សម្ដេចតេជោ ហ៊ុន សែន៖ យុទ្ធនាការឃោសនាបោះឆ្នោតមានដំណើរការល្អ ដោយគ្មានហិង្សាណាមួយកើតឡើង ទាំងហិង្សាកាយវិការ ឬពាក្យសម្តី
ភ្នំពេញ៖សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានបញ្ជាក់ឱ្យដឹងថា ការបោះឆ្នោតជ្រើសតាំងតំណាងរាស្រ្តនីតិកាលទី៧ នឹងចាប់ផ្តើមក្នុងពេលឆាប់ខាងមុខនេះ ខណៈដែលយុទ្ធនាការឃោសនាបោះឆ្នោតមានដំណើរការល្អដោយមិនមានឃើញហិង្សាណាមួយកើតឡើងនោះឡើយ។
សម្តេចតេជោបានលើកឡើងដូចនេះតាមរយៈកិច្ចសម្ភាសន៍ជាមួយទូរទស្សន៍ហុងកុង Phoenix TV ដែលត្រូវបានធ្វើការផ្សព្វផ្សាយកាលពីថ្ងៃទី១៩ ខែកក្កដា ដោយសម្ដេចតេជោ ហ៊ុន សែន បានមានប្រសាសន៍ថា ប្រជាជនកម្ពុជាមានភាពចាស់ទុំខាងនយោបាយអំពីដំណើរការប្រជាធិបតេយ្យ ដោយសម្ដេចសង្ឃឹមផងដែរថានឹងមានលទ្ធផលល្អ។
សម្ដេចតេជោនាយករដ្ឋមន្រ្តី ហ៊ុន សែន មានប្រសាសន៍ថា ៖ «មកដល់ពេលនេះ យើងនៅសល់តែប៉ុន្មានថ្ងៃទៀតការបោះឆ្នោតនឹងចាប់ផ្តើម ហើយនេះជាការបោះឆ្នោតមួយដ៏ល្អ ដែលមកដល់ពេលនេះមិនទាន់ឃើញមានហិង្សាណាមួយកើតឡើង ទោះបីជាហិង្សាកាយវិការ ឬជាពាក្យសម្តី»។
សម្ដេចបានបន្តថា ពិតហើយ មានប្រទេសខ្លះ ឬក្រុមខ្លះធ្វើការតិះទៀនចំពោះយើងខ្ញុំ តែយើងមិនខ្វល់ទេ អ្វីដែលជាបញ្ហាធំរបស់យើងគឺប្រជាជនទៅបោះឆ្នោត ស្របទៅតាមរដ្ឋធម្មនុញ្ញរបស់ខ្លួនគឺគ្រប់គ្រាន់ហើយ មិនចាំបាច់ឱ្យប្រទេសនេះ ប្រទេសនោះត្រូវទទួលស្គាល់ការបោះឆ្នោតរបស់ប្រទេសយើងខ្ញុំនោះទេ។
ការបោះឆ្នោតនៅក្នុងប្រទេសឯករាជ្យមួយ ប្រទេសដែលមានអធិបតេយ្យមួយ ត្រឹមតែប្រជាជនទទួលស្គាល់ និងចូលរួមការបោះឆ្នោតគឺគ្រប់គ្រាន់ដើម្បីកំណត់ឈ្នះហើយ។
ទាក់ទងនឹងការបោះឆ្នោតនេះដែរ ក្នុងជំនួបជាមួយគណៈប្រតិភូបេសកកកម្មសង្កេតការណ៍បោះឆ្នោតហ្វ្រង់កូហ្វូនី (MEF) នាថ្ងៃទី១៩ ខែកក្កដា សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានគូសបញ្ជាក់ថាការបោះឆ្នោតកន្លងមក ក៏មានការចូលរួមឃ្លាំមើលពីក្រុមអ្នកសង្កេតការណ៍ជាតិ និងអន្តរជាតិ និងអ្នកសារព័ត៌មាន ហើយសម្រាប់ការបោះឆ្នោតជាតិនៅឆ្នាំ២០២៣នេះ គិតមកដល់ថ្ងៃទី១៩ ខែកក្កដា ស្ថានភាពទូទៅក៏មានភាពល្អប្រសើរដែរ។
សម្ដេចក្រឡាហោម ស ខេង បានថ្លែងផងដែរពីការត្រៀមលក្ខណៈរបស់រាជរដ្ឋាភិបាលកម្ពុជា ក្នុងនោះក្រសួងមហាផ្ទៃក៏មានតួនាទីស្នូលក្នុងការថែរក្សាសន្តិសុខ សណ្ដាប់ធ្នាប់ បម្រើឱ្យដំណើរការបោះឆ្នោតនេះ។
