តូក្យូ៖សារព័ត៌មានCNAរាយការណ៍ដោយដកស្រង់ប្រភពពីក្រសួងការបរទេសជប៉ុនដែលបានលើកឡើងថា នាយករដ្ឋមន្ត្រីជប៉ុនលោក ហ្វូមីអូ គីស៊ីដា (Fumio Kishida) នឹងជួបជាមួយប្រធានាធិបតីអ៊ុយក្រែន​លោក វីឡូឌីមៀរ ហ្សេលេនស្គី (Volodymyr Zelenskyy )ក្នុងដំណើរទស្សនកិច្ចទៅកាន់ទីក្រុង កៀវ(Kyiv) ​នៅថ្ងៃអង្គារថ្ងៃទី ២១ ខែមីនាឆ្នាំ២០២៣។ នេះជាដំណើរទស្សនកិច្ចដ៏គួរឱ្យភ្ញាក់ផ្អើលមួយដែលជប៉ុនអះអាងថាធ្វើឡើងដើម្បីបង្ហាញពី “សាមគ្គីភាព និងការគាំទ្រដែលមិនផ្លាស់ប្តូរ”ទៅកាន់សមភាគីអ៊ុយក្រែន។

នាយករដ្ឋមន្ត្រីជប៉ុនលោក គីស៊ីដា នៅប្រទេសឥណ្ឌាកាលពីថ្ងៃចន្ទ។ គេពឹងថាលោកនឹងត្រឡប់ទៅទីក្រុងតូក្យូវិញ ប៉ុន្តែលោកបានធ្វើដំណើរទៅកាន់ប្រទេសប៉ូឡូញ ដែលជាកន្លែងដែលគាត់បានជិះរថភ្លើងដើម្បីឆ្លងទៅអ៊ុយក្រែន។

ក្រសួងការបរទេសជប៉ុន បន្ថែមថា«គាត់(នាយករដ្ឋមន្ត្រី)នឹងបង្ហាញការគោរពចំពោះភាពក្លាហាន និងការតស៊ូរបស់ប្រជាជនអ៊ុយក្រែន»។

ប្រភពដដែលបន្តថាគេរំពឹងថាលោកនាយករដ្ឋមន្ត្រីនឹងត្រឡប់ទៅប្រទេសប៉ូឡូញវិញចូលរួមកិច្ចពិភាក្សាកំពូលជាមួយប៉ូឡូញនៅថ្ងៃពុធ នឹងទៅដល់ទីក្រុងតូក្យូវិញនៅថ្ងៃព្រហស្បតិ៍។

ព័ត៌មាននៃការធ្វើដំណើរនេះត្រូវបានរាយការណ៍ជាលើកដំបូងដោយប្រព័ន្ធផ្សព្វផ្សាយជប៉ុនរួមទាំងទូរទស្សន៍​ជាតិ NHK ដែលមានអ្នកសារព័ត៌មាននៅប្រទេសប៉ូឡូញបានថតរថយន្តដឹកនាយករដ្ឋមន្ត្រីជប៉ុននៅទីក្រុង Przemyslជាកន្លែងដែលមេដឹកនាំបរទេសនានា តែងតែជិះរថភ្លើងចូលអ៊ុយក្រែន។

ប្រធានាធិបតីអាមេរិកលោក ចូ បៃដិន(Joe Biden) បានធ្វើដំណើរដ៏ភ្ញាក់ផ្អើលមួយដែរដើម្បីទៅជួប ហ្សេលេនស្គី កាលពីខែកុម្ភៈ។ សេចក្ដីរាយការណ៍មួយចំនួនបង្ហាញថា មន្ត្រីរបស់ជប៉ុនមានការព្រួយបារម្ភអំពីហានិភ័យសន្តិសុខនៃការធ្វើដំណើរលើកនេះរបស់លោក គីស៊ីដា។

