ឧបទ្ទវហេតុនៅសង្កាត់ Itaewon៖ ប៉ូលីសកូរ៉េខាងត្បូងសារភាពថាពុំបានធ្វើប្រតិបត្តិការឆ្លើយតបឱ្យបានគ្រប់គ្រាន់
សេអ៊ូល៖ មេបញ្ជាការប៉ូលីសកូរ៉េខាងត្បូង លោក Yoon Hee-keun បានថ្លែងថា ក្រុមប៉ូលីសកូរ៉េខាងត្បូងពុំបានធ្វើប្រតិបត្តិការជាបន្ទាន់ និងបានគ្រប់គ្រាន់ ដើម្បីឆ្លើយតបនឹងឧបទ្ទវហេតុជាន់គ្នាស្លាប់នៅសង្កាត់ Itaewon ដែលកើតឡើងកាលពីយប់ថ្ងៃសៅរ៍ ទី២៩ខែតុលាឆ្នាំ២០២២កន្លងទៅ។ នេះគឺជាការទទួលស្គាល់ជាលើកដំបូងបង្អស់របស់មេបញ្ជាការប៉ូលីសកូរ៉េខាងត្បូង ដោយបានប្ដេជ្ញាថា លោកនឹងបើកការស៊ើបអង្កេតដ៏ពេញលេញមួយសម្រាប់ករណីនេះ។
លោក Lee Sang-min រដ្ឋមន្ដ្រីក្រសួងមហាផ្ទៃ បានសូមទោសចំពោះសោកនាដកម្មដ៏សោកសៅ ដែលបានសម្លាប់ជីវិតមនុស្សអស់១៥៦នាក់ និងមានមនុស្ស១៥២នាក់ផ្សេងទៀតរងរបួស។ ហេតុការណ៍នេះ គឺជាសោកនាដកម្មដ៏អាក្រក់បំផុតមួយរបស់កូរ៉េខាងត្បូង បន្ទាប់ពីគ្រោះថ្នាក់លិចសាឡាងកាលពីឆ្នាំ២០១៤សម្លាប់មនុស្សអស់ជាង៣០០នាក់ដែលភាគច្រើនជាសិស្សសាលា។
សូមរំឭកថា កាលពីថ្ងៃសៅរ៍ ទី២៩ ខែតុលា ហេតុការណ៍ជាន់គ្នាស្លាប់បានកើតឡើងនៅសង្កាត់ Itaewon ដ៏ល្បីល្បាញនៃទីក្រុងសេអ៊ូល ខណៈពេលដែលហ្វូងយុវជនរាប់រយរាប់ពាន់នាក់ នាំគ្នាប្រារព្ធពិធីបុណ្យ Halloween ដោយគ្មានវិធានការរឹតត្បិតសុខភាពជាលើកដំបូង ចាប់តាំងពីមានការផ្ទុះឡើងនូវជំងឺកូវីដ១៩ កាលពីចុងឆ្នាំ២០១៩។
នៅក្នុងកិច្ចប្រជុំរដ្ឋសភា រដ្ឋមន្ត្រីក្រសួងមហាផ្ទៃលោក Lee Sang-min បានថ្លែងសុំទោសដល់ប្រជាពលរដ្ឋដូច្នេះថា៖ «វាពិតជារឿងដ៏គួរឱ្យសោកសៅណាស់សម្រាប់ខ្ញុំ ក្នុងនាមជាឪពុកម្នាក់ដែលមានទាំងកូនប្រុសនិងកូនស្រី»។ និងថា ហេតុការណ៍ដែលមិនគួរកើតនេះ ពិបាកនឹងទទួលណាស់»។
នៅថ្ងៃអង្គារ ទី១ខែវិច្ឆិកានេះ លោកប្រធានាធិបតី Yoon Suk-yeol បានថ្លែងថា ឧបទ្ទវហេតុនេះ គឺជាមេរៀនដ៏ជូរចត់មួយ ដែលឆ្លុះបញ្ចាំងអំពីសារៈសំខាន់នៃការគ្រប់គ្រងក្រុមមនុស្ស និងកង្វះការវាយតម្លៃឱ្យបានគ្រប់ជ្រុងជ្រោយរបស់អាជ្ញាធរចំពោះរឿងនេះ។ តាមរយៈហេតុការណ៍នេះ លោកប្រធានាធិបតីYoonត្រូវប្រឈមនឹងសម្ពាធនយោបាយកាន់តែខ្លាំងខណៈដែលប្រជាប្រិយភាពរបស់លោកបានធ្លាក់ចុះជាបន្តបន្ទាប់ ចាប់តាំងពីមុនពេលមានរឿងនេះកើតឡើងម្ល៉េះ៕
ដោយ៖កែវ កិរិយា
