មន្ទីរពេទ្យ គន្ធបុប្ផា បំបែកកំណត់ត្រាព្យាបាលអ្នកជំងឺជិត ៤ ពាន់នាក់ក្នុង១ថ្ងៃ

មន្ទីរពេទ្យ គន្ធបុប្ផា បំបែកកំណត់ត្រានៃអ្នកជំងឺ (ស្ត្រីមានផ្ទៃពោះ និងកុមារ) ដែលមកទទួលសេវាពិនិត្យនិងព្យាបាលរហូតដល់ជិត ៤ពាន់នាក់ ក្នុងរយៈពេល១ ថ្ងៃ ដែលនេះគឺជាអត្រាខ្ពស់បំផុតមិនធ្លាប់មាននៅក្នុងមន្ទីរពេទ្យនាពេលកន្លង។

នាថ្ងៃទី ១៧ ខែ កក្កដា ឆ្នាំ ២០២៦ មន្ទីរពេទ្យ គន្ធបុប្ផា បានប្រកាសជូនដំណឹងនៅលើផេកផ្លូវការ មូលនិធិគន្ធបុប្ផាកម្ពុជា ពីអត្រាខ្ពស់បំផុតនៃកុមារនិងស្ត្រីមានផ្ទៃពោះដែលបានមកពិនិត្យ និងទទួលសេវាព្យាបាលនៅក្នុងមន្ទីរពេទ្យមានចំនួនរហូតដល់ ៣ ៧៧៩ នាក់ កាលពីថ្ងៃទី ១៦ ខែ កក្កដា ម្សិលមិញ។ ដោយឡែក ក្នុងចំណោមអ្នកជំងឺដែលបានមកពិនិត្យ-ព្យាបាល កាលពីថ្ងៃម្សិលមិញមានកុមារជំងឺធ្ងន់ដែលត្រូវសម្រាកនៅមន្ទីរពេទ្យ ៨៣១ នាក់។

មន្ទីរពេទ្យបានបញ្ជាក់ដែរថា បន្ថែមលើកុមារដែលមកព្យាបាលថ្មីកាលពីម្សិលមិញនេះ ក៏មានកុមារដែលកំពុងព្យាបាលក្នុងមន្ទីរពេទ្យស្រាប់មាន ៣ ០៣៦ នាក់ ផងដែរ ក្នុងនោះមានជំងឺគ្រុនឈាមរហូតដល់ ៦៤៧ នាក់៕