ក្រុងហូជីមិញ គ្រោងនឹងបង្កើតលំហបៃតងក្នុងក្រុងបន្ថែមទៀត
ហាណូយ: អាជ្ញាធរទីក្រុងហូជីមិញ បានដឹកនាំភ្នាក់ងារពាក់ព័ន្ធ ពិនិត្យមើលការប្រើប្រាស់ដីដែលបានគ្រោងទុកសម្រាប់សួនច្បារសាធារណៈ ដើម្បីបង្កើតឱ្យមានលំហបៃតងក្នុងទីក្រុងបន្ថែមទៀត ពីឆ្នាំ ២០២៣ ដល់ឆ្នាំ ២០២៥។ នេះបើតាមការចុះផ្សាយរបស់កាសែតអនឡាញវៀតណាម VnExpress កាលពីថ្ងៃទី១២ ខែមិថុនា។
យោងតាមនាយកដ្ឋានសំណង់របស់ទីក្រុង ទីក្រុងហូជីមិញដែលមានប្រជាជនប្រមាណ ៩ លាននាក់រស់នៅ មានសួនច្បារសាធារណៈ និងសួនលំនៅឋានប្រមាណ ៣៦៩ កន្លែង លើផ្ទៃដីសរុប ៥០០ ហិកតា។ យ៉ាងណាមិញ សមាមាត្របច្ចុប្បន្ននៃតំបន់បៃតង និងចំនួនប្រជាជនទីក្រុង មានកម្រិតទាបបំផុតត្រឹមតែ ០,៥៥ ម៉ែត្រការ៉េក្នុងមនុស្សម្នាក់ (ម២/ម្នាក់)។
ក្នុងរយៈពេលប៉ុន្មានឆ្នាំចុងក្រោយនេះ ទីក្រុងធំៗរបស់វៀតណាមរួមទាំងក្រុងហូជីមិញ និងរដ្ឋធានីហូជីមិញ បានខិតខំបង្កើនទីធ្លាសាធារណៈ ពង្រីកសួនច្បារសាធារណៈ និងបង្កើនការដាំដើមឈើជាដើម។
យ៉ាងណាមិញ សម្រាប់ក្រុងហូជីមិញ លទ្ធផលមិនដូចការរំពឹងទុកនោះទេ ដោយសួនសាធារណៈភាគច្រើនមានទីតាំងនៅខាងក្នុងទីក្រុង ហើយខ្វះសួនច្បារសាធារណៈនៅក្នុងសង្កាត់ដែលនៅជាយៗក្រុង ខណៈផ្ទៃដីនៃសួនសាធារណៈមួយចំនួន ត្រូវបានរួមតូចដោយសារការពង្រីកផ្លូវ។
យោងតាមនាយកដ្ឋានសំណង់ក្រុងហូជីមិញដដែល បន្ទាប់ពីពិនិត្យលើដីបម្រុងសម្រាប់សួនច្បារសាធារណៈ នាយកដ្ឋាននឹងស្នើរៀបចំគម្រោងសាងសង់ និងអំពាវនាវឱ្យមានការវិនិយោគបន្ថែម។ បច្ចុប្បន្ន ទីក្រុងនេះមានគោលដៅឱ្យមានលំហបៃតងពី ២,៥-១២ ម២/ម្នាក់នៅឆ្នាំ ២០២៥។
នៅឆ្នាំ ២០២៣នេះ អាជ្ញាធរក្រុងនឹងសម្រេចផែនការសាងសង់សួនច្បារសាធារណៈទំហំ ១០ ហិកតា និងទីធ្លាសាធារណៈបៃតងចំនួន ២ ហិកតា ដាំ និងជួសជុលដើមឈើចំនួន ៦ ០០០ ដើម ដើម្បីបំពេញតាមគោលដៅនៃផ្ទៃដីបៃតង ៣-៤ ម២/ម្នាក់។
សូមបញ្ជាក់ថា លំហបៃតងមានសារៈសំខាន់ណាស់ សម្រាប់សុខុមាលភាពរបស់ប្រជាជន ជាពិសេសនៅទីក្រុង។ វាជួយកាត់បន្ថយផលប៉ះពាល់នៃការបំពុល និងអាចកាត់កំដៅក្នុងទីក្រុង ដែលបង្កឡើងពីសកម្មភាពរបស់មនុស្ស៕ ដោយ៖ ហួន ឌីណា
