនឡើងតែ ៣.៤ភាគរយប៉ុណ្ណោះ និង ០.៤ភាគរយពីត្រីមាសទីពីរ។
ដំបូងនៃឡើយទិន្នន័យនេះ គ្រោងនឹងចេញផ្សាយនៅថ្ងៃទី១៨ ខែតុលា ប៉ុន្តែត្រូវពន្យារពេលរហូតដល់ក្រោយសមាជបក្សកុម្មុយនិស្តចិន ដែលបានធ្វើឡើងកាលពីសប្តាហ៍មុន។ សមាជកបក្សដែលលោក ស៊ី ជីនពីង(Xi Jinping)ទទួលបានអាណត្តិដឹកនាំលើកទី៣ជាប្រវត្តិសាស្ត្រ ហើយថែមទាំងប្រមូលអ្នកស្មោះត្រង់របស់លោកសម្រាប់សមាសភាពគណៈកម្មាធិការអចិន្ត្រៃយ៍នៃការិយាល័យនយោបាយបក្សកុម្មុយនិស្តចិនផង។
ទោះបីជាមានការស្ទុះងើបឡើងវិញក៏ដោយ ប៉ុន្តែសេដ្ឋកិច្ចចិនក៏កំពុងប្រឈមមុខនឹងបញ្ហាជាច្រើនទាំងក្នុងប្រទេស និងក្រៅប្រទេស។ បញ្ហាទាំងនោះរួមមាន យុទ្ធសាស្ត្រទប់ស្កាត់កូវីដ-១៩របស់ចិន និងវិបត្តិក្នុងវិស័យអចលនទ្រព្យរបស់ចិន ដែលបានធ្វើឱ្យសម្ពាធពីខាងក្រៅកាន់តែមានទំងន់ថែមទៀត ជាពិសេសឥទ្ធិពលពីវិបត្តិអ៊ុយក្រែននិងការថយចុះនៃសេដ្ឋកិច្ចសកលដោយសារការដំឡើងអត្រាការប្រាក់ ដើម្បីទប់ស្កាត់អតិផរណា។
ការស្ទង់មតិរបស់ទីភ្នាក់ងារសារព័ត៌មាន Reuters បានព្យាករណ៍ថា កំណើនសេដ្ឋកិច្ចរបស់ប្រទេសចិននឹងថយចុះមកត្រឹម ៣.២ភាគរយនៅឆ្នាំ២០២២ ខណៈការព្យាករផ្លូវការរបស់ចិនគឺ ៥.៥ភាគរយ។ ជាការថយចុះនៃកំណើនសេដ្ឋកិច្ចដ៏អាក្រក់បំផុតក្នុងរយៈពេលជិតកន្លះសតវត្ស។
ឆ្លើយតបនឹងបញ្ហា អ្នករៀបចំគោលនយោបាយបានដាក់ចេញនូវវិធានការគាំទ្រសេដ្ឋកិច្ចជាង៥០ ចាប់តាំងពីចុងខែឧសភា ដែលជាយន្តស្វែងរកការជំរុញសេដ្ឋកិច្ច។
ទិន្នន័យដាច់ដោយឡែកមួយទៀតបានបង្ហាញថា សកម្មភាពក្នុងឧស្សាហកម្មចិននាខែកញ្ញាបានកើនឡើង៦.៣ភាគរយធៀបនឹងឆ្នាំមុន ដែលលើសពីការរំពឹងទុក ៤.៥ភាគរយ។ ប៉ុន្តែកំណើននៃការលក់រាយនៅតែមានភាពទន់ខ្សោយ ពោលគឺបានកើនឡើងតែ ២.៥ភាគរយ អាក្រក់ជាងការរំពឹងទុកដែលថានឹងកើនឡើង ៣.៣ភាគរយ៕
ដោយ៖យ៉ាន អាន /CPA