លោកបានក្លាយជានាយករដ្ឋមន្ត្រីជប៉ុនដំបូងបង្អស់ដែលបានទៅទស្សនាតំបន់សង្រ្គាម ចាប់តាំងពីសង្គ្រាមលោកលើកទីពីរ។

ដំណើរ​ទស្សនកិច្ច​របស់​នាយករដ្ឋមន្ត្រីជប៉ុន ជួនចំពេលគ្នាដែលប្រធាននាធិតីចិន ស៊ី ជីនភីង ធ្វើ​ទស្សនកិច្ច​នៅ​ទីក្រុង​មូស្គូ​ដើម្បី​ពិភាក្សា​ជាមួយ​មេដឹកនាំ​រុស្ស៊ី​លោក វ្ល៉ាឌីមៀ ពូទីន ពីបញ្ហា​សង្គ្រាមនៅអ៊ុយក្រែន​។ ជប៉ុន​បាន​ចូលរួម​ជាមួយ​សម្ព័ន្ធមិត្ត​លោកខាងលិច​ដាក់ទណ្ឌកម្ម​រុស្ស៊ី​ជុំវិញ​ការ​ឈ្លានពាន​អ៊ុយក្រែនដោយ​ផ្តល់​ការគាំទ្រ​ដល់​ក្រុង​កៀវ។ជប៉ុនបានចាត់វិធានការដ៏កម្រក្នុងការបញ្ជូនឧបករ​ណ៍ការពារ និងផ្តល់ជម្រកដល់អ្នកដែលភៀសខ្លួនចេញពីជម្លោះ។ទោះជាយ៉ាងណាក៏ដោយ

ជំនួយផ្ដល់ឱ្យអ៊ុយក្រែនមិនមែនជាការផ្តល់ការគាំទ្រផ្នែកយោធាទេ ពីព្រោះរដ្ឋធម្មនុញ្ញក្រោយសង្រ្គាមរបស់ជប៉ុន កំណត់សមត្ថភាពយោធារបស់ខ្លួនជាយោធាស្វ័យការពារប៉ុណ្ណោះ។

លោក គីស៊ីដា ធ្លាប់ព្រមាននៅក្នុងសុន្ទរកថាមួយកាលពីឆ្នាំមុនថា «អ៊ុយក្រែនថ្ងៃនេះអាចជាអាស៊ីបូព៌ានៅថ្ងៃស្អែក»ដោយសំដៅលើចេតនារបស់ចិនដែលប៉ុនប៉ងយកតៃវ៉ាន់មកវិញ។

កាលពីខែធ្នូ២០២២ ប្រទេសជប៉ុនបានកែលម្អគោលនយោបាយការពារជាតិសំខាន់ៗរបស់ខ្លួនដោយបន្ថែមថវិកាជាតិដើម្បីធ្វើទំនើបកម្មយោធា។  រដ្ឋាភិបាលជប៉ុនអះអាងថា ប្រទេសចិនគឺជា “បញ្ហាប្រឈមជាយុទ្ធសាស្ត្រធំបំផុតមិនធ្លាប់មាន” ចំពោះសន្តិសុខជប៉ុន។

ក្នុងរយៈពេលប៉ុន្មានថ្ងៃថ្មីៗនេះ លោក គីស៊ីដា ទទួលស្វាគមន៍ប្រធានាធិបតីកូរ៉េខាងត្បូង យូន សូកយូល(Yoon Suk Yeol) និងអធិការបតីអាល្លឺម៉ង់ Olaf Scholz នៅទីក្រុងតូក្យូ មុនពេលធ្វើដំណើរទៅកាន់ទីក្រុង ញូវដែលី ដើម្បីពិភាក្សាជាមួយនាយករដ្ឋមន្ត្រីឥណ្ឌាណារិនដ្រា មូឌី( Narendra Modi)៕

ដោយ៖វណ្ណ ស័ក្ដិ