ប្រទេសជប៉ុនត្រូវបានគេទទួលស្គាល់ថាជាសង្គមដែលមានអត្រាមនុស្សចាស់ខ្ពស់ជាងគេបំផុតមួយនៅលើពិភពលោក ដោយពលរដ្ឋដែលមានអាយុចាប់ពី ៦៥ ឆ្នាំឡើងទៅ មានចំនួនរហូតដល់ជាង ២៨% នៃចំនួនប្រជាជនសរុប។ ទោះជាយ៉ាងណា ភាពចាស់ជរានៅទីនោះមិនមែនជាឧបសគ្គនៃការរស់នៅនោះទេ ប៉ុន្តែវាបានក្លាយជាគំរូនៃ «ការរស់នៅប្រកបដោយគុណភាព និងភាពរស់រវើក» ដែលមនុស្សទូទៅអាចរៀនសូត្រតាមបាន។

សាច់ដុំនៅតែអាចពង្រឹងបានទោះឈានដល់វ័យចំណាស់

ការយល់ឃើញជាទូទៅតែងគិតថា មនុស្សចាស់ត្រូវតែកាត់បន្ថយចលនា និងសម្រាកឱ្យបានច្រើន ប៉ុន្តែការសិក្សាវេជ្ជសាស្ត្រទំនើប និងការអនុវត្តជាក់ស្តែងនៅជប៉ុនបង្ហាញលទ្ធផលផ្ទុយពីនេះ៖

សាច់ដុំអាចហ្វឹកហាត់បានគ្រប់វ័យ ៖ លោកស្រី Yuko Oguma សាស្ត្រាចារ្យរងផ្នែកស្រាវជ្រាវគ្រប់គ្រងសុខភាព នៃមជ្ឈមណ្ឌលវេជ្ជសាស្ត្រកីឡា Keio បានបញ្ជាក់ថា សាច់ដុំមនុស្សនៅតែអាចពង្រឹង និងកសាងឡើងវិញបាន ទោះបីឈានដល់វ័យជរាក៏ដោយ។ ការធ្វើលំហាត់ប្រាណសមស្របមិនត្រឹមតែជួយការពារការចុះខ្សោយនៃសាច់ដុំប៉ុណ្ណោះទេ ថែមទាំងជួយបង្កើនសមត្ថភាពនៃការចងចាំ និងមុខងារខួរក្បាល (Cognitive ability) ទៀតផង។

ចលនាស្រាលៗតែផ្តល់ផលធំ៖ មិនចាំបាច់ទាល់តែលេងកីឡាធ្ងន់ធ្ងរដូចជាការឡើងភ្នំខ្ពស់នោះទេ ការធ្វើចលនាពត់ពែនខ្លួនប្រចាំថ្ងៃ ការដើរ ឬការចូលរួមក្នុងសកម្មភាពហាត់ប្រាណសហគមន៍ សុទ្ធតែជួយរក្សាលំនឹងរាងកាយ និងជួយឱ្យប្រព័ន្ធរបត់ឈាមដំណើរការបានល្អ។

ផ្នត់គំនិតឯករាជ្យភាព «No Meiwaku» និងគោលដៅជីវិត

ក្រៅពីរបបអាហារ និងការធ្វើលំហាត់ប្រាណ កត្តាសំខាន់បំផុតមួយដែលជួយឱ្យមនុស្សចាស់នៅជប៉ុនមានអាយុយឺនយូរ គឺផ្នត់គំនិត និងសុខភាពផ្លូវចិត្ត៖

ការមិនចង់ក្លាយជាបន្ទុករបស់អ្នកដទៃ (Meiwaku)៖ វប្បធម៌ជប៉ុនបណ្តុះការយល់ដឹងតាំងពីក្មេងមកថា មិនត្រូវបង្កើតការរំខាន ឬក្លាយជាបន្ទុកដល់អ្នកដទៃឡើយ។ ផ្នត់គំនិតនេះជំរុញឱ្យមនុស្សចាស់ព្យាយាមពឹងផ្អែកលើខ្លួនឯង ទាំងផ្នែកស្មារតី និងរូបវន្ត ដោយបន្តធ្វើការងារស្រាលៗ ចូលរួមការងារស្ម័គ្រចិត្ត ឬរក្សាសកម្មភាពក្នុងសង្គមឱ្យបានច្រើនបំផុតតាមដែលអាចធ្វើទៅបាន។

មារតីប្រកួតប្រជែងជាមួយខ្លួនឯង៖ ការមានគោលដៅច្បាស់លាស់ក្នុងជីវិត (Ikigai) ធ្វើឱ្យមនុស្សចាស់មិនមានអារម្មណ៍ថាខ្លួនឯងលែងមានតម្លៃ។ លោក Hidekichi Miyazaki ដែលត្រូវបានគេប្រសិទ្ធនាមថា “Golden Bolt” បានបំបែកកំណត់ត្រារត់ចម្ងាយ ១០០ ម៉ែត្រក្នុងវ័យ ១០៥ ឆ្នាំ ដោយសារតែលោកតែងតែប្រជែងជាមួយថិរវេលារបស់ខ្លួនជានិច្ច។

ទំនាក់ទំនងសង្គម និងការរក្សាស្នាមញញឹម

ភាពឯកោគឺជាកត្តាប្រឈមដ៏ធំមួយចំពោះសុខភាពមនុស្សចាស់។ ប៉ុន្តែនៅប្រទេសជប៉ុន មនុស្សចាស់បានបង្កើតដំណោះស្រាយតាមរយៈ៖

ការចូលរួមក្នុងសហគមន៍៖ មនុស្សចាស់បង្កើតក្លឹបចំណង់ចំណូលចិត្តដោយខ្លួនឯង ដូចជា ការសរសេរអក្សរផ្ចង់ ការដោតផ្កា ការរាំ និងការលេងឧបករណ៍តន្ត្រី។ លើសពីនេះ ពួកគាត់បានចូលរួមជួយសង្គម ដូចជាការងារស្ម័គ្រចិត្តនៅសាលារៀន ឬជួយណែនាំភ្ញៀវទេសចរ ដែលជួយឱ្យមានការប្រាស្រ័យទាក់ទងឆ្លងជំនាន់។

ភាពកំប្លុកកំប្លែង និងការបើកចិត្តទូលាយ៖ លោកស្រី Kimiko Nishimoto ក្នុងវ័យ ៩០ ឆ្នាំ បានក្លាយជាអ្នកលេងបណ្តាញសង្គម Instagram ដ៏ល្បីល្បាញ តាមរយៈការថតរូបបែបកំប្លែងលេងសើចនឹងភាពចាស់របស់ខ្លួន។ សុទិដ្ឋិនិយម និងភាពរីករាយក្នុងចិត្តបែបនេះ គឺជាឱសថដ៏មានឥទ្ធិពលបំផុតសម្រាប់សុខភាពផ្លូវចិត្ត។

ភាពចាស់ជរាមិនមែនជាការរង់ចាំពេលវេលាកន្លងផុតទៅដោយអសកម្មនោះឡើយ។ មេរៀនពីមនុស្សវ័យចំណាស់នៅជប៉ុនបានបង្ហាញយ៉ាងច្បាស់ថា គន្លឹះនៃការរស់នៅឱ្យមានសុខភាពល្អ និងអាយុយឺនយូរ គឺការរក្សាចលនារាងកាយជាប្រចាំ ការបន្តមានគោលដៅក្នុងជីវិត ការរស់នៅដោយឯករាជ្យ និងការរក្សាសេចក្តីរីករាយក្នុងចិត្តជានិច្ច៕