Shakhtar Donetsk ដែលជាក្រុមបាល់ទាត់របស់អ៊ុយក្រែនដំបូងគេប្រកួតក្នុងពានរង្វាន់ UEFA Champions League ចាប់តាំងពីរុស្ស៊ីចូលឈ្លានពានមក បានទទួលជ័យជម្នះដ៏ត្រចះត្រចង់យ៉ាងគួរឱ្យចងចាំ ៤-១ លើក្រុម RB Leipzig របស់អាល្លឺម៉ង់។
នៅក្រោយធានាបាន៣ពិន្ទុយ៉ាងរំភើបក្នុងប្រកួតបើកឆាក UCL ពូល F យប់ថ្ងៃអង្គារទី៦ខែកញ្ញាឆ្នាំ២០២២ Shakhtar Donetsk បានបង្ហោះលើទំព័រហ្វេសប៊ុកផ្លូវការរបស់ខ្លួនថា “It’s for you, Ukraine” ដែលមានន័យថា «ជ័យជម្នះនេះគឺសម្រាប់ប្រទេសអ៊ុយក្រែន»។
នៅក្នុងពូល F នេះយប់មិញដែរ Real Madrid បានផ្ដួលម្ចាស់ផ្ទះ Celtic ៣ទល់នឹង១ ប៉ុន្តែគឺ Shakhtar Donetsk ដែលទទួលបានការចាប់អារម្មណ៍ខ្លាំងជាង។
ជំនួបនៅទឹកដី Leipzig យប់មិញ ភ្ញៀវ Shakhtar បានបើកការនាំមុខក្នុងនាទី១៦ដោយខ្សែប្រយុទ្ធជម្រើសជាតិអ៊ុយក្រែន Marian Shved។ ក្រោយកែបាល់វគ្គទី២បាន១២នាទី Leipzig បានតាមស្មើវិញដោយ Mohamed Simakan។ តែ១នាទីបន្ទាប់ ហ្គេមគឺជារបស់ Shakhtar ផ្ដាច់មុខ ដោយ Marian Shved បើកការនាំមុខជាថ្មីសម្រាប់ក្រុមមកពីអ៊ុយក្រែន ក្នុងនាទី៥៨ រួចហើយ Mykhaylo Mudryk និង Lassina Traore ស៊ុតម្នាក់១គ្រាប់ទៀតក្នុងនាទី៧៦និង៨៥ ដើម្បីធានាជ័យជម្នះ៤-១។
៣ពិន្ទុនិងស៊ុតចូល៤គ្រាប់ពីប្រកួតដំបូងនេះគឺជាសមិទ្ធផលប្រសើរជាងរដូវកាលមុនរួចបាត់ទៅហើយសម្រាប់ Shakhtar ដ្បិតមួយចប់វគ្គចែកពូល UCL ២០២១-២២កន្លងទៅ Shakhtar រកបានតែ២ពិន្ទុនិងស៊ុតចូលគូប្រកួតសរុបតែ២គ្រាប់ប៉ុណ្ណោះ។
ប្រធានក្រុម Shakhtar កីឡាករ Taras Stepanenko បានិយាយថាលទ្ធផលរាត្រីនេះគឺហួសពីការស្រមើស្រមៃដ៏រវើរវាយបំផុតរបស់គេទៅទៀតដែលក្រុមរបស់គេអាចរកបានដល់ទៅ៤គ្រាប់ក្នុងការប្រកួតកម្រិតនេះ។ Taras Stepanenko បន្ថែមថាគេនៅជាមួយ Shakhtar ជាង១ទសវត្សរ៍ហើយ ហើយនេះគឺជាក្រុម Shakhtar ថ្មីដែលសម្បូរដោយកីឡាករក្មេងៗដុះដាលចេញពីថ្នាល Shakhtar ផ្ទាល់ ដូច្នេះពួកគេមានស្មារតី Shakhtar ដែលជួយយ៉ាងច្រើនដល់ក្រុម។ ក្រុមរបស់គេពិតជាលេងបានល្អក្នុងប្រកួតនេះនិងសមនឹងទទួលបានលទ្ធផលដូច្នេះ។
សូមជម្រាបផងដែរថា Shakhtar Donetsk មិនអាចប្រកួតនៅផ្ទះរបស់ខ្លួនបានតាំងពីឆ្នាំ២០១៤មកម្ល៉េះដោយសារបញ្ហាសង្គ្រាមក្នុងប្រទេស ហើយក្នុងរដូវក្ដៅ២០២២នេះ កីឡាករសំខាន់ៗមួយចំនួនបានចាកចេញដូចជា David Neres, Dodo និង Marlon Solomon ជាដើម។ កាលពីខែកក្កដាកន្លងទៅ Shakhtar បានទាមទារសំណងខូចខាតចំនួន៥០លានអឺរ៉ូពី FIFA សម្រាប់ការបាត់បង់ប្រាក់តម្លៃផ្ទេរ បន្ទាប់ពី FIFA បានសម្រេចឱ្យកីឡាករបរទេសដែលលេងនៅលីគអ៊ុយក្រែន អាចព្យួរកិច្ចសន្យារបស់ពួកគេបាន បន្ទាប់ពីការចូលឈ្លានពានដោយរុស្ស៊ី៕