តាមរយៈក្រសួងមហាផ្ទៃ លោក Desire NYARUHIRIRA ទីប្រឹក្សាពិសេសទទួលបន្ទុកកិច្ចការនយោបាយ និងការទូតនៃអគ្គលេខាធិការអង្គការអន្តរជាតិនិយាយភាសាបារាំង បានលើកឡើងថា នៅពេលប្រទេសសមាជិកក្រុមប្រទេសនិយាយភាសាបារាំងរៀបចំការបោះឆ្នោត អង្គការអន្តរជាតិហ្វ្រង់កូហ្វូនី តែងតែបានចាត់បញ្ជូនគណៈប្រតិភូចូលរូមសង្កេតការណ៍ និងបានជួបជាមួយបណ្ដាតួអង្គពាក់ព័ន្ធនឹងការបោះឆ្នោតនៅប្រទេសទាំងនោះ ហើយបេសកកម្មនេះគឺដើម្បីជួយពង្រឹងនីតិរដ្ឋ និងសន្តិភាព។
ដោយឡែកនៅថ្ងៃទី២១ ខែកក្កដា គណបក្សនយោបាយធំៗចំនួនបី នឹងធ្វើការហែក្បួនបិទយុទ្ធនាការឃោសនាបោះឆ្នោត ដែលមានអ្នកចូលរួមរហូតជាងបីម៉ឺននាក់ ក្នុងរាជរាជធានីភ្នំពេញ ដែលក្នុងនោះមានគណបក្សប្រជាជនកម្ពុជា គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ គណបក្សប្រជាជនកម្ពុជា នឹងរៀបចំជួបជុំសមាជិក សមាជិការបស់ខ្លួននៅតំបន់មជ្ឈមណ្ឌលសន្និបាត និងពិព័រណ៌កោះពេជ្រ ដើម្បីដង្ហែក្បួនឃោសនាដែលមានអ្នកចូលរួមចំនួន ៣០ ០០០នាក់ នឹងចាប់ហែក្បួនពីម៉ោង៧៖៣០នាទីព្រឹកទៅរហូតបិទបញ្ចប់។
ចំណែកគណបក្សហ្វ៊ុនស៊ិនប៉ិច នឹងរៀបចំជួបជុំសមាជិក សមាជិការបស់ខ្លួន លើចិញ្ចើមមហាវិថីសម្តេច ហ៊ុន សែន (ផ្លូវ៦០ម៉ែត្រ) ដោយមានអ្នកចូលរួមចំនួន ២ ៥០០ នាក់ ដោយចាប់ហែក្បួនពីម៉ោង៨ព្រឹកតទៅ។ រីឯគណបក្សខ្មែររួបរួមជាតិ នឹងរៀបចំជួបជុំសមាជិក សមាជិការបស់ខ្លួន ចំនួន១ ២០០ នាក់ នៅលើចិញ្ចើមផ្លូវមុខក្រសួងរៀបចំដែនដីនគរូបនីយកម្ម និងសំណង់ ដោយចាប់ហែក្បួនឃោសនាពីម៉ោង២រសៀលតទៅ។
តាមរយៈសេចក្តីជូនដំណឹងនេះ ឯកឧត្តម ឃួង ស្រេង អភិបាលរាជធានីភ្នំពេញ បានបញ្ជាក់ថា ក្នុងអំឡុងពេលបិទយុទ្ធនាការនេះ អាចមានចរាចរមមាញឹកជាខ្លាំងដោយសារមធ្យោបាយធ្វើដំណើររបស់សមាជិកសមាជិកាដែលបានចូលរួម។ ឯកឧត្តមបញ្ជាក់ថា ៖ «ដើម្បីចៀសវាងការកកស្ទះ រដ្ឋបាលរាជធានីភ្នំពេញនឹងធ្វើការបញ្ចៀសចរាចរចំពោះយានយន្តគ្រប់ប្រភេទនៅតាមទីតាំងជួបជុំរបស់គណបក្សនីមួយៗ និងតាមតម្រាយផ្លូវនានាដែលគណបក្សនយោបាយហែក្បួនឃោសនា នាថ្ងៃទី២១ ខែកក្កដា ចាប់ពីម៉ោង៥ព្រឹករហូតដល់ការដង្ហែក្បួនបានបញ្ចប់»៕
ដោយ៖ នាង សុគន្ធា
