ប្រមុខរាជរដ្ឋាភិបាលកម្ពុជា អំពាវនាវឱ្យស្ថាប័នពាក់ព័ន្ធ រួមទាំងប្រជាពលរដ្ឋ បន្តសហការគ្នា ដើម្បីទទួលបានគ្រុនចាញ់សូន្យ
ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានអំពាវនាវទៅដល់ស្ថាប័នពាក់ព័ន្ធ រួមទាំងប្រជាពលរដ្ឋទាំងអស់ ត្រូវរួមសហការគ្នា ដើម្បីលុបបំបាត់ជំងឺគ្រុនចាញ់បានទាំងស្រុងនៅឆ្នាំ២០២៥ ក្នុងប្រទេសកម្ពុជា និងឆ្នាំ២០៣០ ក្នុងពិភពលោក។
សម្ដេចតេជោ ហ៊ុន សែន បានធ្វើការអំពាវនាវបែបនេះតាមរយៈសារលិខិត នាឱកាសប្រារព្ធទិវាជាតិប្រយុទ្ធនឹងជំងឺគ្រុនចាញ់ ថ្ងៃទី២៥ ខែមេសា ឆ្នាំ២០២៣ ក្រោមប្រធានបទ «នេះជាពេលដែលគ្រុនចាញ់ត្រូវសូន្យ តាមរយៈការវិនិយោគ កែច្នៃ និងអនុវត្ត»។
ទិវានេះប្រារព្វឡើងក្នុងគោលបំណងបង្ហាញឱ្យឃើញពីពេលវេលា ដែលត្រូវធ្វើឱ្យគ្រុនចាញ់សូន្យពីពេលនេះ តាមរយៈការលើកកម្ពស់ប្រសិទ្ធភាពនៃការអនុវត្តសកម្មភាពពីគ្រប់មជ្ឈដ្ឋានជាចាំបាច់ សម្រាប់ឈានឆ្ពោះទៅលុបបំបាត់ជំងឺគ្រុនចាញ់បានទាំងស្រុងក្នុងប្រទេសកម្ពុជា និងលើពិភពលោក។
ក្នុងសារលិខិតដដែល សម្ដេចតេជោនាយករដ្ឋមន្ត្រីបានឱ្យដឹងទៀតថា ទោះបីការងារប្រយុទ្ធនឹងជំងឺគ្រុនចាញ់ កំពុងទទួលបាននូវសមិទ្ធផលយ៉ាងមានប្រសិទ្ធភាពខ្ពស់ទៅតាមគន្លងនៃផែនការយុទ្ធសាស្ដ្រជាតិយ៉ាងណាក៏ដោយ ក៏ត្រូវតែបង្កើនប្រសិទ្ធភាពការងារចូលរួមប្រយុទ្ធនឹងជំងឺគ្រុនចាញ់នេះបន្ថែមទៀត។
សម្ដេចតេជោមានប្រសាសន៍ថា៖ «ព្រោះថាកម្ពុជានៅមិនទាន់លុបបំបាត់មេរោគគ្រុនចាញ់បានទាំងស្រុងនូវឡើយនោះទេ រីឯជំងឺគ្រុនចាញ់ប្រភេទសន្ធំ នៅមានវត្តមាននូវឡើយក្នុងការគំរាមគំហែងដល់អាយុជីវិតសាធារណៈជន ជាពិសេសប្រជាជនដែលចូលទៅក្នុងតំបន់ព្រៃភ្នំទាញយកអនុផលព្រៃភ្នំ អេកូទេសចរណ៍ធម្មជាតិ ឬរស់នៅក្នុងភូមិសាស្ត្រដែលប្រឈមការចម្លងជំងឺគ្រុនចាញ់ ក្រោមវត្តមានភ្នាក់ងារចម្លងសត្វមូសដែកគោល»។
សម្ដេចតេជោ ហ៊ុន សែន បញ្ជាក់ថា ៖ «ខ្ញុំសូមអំពាវនាវឲ្យស្មាតីបំពេញកាតព្វកិច្ចដ៏អង់អាចក្លាហាននេះស្ថិតនៅជារៀងរាល់រហូតជាមួយថ្នាក់ដឹកនាំ ពលរដ្ឋ ព្រមទាំងសូមឲ្យក្រសួង ស្ថាប័ន អាជ្ញាធរមូលដ្ឋានគ្រប់លំដាប់ថ្នាក់ទាំងអស់ វិស័យឯកជន អង្គការនានា ប្រព័ន្ធផ្សព្វផ្សាយព័ត៌មាន សហគមន៍ជាតិ និងអន្តរជាតិ ដៃគូអភិវឌ្ឍ ដៃគូអនុវត្ត សូមបន្តចូលរួមអនុវត្ត និងគាំទ្រដល់បេសកកម្មផែនការលុបបំបាត់ជំងឺគ្រុនចាញ់រហូតទទួលបានជោគជ័យទាំងស្រុង»។
សម្ដេចតេជោបានបន្ថែមដោយបានណែនាំឲ្យក្រុមការងារលុបបំបាត់ជំងឺគ្រុនចាញ់ អាជ្ញាធរមូលដ្ឋាន និងអង្គការដៃគូពាក់ព័ន្ធទាំងអស់ ត្រូវតែផ្ដល់ជូនដល់សាធារណៈជននូវគ្រុនចាញ់សូន្យតាមភូមិសាស្ត្រនីមួយៗចាប់ពេលនេះតទៅ តាមរយៈយន្តការបន្តការវិនិយោគ និងបន្តកែច្នៃស្វែងរកប្រសិទ្ធភាពផងដែរ។
