នៅថ្ងៃដែលមេឃស្រទំ ឬមេឃភ្លៀង មនុស្សមួយចំនួនតែងតែយល់ថា មិនចាំបាច់លាបគ្រីមការពារកម្ដៅថ្ងៃទេ ក៏ព្រោះតែមេឃមិនបើកថ្ងៃ ឯអាកាសធាតុក៏មិនក្ដៅដែលអាចធ្វើឱ្យស្បែកខ្មៅបាន។ ប៉ុន្តែការពិតទៅ មេឃមិនបើកថ្ងៃមិនមែនមានន័យថា មិនមានកាំរស្មី UV នោះទេ ហើយរឿងលាបគ្រីមការពារកម្ដៅថ្ងៃនោះ ក៏មិនមែនទាក់ទងតែនឹងការការពារកុំឱ្យសម្បុរស្រគំនោះដែរ តែវាទាក់ទងទៅនឹងសុខភាពស្បែកជារួម។

ដ្បិតនៅថ្ងៃដែលមេឃស្រទំមានពពកអួរអាប់ កាំរស្មី UV ពីព្រះអាទិត្យនៅតែអាចឆ្លងកាត់ពពកមកប៉ះនឹងស្បែកអ្នកបាន គ្រាន់តែបរិមាណនៃកាំរស្មីនេះអាចនឹងតិច ឬច្រើនទៅតាមស្ថានភាពជាក់ស្ដែង។

ចំណុចសំខាន់មួយទៀត នោះគឺ UV ដែលទាក់ទងនឹងស្បែកមានបែងចែកជា ២ ទៀត គឺ UVA និង UVB៖

• UVA ជាកាំរស្មីពាក់ព័ន្ធនឹងភាពចាស់មុនវ័យ ស្នាមជ្រួញ និងអាចម៍រុយ ខណៈ UVA អាចឆ្លងកាត់កញ្ចក់បង្អួចបានដោយផ្នែក។
• UVB ជាកាំរស្មីដែលបណ្ដាលឱ្យស្បែករលាកក្រហមដោយសារកម្ដៅថ្ងៃ និងជាកត្តាមួយដែលបង្កើនហានិភ័យនៃជំងឺមហារីកស្បែក។

ហេតុផលនេះហើយ ទើបនៅពេលជ្រើសរើសគ្រីមការពារកម្ដៅថ្ងៃ អ្នកគួរតែពិនិត្យមើលពាក្យថា Broad Spectrum ដែលមានន័យថា ការពារទាំងកាំរស្មី UVA និង UVB។

ត្រឡប់មកសំណួរដើមរបស់យើងវិញ ថាតើក្នុងថ្ងៃមេឃស្រទំ ឬភ្លៀងធ្លាក់ គួរលាបគ្រីមការពារកម្ដៅថ្ងៃដែរទេ?

American Academy of Dermatology (AAD) បានណែនាំថា បើអ្នកត្រូវចេញទៅខាងក្រៅ អ្នកនៅតែគួរលាបគ្រីមការពារកម្ដៅថ្ងៃ ព្រោះការការពារស្បែកមិនមែនទាក់ទងតែនឹងពន្លឺព្រះអាទិត្យមួយមុខនោះទេ តែចំណុចសំខាន់តែម្ដងនោះ គឺកាំរស្មី UV។

ចំណុចគួរកត់សម្គាល់មួយ គឺអ្នកគួរជ្រើសរើសគ្រីមការពារកម្ដៅថ្ងៃប្រភេទ Broad Spectrum ដែលមាន SPF 30 ឡើងទៅ ប្រើប្រាស់ក្នុងបរិមាណណែនាំ និងលាបសារជាថ្មីនៅពេលចាំបាច់ ជាពិសេសនៅពេលត្រូវនៅខាងក្រៅយូរ៕