ប្រជាពលរដ្ឋរងគ្រោះដោយខ្យល់កន្ត្រាក់ជិត១០០គ្រួសារ នៅខេត្តព្រះវិហារ បានទទួលអំណោយសប្បុរសធម៌ពីកាកបាទក្រហមកម្ពុជា
ព្រះវិហារ៖ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តព្រះវិហារ ឯកឧត្តម គីម រិទ្ធី និងមន្រ្តីក្រុមការងារនាំយកអំណោយកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានទៅផ្តល់ជូនប្រជាពលរដ្ឋរងគ្រោះដោយសារខ្យល់កន្ត្រាក់៩៩គ្រួសារនៅឃុំខ្យង ឃុំតស៊ូ ស្រុកជ័យសែន ខេត្តព្រះវិហារ។
អំណោយដែលផ្តល់ជូនកាលពីថ្ងៃទី២៨ ខែមេសា ឆ្នាំ២០២៥ មាន អង្ករ មី ត្រីខ ទឹកស៊ីអ៊ីវ ឃីតមួយកញ្ចប់ និងថវិកា មួយចំនួន។ដោយឡែកប្រជាពលរដ្ឋដែលរលំផ្ទះទាំងស្រុងចំនួន ១១គ្រួសារ បានទទួលតង់កៅស៊ូមួយបន្ថែមទៀត។
ក្នុងឱកាសនេះឯកឧត្តមអភិបាលខេត្តព្រះវិហារ បាននាំប្រសាសន៍ផ្តាំផ្ញើសាកសួរសុខទុក្ខពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះ បងប្អូនប្រជាពលរដ្ឋទាំងអស់ ដោយក្តីនឹកលឹក និងបានសម្តែង នូវការសោកស្តាយយ៉ាងក្រៃលែង ចំពោះការបាត់បង់ជីវិត និងការខូចខាតទ្រព្យសម្បត្តិ រួមទាំងលំនៅឋានរបស់បងប្អូន ដែលបង្កឡើងដោយគ្រោះធម្មជាតិខ្យល់កន្ត្រាក់ និងផ្គររន្ទះ កាលពីពេលថ្មីៗកន្លងទៅនេះ។
នៅក្នុងឱកាសនេះដែរឯកឧត្តម គីម រិទ្ធី បានដឹកនាំក្រុមការងារចុះពិនិត្យទីតាំងផ្ទាល់ ដល់លំនៅឋានប្រជាពលរដ្ឋ ដែលរងការខូចខាតធ្ងន់ធ្ងរ នៅក្នុងឃុំខ្យង និងឃុំតស៊ូ។ តាមរយៈការចុះពិនិត្យនេះឯកឧត្តមអភិបាលខេត្ត បានណែនាំដល់អាជ្ញាធរភូមិ ឃុំ និងប្រជាពលរដ្ឋត្រូវចូលរួមអនុវត្តរូបភាព “មិត្តជួយមិត្ត” ពោលគឺក្នុងនាមជាអ្នកជិតខាង ត្រូវជួយគ្នាទៅវិញទៅមក ដូចជាជួយជាឈើ និងស័ង្កសី បន្តិចបន្តួច ឬជួយជាកម្លាំងពលកម្មដើម្បីធ្វើផ្ទះដែលខូចខាតឡើងវិញ៕
ដោយ៖ឡុង សំបូរ
