ភ្នំពេញ៖ប្រតិបត្តិករសំខាន់ចំនួនបី ដែលសកម្មក្នុងការ បោស សំអាតមីន និងយុទ្ធភណ្ឌមិនទាន់ផ្ទុះ បានទទួលថវិកាដែលជា ថវិកាផ្តល់ពីសម្ដេចតេជោ ហ៊ុន សែន នាយករដ្ឋមន្រ្តីកម្ពុជា គម្រោងមូលនិធិកម្ពុជាគ្មានមីនឆ្នាំ២០២៥ តាមរយៈអាជ្ញាធរមីន កម្ពុជា ដើម្បីបោសសំអាតមីនក្នុងឆ្នាំ២០២៣នេះ។

ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីនកម្ពុជា បានថ្លែងឱ្យដឹងថា សម្ដេចតេជោនាយករដ្ឋមន្រ្តីបានសម្តេចផ្តល់ នូវថវិកាបន្ថែមចំនួន៣០លានដុល្លារសម្រាប់ធ្វើការបោសសំអាតមីន ដែលថវិកានេះក៏ត្រូវបានបែងចែកទៅដល់ប្រតិបត្តិករបោស សំអាតមីនផងដែរ។

ឯកឧត្តមបានថ្លែងដូចនេះ បន្ទាប់ពីពិធីចុះហត្ថលេខាកិច្ចសន្យា ស្តីពីការ បោសសម្អាតមីនគាំទ្រ «ដោយមូលនិធិកម្ពុជា គ្មានមីន ឆ្នាំ២០២៥» ក្រោមអធិបតីភាពឯកឧត្តម ហ៊ុន ម៉ាណែត អគ្គ មេបញ្ជាការរងកងយោធពលខេមរភូមិន្ទ និងជាមេបញ្ជាការ កងទ័ពជើងគោកកាលពីព្រឹកថ្ងៃទី២៦ ខែមករា ឆ្នាំ២០២៣ នៅអគ្គលេខាធិការដ្ឋានអាជ្ញាធរមី។

ថវិកាដែលត្រូវបានបែងចែកនេះដើម្បីធ្វើការងារបោសសំអាត ចម្ការមីន នៅឆ្នាំ២០២៣ ក្នុងខេត្តចំនួន១០ ដែលប្រតិបត្តិ ករ ដែលទទួលបាននោះ មាន កងកម្លាំងមជ្ឈមណ្ឌលសកម្មកំចាត់ មីនកម្ពុជា (CMAC), កងទ័ពជើងគោក និងកងកម្លាំងមួកខៀវ។
ឯកឧត្តម លី ធុជ មានប្រសាសន៍ថា ៖ «សម្តេចតេជោ បានផ្តល់ ថវិកាចំនួន៣០លានមកវិស័យសកម្មភាពមីនរបស់យើងនេះដើម្បីបោសសំអាតមីនជូនប្រជាជនយើង ដែលលោកចង់ឃើញ ប្រទេស កម្ពុជា ចង់ឃើញកូនក្មួយ ដែលនៅតំបន់ដាច់ស្រយាល ដែល រស់នៅជាមួយនឹងសំណល់ជាតិផ្ទុះពីសង្រ្គាមឱ្យរួចផុតពីគ្រោះថ្នាក់ ហើយថវិកានេះត្រូវបានបែងចែកទៅប្រតិបត្តិករទាំង៣របស់យើងនាពេលនេះផងដែរ»។

បើតាមការបញ្ជាក់ឱ្យដឹងពី ឯកឧត្តម លី ធុជ ការបោសសំអាត ចម្ការមីននេះ នៅឆ្នាំ២០២៣ ត្រូវបានបែងចែកតាមកង កម្លាំង ទាំងបី នេះ ផ្សេងៗគ្នា ដែលក្នុងនោះ កងកម្លាំងមួកខៀវ នឹង អនុវត្តនៅខេត្តកោះកុង និងខេត្តមណ្ឌលគិរី លើផ្ទៃដីជាង ២៧គីឡូម៉ែត្រក្រឡា ដែលទទួលបានថវិកា ជាង៥លានដុល្លារ អាមេរិក។

