ខ្សែប្រយុទ្ធឆ្នើម Robert Lewandowski នឹងត្រូវសម្រាករយៈពេល១ខែដោយសារហើមសរសៃជង្គង់ស្ដាំ។ មានន័យថាគេនឹងខកខានការប្រកួត Champions League វគ្គ៨ក្រុមចុងក្រោយសម្រាប់ Bayern Munich ទល់នឹង Paris St Germain ខណៈការជម្រុះ World Cup របស់ប៉ូឡូញទល់នឹងអង់គ្លេសយប់ថ្ងៃពុធនេះគេបានដកខ្លួនរួចទៅហើយ។
Lewandowski បានរងរបួសកាលថ្ងៃអាទិត្យទី២៨ខែមីនា ពេលប៉ូឡូញឈ្នះអង់ដូរ៉ា ៣-០ ក្នុងប្រកួតជម្រុះ World Cup 2022 ដែលកីឡាករវ័យ៣២ឆ្នាំរូបនេះរកបាន២គ្រាប់ម្នាក់ឯង។
Bayern នឹងប្រកួត Bundesliga ទល់ RB Leipzig ថ្ងៃសៅរ៍ចុងសប្ដាហ៍នេះ។ ៤ថ្ងៃបន្ទាប់ ពួកគេប៉ះ PSG ក្នុងជើងទី១វគ្គ១/៤ UCL មុនលេងជើងទី២នៅបារាំងថ្ងៃទី១៣ខែមេសា។
បើ Bayern ឈ្នះ PSG ហើយឡើងទៅវគ្គពាក់កណ្ដាលផ្ដាច់ព្រ័ត្រ UCL របួស១ខែខាងលើអាចឱ្យ Lewandowski ខកខានជើងទី១វគ្គ៤ក្រុមចុងក្រោយថែមទៀត ដ្បិតវគ្គពាក់កណ្ដាលផ្ដាច់ព្រ័ត្រ UCL នឹងធ្វើនៅថ្ងៃ២៧-២៨មេសា និង៤-៥ឧសភា៕
