ឥណ្ឌូនេស៊ីអនុញ្ញាតឱ្យទេសចរបរទេសស្នាក់នៅកោះបាលីរយៈពេល១០ឆ្នាំ បើមានលុយក្នុងធនាគារ១៣ម៉ឺនដុល្លារ
ឥណ្ឌូនេស៊ី៖ ប្រទេសឥណ្ឌូនេស៊ីកំពុងតែដាក់ចេញនូវគោលការណ៍ទិដ្ឋាការថ្មីមួយ ដើម្បីទាក់ទាញភ្ញៀវទេសចរបរទេសដែលជាមហាសេដ្ឋី។ ទិដ្ឋាការថ្មីក្រោមគោលគំនិត «ផ្ទះទី២» របស់ឥណ្ឌូនេស៊ី នឹងអនុញ្ញាតឱ្យជនបរទេសស្នាក់នៅក្នុងប្រទេសរបស់ខ្លួន ពី៥ ទៅ១០ឆ្នាំ ប៉ុន្តែដើម្បីអាចទទួលបាននូវករណីលើកលែងពិសេសនេះ ជនបរទេសទាំងនោះ ត្រូវមានប្រាក់តម្កល់ទុកក្នុងគណនីធនាគារយ៉ាងហោចណាស់១៣ម៉ឺនដុល្លារអាមេរិក។
បើតាមសេចក្ដីប្រកាសរបស់រដ្ឋាភិបាលឥណ្ឌូនេស៊ី ចេញផ្សាយនៅថ្ងៃអង្គារ ទី២៥ ខែតុលា ឆ្នាំ២០២២ ទិដ្ឋាការ «ផ្ទះទី២» នេះ នឹងចូលជាធរមានជាផ្លូវការចាប់ពីថ្ងៃទី២៥ ខែធ្នូ ចុងឆ្នាំ២០២២នេះតទៅ។ មន្ដ្រីជាន់ខ្ពស់ឥណ្ឌូនេស៊ីគូសបញ្ជាក់ថា ការដាក់ចេញនូវប្រភេទទិដ្ឋាការថ្មីនេះ ធ្វើឡើងក្នុងគោលបំណងទាក់ទាញភ្ញៀវទេសចរបរទេសដែលជាមហាសេដ្ឋី មានលុយច្រើន ឱ្យមករស់នៅឥណ្ឌូនេស៊ី ដើម្បីជំរុញដល់កំណើនសេដ្ឋកិច្ចឥណ្ឌូនេស៊ី តាមរយៈការចំណាយរបស់មហាសេដ្ឋីជាជនបរទេសទាំងអស់នោះ ឬការវិនិយោគរបស់ពួកគេជាដើម។
លោក Widodo Ekatjahjana អគ្គនាយកស្ដីទីនៃអគ្គនាយកដ្ឋានអន្តោប្រវេសន៍ឥណ្ឌូនេស៊ី ថ្លែងឱ្យដឹងថា ជនបរទេសដែលមានបំណងដាក់ពាក្យស្នើសុំទិដ្ឋាការនេះ ត្រូវមានប្រាក់តម្កល់ក្នុងធនាគារក្នុងប្រទេសឥណ្ឌូនេស៊ី យ៉ាងហោចណាស់ពីរពាន់លានរូពៀ ឬស្មើនឹង ១៣ម៉ឺនដុល្លារ។
ក្រៅពីឥណ្ឌូនេស៊ី មានប្រទេសជាច្រើនផ្សេងទៀត បានដាក់ចេញនូវគោលការណ៍ស្រដៀងគ្នានេះដែរ។ កាលពីពេលថ្មីៗនេះ ប្រទេសនូវែលសេឡង់ និងព័រទុយហ្គាល់ បានប្រកាសផ្ដល់ «ទិដ្ឋាការ Nomad ឌីជីថល» ដល់ជនបរទេសដែលមានបំណងចង់រស់នៅក្នុងប្រទេសរបស់ខ្លួន ដើម្បីធ្វើការពីចម្ងាយ។ បែបផែនរស់នៅបែបឌីជីថលថ្មីនេះ មានទំនោរកើនឡើងកាន់តែច្រើនបន្ទាប់ពីការរាតត្បាតនៃជំងឺកូវីដ១៩ ដែលធ្វើឱ្យរបៀបធ្វើការពីចម្ងាយដោយពុំចាំបាច់ទៅអង្គុយធ្វើការផ្ទាល់នៅក្នុងការិយាល័យ ក្លាយទៅជារឿងសាមញ្ញធម្មតា។
របាយការណ៍មួយរកឃើញថា កាលពីឆ្នាំ២០២១កន្លងទៅ មានជនជាតិអាមេរិកចំនួន ១៥,៥លាននាក់ រស់នៅនិងធ្វើការពីចម្ងាយ ឬជាភាសាអង់គ្លេសថា «Digital Nomads»៕ ដោយ៖ កែវ កិរិយា
