ភ្នំពេញ៖ ក្នុងពិធីសម្ពោធដាក់ឱ្យប្រើប្រាស់ផ្លូវក្រវាត់ក្រុងទី៣ មានប្រវែងជិត៥៣គីឡូម៉ែត្រ នាព្រឹកថ្ងៃទី៣ ខែសីហា ឆ្នាំ២០២៣ សម្តេចតេជោ ហ៊ុន សែន បានថ្លែងថា តម្រូវការសាងសង់ហេដ្ឋារចនាសម្ព័ន្ធកើតឡើង ក៏ដោយសារជីវភាពប្រជាជនរីកចម្រើន បើជីវភាពប្រជាពលរដ្ឋមិនរីកចម្រើនទេ យើងក៏មិនមានតម្រូវការអភិវឌ្ឍហេដ្ឋារចនាសម្ព័ន្ធដែរ ។

សម្តេច មានប្រសាសន៍ថា ថ្ងៃនេះខ្ញុំរួមជាមួយឯកឧត្តម វ៉ាង វិនធៀន ឯកអគ្គរដ្ឋទូតសាធារណរដ្ឋប្រជាមានិតចិន បើកសម្ពោធដាក់ឲ្យប្រើប្រាស់ផ្លូវដ៏មានសារៈសំខាន់នេះ។ សម្តេច បន្តថា បើជីវភាពប្រជាជនមិនរីកចម្រើនទេគឺយើងមិនចាំបាច់ធ្វើផ្លូវ ធ្វើស្ពាននោះទេ ។

សម្តេចតេជោ ហ៊ុន សែន បានបន្តថា ក្រោយជោគជ័យនៃនយោបាយឈ្នះឈ្នះ បាននាំមកនូវការឯកភាពជាតិ ឯកភាពទឹកដី ការបង្រួបបង្រួមជាតិជាលើកដំបូងរបស់កម្ពុជា ធ្វើឲ្យប្រទេសជាតិមានការរីកចំរើន ។ ផ្តើមចេញពីការ រីកចម្រើននេះហើយដែល ធ្វើឲ្យយើងមានតម្រូវការកសាងហេដ្ឋារចនាសម្ព័ន្ធ។

សម្ដេចបញ្ជាក់ថា ផ្លូវមួយនេះ មានសារៈសំខាន់ខ្លាំងណាស់ ដែលបានតបភ្ជាប់ពីផ្លូវជាតិលេខ៥ ផ្លូវជាតិលេខ៤ ផ្លូវជាតិលេខ៣ ភ្ជាប់មកផ្លូវជាលេខ ១ និងតភ្ជាប់ផ្លូវល្បឿនលឿន ដែលយើងបានបើកការដ្ឋានកាលពីពេលមុន ។

សូមជម្រាបថា រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ធមុនីរ័ត្ន បាននិយាយកាលពីថ្ងៃទី២១មិថុនា ឆ្នាំ២០២៣ ថា កំណើនសេដ្ឋកិច្ចប្រចាំឆ្នាំរបស់កម្ពុជាក្នុងមនុស្សម្នាក់ ឬផលិតផលក្នុងស្រុកសរុបសម្រាប់មនុស្សម្នាក់ ត្រូវបានព្យាករណ៍ថា នឹងកើនឡើងដល់ ១,៩៣២ ដុល្លារ ក្នុងឆ្នាំ២០២៣ ពី ១,៧៨៤ ដុល្លារកាលពីឆ្នាំ២០២២ ទោះបីជាអតិផរណាមានទំនោរធ្លាក់ចុះចាប់តាំងពីដើមឆ្នាំ២០២៣។

បើយោងតាមរបាយការណ៍បូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា បានបង្ហាញថា អតិផរណា បន្តនិន្នាការថយចុះនៅឆមាសទី១ ឆ្នាំនេះ ជាចម្បងបណ្តាលមកពីការថយថ្លៃប្រេង និងការថយល្បឿន នៃការឡើងថ្លៃម្ហូបអាហារ ស្របពេលដែលអតិផរណាស្នូល មានកម្រិតទាប ។ ជាមួយគ្នានេះ ការពង្រឹងការប្រើប្រាស់ប្រាក់រៀល ឱ្យកាន់តែទូលំទូលាយនៅតែជាការងារចាំបាច់ ដើម្បីកាត់បន្ថយឥទ្ធិពល ពីកត្តាខាងក្រៅមកលើកម្រិតថ្លៃនៅកម្ពុជា ៕
អត្ថបទ៖ វណ្ណលុក
រូបភាព៖ វ៉េង លីមហួត និង សួង ពិសិដ្ឋ