ថៃ៖ គណបក្សភឿថៃបានលេចមុខនៅក្នុងជំហរថ្មីដើម្បីបង្កើតរដ្ឋាភិបាលបន្ទាប់ពីសភាកាលពីថ្ងៃពុធបានច្រានចោល ឬមិនអនុញ្ញាតឱ្យ​លោក ​ភិថា លីមចារើនរ៉ាត់( Pita Limjaroenrat) នៃគណបក្សឆ្ពោះទៅមុខ ដាក់ស្នើបេក្ខភាពនាយករដ្ឋមន្ត្រីជាលើកទី២ ដោយសារតែវា​ផ្ទុយនឹងមាត្រា៤១នៃបទបញ្ជាផ្ទៃក្នុងរបស់សភា។

ការជជែកដេញដោលយ៉ាងតឹងសរសៃកអស់រយៈពេលជាង៧ម៉ោង អង្គប្រជុំបានបញ្ចប់ទៅ ទាំងមិនទាន់បាន​ឈានទៅដល់ការបោះឆ្នោត​ ជ្រើសរើស ឬមិនជ្រើសរើស លោក ​ភិថា ជានាយករដ្ឋមន្ត្រីផង។ ក្នុងចំណោម​សមាជិកសភា​ ៧១៥រូប ,សមាជិកចំនួន ៣៩៤សំឡេងបានយល់ស្របថា វាផ្ទុយពីបទបញ្ជាផ្ទៃក្នុងសភាមាត្រា៤១។ ក្នុងនោះ ​៣១២ សំឡេង យល់ថាមិនផ្ទុយ និង សំឡេង ៨ អនុប្បវាទ។ ស្របតាមលទ្ធផលនេះ ​ប្រធានសភាថៃ បានសម្រេចថា សភាទាំងពីរអង្គ មិនអនុញ្ញាតឱ្យ​លោក​ ភិថា ដាក់ស្នើបេក្ខភាពជាលើកទី២នោះទេ។

ទាក់ទិននឹងវិបត្តិនេះ គណបក្សភឿថៃ ដែលឈរលំដាប់ទី២ បន្ទាប់ពីគណបក្សឆ្ពោះទៅមុខ (MFP) នឹងត្រូវទទួលបន្ទុកក្នុងការបង្កើតរដ្ឋាភិបាលថ្មី។បច្ចុប្បន្នគ្រប់ក្រសែភ្នែកពីគ្រប់មជ្ឈដ្ឋាន កំពុងសម្លឹងមើលថាតើគណបក្សនេះនឹងនៅបន្តជាសម្ព័ន្ធមិត្តរបស់ MFP ក្រោមកិច្ចព្រមព្រៀងសម្ព័នបក្សដែលពួកគេបានចុះហត្ថលេខាឬអត់ ឬភឿថៃខ្លួនឯងនឹងស្វែងរកការបង្កើតបក្សសម្ព័នចម្រុះថ្មី ដោយមិនរាប់បញ្ចូលគណបក្សឆ្ពោះទៅមុខ។

គណបក្ស Bhumjaithai, គណបក្ស Palang Pracharath និងគណបក្ស Chartthaipattana ដែលជាបក្សមិនស្ថិតក្រោមសម្ព័ន្ធបក្សបច្ចុប្បន្ន និងជាបក្សដែលប្រឆាំងផែនការរបស់ MFP ក្នុងការធ្វើវិសោធនកម្មច្បាប់មាត្រាទី ១១២នៃក្រមព្រហ្មទណ្ឌ ដែលត្រូវបានគេស្គាល់ថាជាច្បាប់ប្រមាថព្រះមហាក្សត្រ។ បក្សទាំង៣នេះបានបញ្ជាក់យ៉ាងច្បាស់ថាពួកគេនឹងមិនចូលរួមជាមួយរដ្ឋាភិបាលណាមួយឡើយ ប្រសិនបើមានវត្តមានបក្ស MFP នៅទីនោះ។

បន្ទាប់ពីកិច្ចប្រជុំចប់ មេដឹកនាំបក្សភឿថៃ លោក Cholnan Srikaew បាននិយាយថា ភឿថៃនៅតែចាប់ដៃជាមួយសម្ព័ន្ធមិត្តផ្សេងទៀត។ ចំណែកអនុស្សរណៈសម្ព័ន្ធបក្ស (MoU) ត្រូវបានកែសម្រួល ឬយ៉ាងណា លោកមិនទាន់អាចផ្តល់ព័ត៌មានលម្អិតពេលនេះឡើយ ព្រោះថាសម្ព័ន្ធមិត្តទាំង៥ ចាំបាច់ត្រូវតែពិភាក្សាគ្នាជាមុនសិន។ លោក Cholnan បញ្ជាក់ថា៖ «យើង​ក៏​នឹង​ពិភាក្សា​ដែរ​ថា​តើនឹងនាំ​ភាគី​បន្ថែម​ទៀត​​ចូល​ឬ​អត់»។

ជាមួយគ្នានេះ ប្រធានសភាលោក Wan Muhamad Noor Matha បានកំណត់ពេលបោះឆ្នោតជ្រើសរើសនាយករដ្ឋមន្ត្រីថ្មីនៅថ្ងៃព្រហស្បតិ៍សប្តាហ៍ក្រោយ។

ក្រោយដើរចេញពីសភាកាលពីថ្ងៃពុធ លោក ភិថា  បាន​សរសេរលើ Instagram ថា៖ «ច្បាស់ណាស់ថា សំឡេងឆ្នោតរបស់ប្រជាជនគ្មានតម្លៃគ្រប់គ្រាន់ ដើម្បីអាចដឹកនាំប្រទេសជាតិបាននោះទេ»។ ជាមួយគ្នានេះលោក ភិថា បានបញ្ជាក់ដែរថា លោកនឹងមិនស្នើឈ្មោះលោក​ ជាលើកទី​៣​ទៀតទេ ដោយទុកឱ្យ​គណបក្សភឿថៃ ស្នើបេក្ខភាពម្តង»។

សម្រាប់គណបក្សភឿថៃ ត្រូវបានគេប៉ាន់ស្មានថា អាចនឹងស្នើឈ្មោះ លោក Srettha Thavisin មាន
វ័យ ៦០ឆ្នាំ ជាអ្នកជំនួញអចលនទ្រព្យ​ ឱ្យជាបេក្ខភាពនាយករដ្ឋមន្ត្រី៕

ប្រែសម្រួល៖ ស្រ៊ុន សិរីវឌ្ឍនៈ

ប្រភព៖ https://www.bangkokpost.com/thailand/politics/2614442/pheu-thai-primed-to-form-govt