ភ្នំពេញ៖ សម្តេចតេជោ ហ៊ុន សែន បានបញ្ជាក់ថា សម្រាប់ការសុំទោសរបស់លោក ជា ប៉ូច មិនគ្រប់គ្រាន់ទេ ព្រោះលោកជា ប៉ូច ជាមនុស្សក្រឡេចក្រឡុចបំផុត។ សម្តេច និងកូនសម្តេច ក៍ដូចជាមន្ត្រីផ្សេងទៀតបានថ្នាក់ថ្នមលោក ជា ប៉ូច រយៈពេលជាង៤ឆ្នាំ តែទីបំផុតសម្តេចបានក្លាយជាគោលដៅនៃការកម្ចាត់ចោល (ទម្លាក់) របស់លោក ជា ប៉ូច តាមការចង់បានរបស់អាក្បត់ជាតិ៣ជំនាន់ទៅវិញ។​ សម្តេចមិនអាចទុកមនុស្សដូចលោក ជា ប៉ូច ឱ្យបំផ្លាញសម្តេចតាមបញ្ជាអាក្បត់ជាតិ៣ជំនាន់បាននោះឡើយ។ ការបញ្ជាក់របស់សម្តេចនេះ បានធ្វើឡើងតាមរយៈបណ្តាញសង្គមតេឡេក្រាមនៅមុននេះបន្តិច។

សម្តេចតេជោ ហ៊ុន សែន បានសរសេរយ៉ាងដូច្នេះថា “សម្រាប់ខ្ញុំការសុំទោសត្រឹមប៉ុណ្ណេះរបស់ ជា ប៉ូច មិនគ្រប់គ្រាន់ទេព្រោះ ជា ប៉ូច ជាមនុស្សក្រឡេចក្រឡុចបំផុត។ ខ្ញុំនិងកូនខ្ញុំ ក៍ដូចជាមន្ត្រីផ្សេងទៀតបានថ្នាក់ថ្នម ជា ប៉ូច រយៈពេលជាង៤ឆ្នាំ តែទីបំផុតខ្ញុំបានក្លាយជាគោលដៅនៃការកម្ចាត់ចោល (ទម្លាក់) របស់ ជា ប៉ូច តាមការចង់បានរបស់អាក្បត់ជាតិ៣ជំនាន់ទៅវិញ។ គិតខ្លួនឯងទៅ ប៉ូច ព្រោះខ្ញុំមិនអាចទុកមនុស្សដូច ប៉ូច ឱ្យបំផ្លាញខ្ញុំតាមបញ្ជាអាក្បត់ជាតិ៣ជំនាន់បាននោះឡើយ។ ត្រូវចងចាំថា មនុស្សណាក៍ដោយឱ្យតែមានទំនាក់ទំនងជាមួយអាក្បត់ជាតិ៣ជំនាន់ មិនអាចទទួលបានការយោគយល់ពី ហ៊ុន សែន នោះឡើយ ព្រោះអាមួយនេះវាអាក្រក់ពេក ជ្រុលនិយមពេក។ មនុស្សណាក៍ដោយឱ្យតែប្រកាសផ្តាច់ខ្លួនចេញពីអាក្បត់ជាតិនេះ នឹងទទួលបាននូវការលើកលែងឬយោគយល់”៕
ដោយ៖ពលជ័យ