ទាក់ទិនរឿងនេះ លោក គួង ឡូ ប្រធានមន្ទីរសុខាភិបាលខេត្តព្រះវិហារ បានឱ្យដឹងនៅថ្ងៃទី២៣ ខែមេសាថា ស្ថានភាពជំងឺគ្រុនចាញ់ក្នុងខេត្តនេះមានភាពប្រសើរឡើងច្រើន ដោយសារតែរយៈពេល៥ឆ្នាំកន្លងមកមិនមានប្រជាពលរដ្ឋណាបានស្លាប់ដោយសារតែជំងឺគ្រុនចាញ់នោះឡើយ ហើយករណីជំងឺគ្រុនចាញ់ក៏មានការធ្លាក់ចុះ ក្នុងនោះក៏មានប្រភេទជំងឺគ្រុនចាញ់សន្ធំផងដែរ។
លោក គួង ឡូ បានប្រាប់ថា ៖ «អ្វីដែលយើងកត់សម្គាល់សំខាន់នោះគឺ ក្នុងឆ្នាំ២០២៣នេះ រយៈពេល៣- ៤ខែនេះ មិនទាន់រកឃើញមានករណីប្រភេទជំងឺគ្រុនចាញ់សន្ធំនេះនូវឡើយទេ បើធៀបទៅនឹងឆ្នាំ២០២២ ក្នុងឆមាសទី១ រកឃើញមួយ ឬពីរករណី ប៉ុន្តែសម្រាប់ឆ្នាំ២០២៣នេះ យើងមិនទាន់រកឃើញទេ ករណីប្រភេទគ្រុនចាញ់សន្ធំទេ»។
ទោះបីជាខេត្តព្រះវិហារមិនទាន់រកឃើញករណីប្រភេទនេះក៏ដោយ ប៉ុន្តែមន្ទីរសុខាភិបាលនៅតែពិនិត្យមើលជាបន្តទៅទៀត ហើយក៏នៅតែបន្តអន្តរាគមន៍ទៅតាមផែនការយុទ្ធសាស្ត្រថ្នាក់ជាតិរបស់ក្រសួងសុខាភិបាល។ លោក គួង ឡូ បន្ថែម។
សូមបញ្ជាក់ផងដែរថា ជំងឺគ្រុនចាញ់កើតឡើងដោយសារសត្វមូសដែកគោលជាភ្នាក់ងារខាំបឺតឈាមចម្លងមេរោគទៅមនុស្សបង្កជាបញ្ហាព្រួយបារម្ភចម្បងសម្រាប់សុខភាពសាធារណៈ និងសង្គម តាមរយៈកត្តាប៉ះពាល់ យ៉ាងខ្លាំងលើសុខភាព ខាតបង់ការងារ ខាតបង់ផលិតភាព ខាតបង់ថវិកា សេដ្ឋកិច្ចសង្គមធ្ងន់ធ្ងរ និងយាយីដល់ អាយុជីវិតគ្រប់ពេល។
បើយោងតាមសារលិខិតសម្ដេចតេជោ ហ៊ុន សែន នាយករដ្ឋមន្រ្តីកម្ពុជា ជំងឺគ្រុនចាញ់ក្នុងប្រទេសកម្ពុជា ត្រូវបានរាជរដ្ឋាភិបាលអនុម័ត ដាក់ចេញជាផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ដែលជាត្រីវិស័យនៃជ្រុងមួយ ក្នុងក្របខ័ណ្ឌគោលដៅអភិវឌ្ឍប្រកបដោយចីរភាពឆ្នាំ២០១៦-២០៣០ របស់រាជរដ្ឋាភិបាល ក្នុងការស្តារ និងអភិវឌ្ឍប្រទេស។
ការប្រតិបត្តិ ការវិនិយោគ កែច្នៃ និងអនុវត្តផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ក្នុងប្រទេសកម្ពុជាកំពុងសម្រេចបានជោគជ័យនូវវឌ្ឍនភាពសមិទ្ធផលផ្លែផ្កាជាបន្តបន្ទាប់។ ក្នុងនោះនៅឆ្នាំ២០១៦ ត្រូវបានបញ្ឈប់លែងឱ្យមានភាពស៊ាំថ្នាំសម្លាប់មេរោគ គ្រុនចាញ់ និងឆ្នាំ២០១៨ មកដល់បច្ចុប្បន្នគ្មានមនុស្សស្លាប់ដោយសារជំងឺគ្រុនចាញ់ ឯករណីឈឺដោយជំងឺគ្រុនចាញ់ត្រូវបានកាត់បន្ថយជាលំដាប់ពីជាង ១១ម៉ឺនករណីឈឺ និងស្លាប់ជាង៥០០នាក់ ជាមធ្យមប្រចាំឆ្នាំ ក្នុងអំឡុងទសវត្សរ៍មុនឆ្នាំ២០១១ មកសល់ ៤ ០៤១ករណីឈឺ នៅឆ្នាំ២០២២កន្លងមក៕
ដោយ៖ជា សុខនី
