របបអាហារពេលល្ងាចដើរតួនាទីយ៉ាងសំខាន់លើគុណភាពនៃការសម្រាក ហើយផ្លែឈើធម្មជាតិទាំង ៤ មុខខាងក្រោមនេះ ត្រូវបានអ្នកជំនាញអាហារូបត្ថម្ភទទួលស្គាល់ថា សម្បូរទៅដោយសារធាតុចិញ្ចឹមជួយសម្រួលដល់ដំណើរការនៃការគេងបានយ៉ាងមានប្រសិទ្ធភាព។

១. ផ្លែឈឺរី (Cherries)

ផ្លែឈឺរី ជាពិសេសពូជឈឺរីជូរ (Tart cherries) ត្រូវបានចាត់ទុកជាប្រភពធម្មជាតិដ៏កម្រមួយដែលសម្បូរដោយ មេឡាតូនីន (Melatonin) ជា អ័រម៉ូនដែលគ្រប់គ្រងវដ្តនៃការគេង និងភ្ញាក់របស់រាងកាយ។

អ្នកជំនាញអាហារូបត្ថម្ភ Jennifer Pallian ពន្យល់ថា កម្រិតមេឡាតូនីនក្នុងខ្លួនជាទូទៅនឹងកើនឡើងនៅពេលល្ងាច ឬពេលមេឃចាប់ផ្តើមងងឹត ដើម្បីបញ្ជូនសញ្ញាទៅខួរក្បាលថា នេះជាពេលសម្រាក។ លើសពីនេះ អ្នកជំនាញ Caroline Thomason បានបន្ថែមថា ផ្លែឈឺរីជូរសម្បូរទៅដោយសារធាតុប្រឆាំងអុកស៊ីតកម្ម និងប៉ូលីហ្វេណុលខ្ពស់ជាងឈឺរីផ្អែម។ ការទទួលទានទឹកឈឺរីជូរមួយកែវតូចមុនពេលចូលគេង ជួយពន្យាររយៈពេលគេង និងកាត់បន្ថយអាការមិនងាយគេងលក់ (Insomnia) បានយ៉ាងល្អ។

២. ផ្លែស្វាយ (Mangoes)

ក្រៅពីមានរសជាតិផ្អែមឆ្ងាញ់ ផ្លែស្វាយមានផ្ទុកទាំងមេឡាតូនីន និង វីតាមីន B6 ខ្ពស់។ វីតាមីន B6 មានតួនាទីយ៉ាងសំខាន់ក្នុងការជួយឱ្យរាងកាយបំប្លែងអាស៊ីតអាមីណូ Tryptophan ទៅជាសារធាតុសម្រួលការគេង។

ទោះជាយ៉ាងណា ដោយសារតែស្វាយមានជាតិស្ករធម្មជាតិខ្ពស់គួរសម ក្រុមអ្នកជំនាញណែនាំឱ្យទទួលទានក្នុងបរិមាណល្មមនៅពេលល្ងាច។ ដើម្បីទទួលបានតុល្យភាពជាតិស្ករ និងសារធាតុចិញ្ចឹមល្អ លោកអ្នកអាចញ៉ាំស្វាយលាយជាមួយយ៉ាអួរគ្មានជាតិស្ករ ឬគ្រាប់ធញ្ញជាតិ ដែលផ្តល់បន្ថែមនូវប្រូតេអ៊ីន និងខ្លាញ់ល្អ។

៣. ផ្លែចេក (Bananas)

ចេកគឺជាជម្រើសដ៏សាមញ្ញ និងងាយរកបំផុត។ ផ្លែឈើនេះសម្បូរទៅដោយ ប៉ូតាស្យូម, វីតាមីន B6 និង Tryptophan ដែលសុទ្ធសឹងជាសារធាតុជួយឱ្យសាច់ដុំសម្រាក និងជួយដល់ដំណើរការនៃប្រព័ន្ធប្រសាទ។

ចំណុចគួរឱ្យចាប់អារម្មណ៍មួយទៀត គឺកម្រិតមេឡាតូនីននៅក្នុងផ្លែចេកនឹងកើនឡើងខ្ពស់នៅពេលផ្លែចេកទុំល្អ។ អ្នកឯកទេសណែនាំឱ្យញ៉ាំចេកទុំមួយផ្លែ ជាមួយយ៉ាអួរក្រិក (Greek yogurt) ដើម្បីធ្វើជាអាហារសម្រន់ពេលយប់ដែលជួយឱ្យឆ្អែតស្រួលពោះ និងគេងលក់ស្រួល។

៤. ផ្លែគីវី (Kiwis)

ផ្លែគីវីតូចតែមានអត្ថប្រយោជន៍ធំធេងចំពោះដំណេក ដោយសារវាមានផ្ទុក សេរ៉ូតូនីន (Serotonin) ខ្ពស់។ សេរ៉ូតូនីន គឺជាសារធាតុចម្លងសរសៃប្រសាទដែលជួយសម្រួលចង្វាក់ជីវសាស្ត្រប្រចាំថ្ងៃ និងវដ្តនៃការគេងរបស់រាងកាយ។

បន្ថែមពីលើនេះ គីវីក៏សម្បូរទៅដោយវីតាមីន C, ខារ៉ូទីណូអ៊ីត (Carotenoids) និងហ្វូឡាត (Folate)។ ការរួមផ្សំគ្នារវាងសារធាតុប្រឆាំងអុកស៊ីតកម្ម និងសេរ៉ូតូនីននៅក្នុងផ្លែគីវី ជួយកាត់បន្ថយភាពតានតឹងក្នុងរាងកាយ និងជួយឱ្យអ្នកគេងលក់បានលឿនជាងមុន។

ការជ្រើសរើសអាហារសម្រន់ពីផ្លែឈើទាំងនេះក្នុងបរិមាណសមល្មមប្រហែល ១ ទៅ ២ ម៉ោងមុនពេលចូលគេង គឺជាវិធីសាស្ត្រធម្មជាតិដ៏មានសុវត្ថិភាពក្នុងការថែបំប៉នសុខភាពដំណេករបស់អ្នកឱ្យកាន់តែប្រសើរឡើង៕