លោកបន្តថា សម្រាប់កងទ័ពជើងគោក អនុវត្តនៅខេត្តបន្ទាយ មានជ័យ ឧត្តរមានជ័យ និងខេត្តកំពង់ស្ពឺ លើផ្ទៃដីប្រមាណជាង ៤៦គីឡូម៉ែត្រក្រឡា ដែលទទួលបានថវិកាចំនួន ៣,៩លាន ដុល្លារអាមេរិក ឯកម្លាំងនៃមជ្ឈមណ្ឌលសកម្មកំចាត់មីនកម្ពុជា អនុវត្តនៅខេត្តប៉ៃលិន ពោធិ៍សាត់ សៀមរាប ព្រះវិហារ និង ខេត្តកំពង់ធំ លើផ្ទៃដីចំនួនជាង ១០៦គីឡូម៉ែត្រក្រឡា ដែល ទទួលបានថវិកាជាង១៥,៩ លានដុល្លារ។

ឯកឧត្តម លី ធុជ បានបញ្ជាក់ថា ៖ «ដូចនេះជាលទ្ធផល នៅក្នុង ឆ្នាំ២០២៣នេះ យើងនឹងមានខេត្តចំនួន១៨ ខេត្តដែលត្រូវប្រកាស ជា ខេត្តអស់មីន ហើយសម្រាប់គោលដៅទៅពេលខាងមុខទៀត គឺយើងនៅសល់ជាង២៣៧គីឡូម៉ែត្រក្រឡាសម្រាប់ធ្វើការបោសសំអាតមីនឆ្នាំ២០២៤ និង២០២៥ ដែលយើងត្រូវការថវិកា ប្រមាណ ៧០លានដុល្លារអាមេរិក ដើម្បីបញ្ចប់គ្រាប់មីនឱ្យអស់»។

នាឱកាសនោះដែរ អនុប្រធានទី១ អាជ្ញាធរមីន ក៏បានលើក ឡើង ដែរថា សម្រាប់ការសកម្មភាពបោសសំអាតមីន នៅដើមឆ្នាំ ២០២៣ នេះ មានល្បឿនលឿនជាងឆ្នាំមុនៗ ដោយសារមាន កងកម្លាំងប្រតិបត្តិករជាច្រើន ត្រូវបានដាក់ពង្រាយ នៅទូទាំង ប្រទេស ដែលធ្វើឱ្យគោលដៅកម្ពុជាគ្មានមីនឆ្នាំ២០២៥ នឹង ទទួលបានជោគជ័យ។

ឯកឧត្តម ហេង រតនា អគ្គនាយកមជ្ឈមណ្ឌលសកម្មភាព កំចាត់ មីនកម្ពុជា (ស៊ីម៉ាក់) ដែលបានចូលរួមក្នុងពិធីនោះដែរ បាន លើកឡើងថា គំរោងមូលនិធិកម្ពុជាគ្មានមីនឆ្នាំ២០២៥នេះ ជាកញ្ចប់ថវិកាដែលលោកនាយករដ្ឋមន្រ្តី ហ៊ុន សែន បានអនុម័ត អាចរំដោះផ្ទៃដីចម្ការមីនបានចំនួន ១៨,០០០ ហិកតា។លោកបានបញ្ជាក់ថា ៖ «ក្នុងចំនួននេះអង្គភាពស៊ីម៉ាក់នឹងបោស សម្អាតតំបន់ចម្ការមីនក្នុងខេត្តកំពង់ធំ សៀមរាប និងស្រុកខ្លះ នៃខេត្តព្រះវិហារ ខេត្តពោធិ៍សាត់ និងខេត្តប៉ៃលិន។ គម្រោងនេះជួយគាំទ្រកំលាំងជំនាញនានាចំនួនជិត៦០០នាក់ ដែលមានសុនខហិតមីនចំនួន ១៣ ក្រុម កងអនុសេនាតូច គ្រឿង ចក្រចំនួន ២១ កង និងក្រុមស្រាវជ្រាវ និងបោសសម្អាតមីន ចំនួន ៣៦ក្រុម»៕ ដោយ៖ នាង សុគន្ធា