ក្រសួងវប្បធម៌ កីឡា និង ទេសចរណ៍ នៃប្រទេសវៀតណាម បានប្រកាសអំពីទីតាំងសម្រាប់ទទួលការប្រកួតកីឡាស៊ីហ្គេមលើកទី៣១រួចរាល់ហើយ។
ស៊ីហ្គេមលើកទី៣១នឹងចាប់ផ្ដើមពីថ្ងៃទី២១ខែវិច្ឆិការហូតដល់ថ្ងៃទី២ខែធ្នូឆ្នាំ២០២១ ដោយហាណូយជាទីតាំងចម្បងសម្រាប់រៀបចំការប្រកួត អមដោយទីតាំងមួយចំនួនទៀតដូចជា Quang Ninh, Phu Tho, Ha Nam ដែលនឹងទទួលការប្រកួត៤០ប្រភេទកីឡា ស្មើនឹង៥២០វិញ្ញាសា។
ពហុកីឡដ្ឋានជាតិ My Dinh នៅហាណូយនឹងទទួលការប្រកួតបាល់ទាត់និងរត់ប្រណាំងបណ្ដាក់ ស្របពេលកីឡដ្ឋាន Quan Ngua នឹងទទួលការប្រកួតកាយសម្ព័ន្ធ។
មជ្ឈមណ្ឌលជាតិហ្វឹកហ្វឺននិងប្រកួតកីឡាហាណូយនឹងជាទីតាំងសម្រាប់ប្រកួតបាញ់កាំភ្លើង បាញ់ធ្នូ លើកទម្ងន់ អត្តពលកម្ម និង ប៉េតង់។
វិញ្ញាសាតេក្វាន់ដូនឹងធ្វើនៅសាលប្រកួតតាយហូ (Tay Ho) ខណៈវិញ្ញាសាគុនដាវធ្វើនៅអគារកីឡាក្នុងសាលហាណូយ, យូដូនិងគូរ៉ាស(kurash)ធ្វើនៅសាល Hoai Duc, វូស៊ូធ្វើនៅសាល Cau Giay, បញ្ចសិលាធ្វើនៅសាល Bac Tu Liem, ចំបាប់ធ្វើនៅសាល Gia Lam, វ៉ូវីណាមធ្វើនៅសាល Soc Son, កីឡារាំធ្វើនៅសាល Long Bien, ជឺជីតស៊ូធ្វើនៅសាល Dan Phuong។
កីឡាប៊ូលីងធ្វើនៅ Royal City Hanoi និងកីឡាអេឡិចត្រូនិច (E-Sports) ធ្វើនៅសាលសន្និបាតជាតិ។
ខេត្ត Hoa Binh នឹងទទួលការប្រកួតប្រណាំងកង់លើថ្នល់និងកង់ភ្នំ ចំណែកខេត្ត Bac Ninh នឹងទទួលការប្រកួតប្រដាល់សកល, ឃីកបុកស៊ីង, វាយកូនបាល់, បាល់ដៃ (handball) និងការ៉ាតេ។
ប្រដាល់សេរី(មួយ, គុនខ្មែរ…), វាយកូនហ្គោល, ទ្រីយ៉ាត្លុង, ឌុយយ៉ាត្លុង នឹងធ្វើនៅ Vinh Phuc ស្របពេលបាល់ទាត់នារី, បាល់ទះ, បាល់ដៃលើខ្សាច់, អុក នឹងធ្វើនៅ Quang Ninh។
ការប្រកួតប្រណាំងទូក ទូកកានូ កាយ៉ាក នឹងធ្វើនៅ Hai Phong, វាយកូនឃ្លីលើតុង ធ្វើនៅខេត្ត Hai Duong និងវាយសីធ្វើនៅខេត្ត Bac Giang។
បាល់ទាត់បុរសធ្វើនៅពហុកីឡដ្ឋានជាតិ My Dinh នៅហាណូយ, ខេត្ត Nam Dinh និងខេត្ត Phu Tho។ រីឯបាល់ទាត់ក្នុងសាលបុរសនឹងធ្វើនៅខេត្ត Ha Nam។
កីឡាដទៃទៀតនឹងធ្វើនៅវិមានកីឡាក្នុងទឹក My Dinh, សាល Thanh Tri, សាល Hoang Mai និងសាល Ha Dong។
សូមជម្រាបថា នេះជាលើកទី២ដែលវៀតណាមធ្វើជាម្ចាស់ផ្ទះស៊ីហ្គេម បន្ទាប់ពីពួកគេធ្វើម្ចាស់ផ្ទះលើកដំបូងក្នុងឆ្នាំ២០០៣៕
