ក្លិបបាល់ទាត់ Manchester City បញ្ជាក់ថាម្ចាស់ឯតទគ្គកម្មគ្រាប់បាល់ច្រើនបំផុតក្នុងប្រវត្តិសាស្ត្ររបស់ខ្លួនគឺខ្សែប្រយុទ្ធ Sergio Aguero នឹងចាកចេញពីក្លិបនៅដំណាច់រដូវកាល២០២០-២១នេះ។
កិច្ចសន្យារបស់តារាឆ្នើមអាហ្សង់ទីនវ័យ៣២ឆ្នាំជាមួយ Man City អស់សុពលភាពនៅដំណាច់រដូវកាលនេះ ហើយកិច្ចសន្យាថ្មីនឹងមិនកើតមានឡើយ។
Aguero បានផ្ទេរពី Atletico Madrid មក Man City ក្នុងឆ្នាំ២០១១។ មកទល់ពេលនេះ អតីតកូនប្រសារលោក Diego Maradona ខាងលើ រកបាន២៥៧គ្រាប់សម្រាប់ក្លិបមេឃខៀវពីការបង្ហាញខ្លួន៣៨៤លើក។
Man City នឹងធ្វើរូបសំណាក Aguero នៅកីឡដ្ឋាន Etihad រួមជាមួយអតីតប្រធានក្រុម Vincent Kompany និងខ្សែបម្រើដ៏មានឥទ្ធិពល David Silva ដែលបានចាកចេញពីក្លិបក្នុងឆ្នាំ២០១៩និង២០២០ជាបន្តបន្ទាប់។
អ្នកទាំង៣នេះបានដើរតួនាទីចម្បងជាងគេក្នុងការកសាង Man City ឱ្យក្លាយជាក្រុមខ្លាំងមួយមកទល់បច្ចុប្បន្ន។ ក្នុងនោះ Aguero បានស៊ុតចូលគ្រាប់ជ័យជម្នះក្នុងម៉ោងបន្ថែមទល់ QPR ក្នុងឆ្នាំ២០១២ ជួយ Man City ឈ្នះជើងឯកលីគកំពូលអង់គ្លេសជាលើកដំបូងក្នុងពេល៤៤ឆ្នាំ។
បន្ទាប់ពីនោះមក Aguero បានជួយ Man City ឈ្នះ Premier League ៣ដងផ្សេងទៀត, FA Cup ១ដង និង League Cup ៥ដង។
Aguero ជាកីឡាកររកបានគ្រាប់បាល់ច្រើនបំផុតទី៤ក្នុងប្រវត្តិសាស្ត្រ Premier League (១៨១គ្រាប់មកទល់ថ្ងៃ៣០មីនានេះ) នៅក្រោម Alan Shearer (២៦០គ្រាប់), Wayne Rooney (២០៨គ្រាប់) និង Andrew Cole (១៨៧គ្រាប់)។
ប៉ុន្តែបើធៀបចំនួនគ្រាប់ទៅនឹងចំនួនប្រកួត Aguero មានស្ថិតិប្រសើរជាងគេក្នុងលីគកំពូលអង់គ្លេសតាំងពីឆ្នាំ១៩៩២មក៖
គ្រាប់បាល់ដែល Aguero រកបានក្នុងរដូវកាលនីមួយៗនៅ Man City ៖
ពេលនេះមានក្លិបធំៗមួយចំនួនត្រូវបានរាយការណ៍ថាចាប់អារម្មណ៍ Aguero ក្នុងនោះមានដូចជា Barcelona, Paris St Germain, Juventus និង Inter Milan។ Chelsea ក៏ត្រូវបានរាយការណ៍ថាកំពុងតាមដានមើលស្ថានភាពដែរ ប្រសិន Aguero ចង់លេង Premier League បន្តទៀត ពួកគេនឹងចូលខ្លួនប្រជែងយកខ្សែប្រយុទ្ធរូបនេះ៕
