ថៃ៖ ការពន្យាពេលការបោះឆ្នោតជ្រើសរើសនាយករដ្ឋមន្ត្រីថ្មីម្តងហើយម្តងទៀតបានធ្វើឱ្យថៃ កាន់តែកប់ជ្រៅក្នុងភាពមិនប្រាកដប្រជាផ្នែកនយោបាយនិងធ្វើឱ្យរដ្ឋាភិបាលចម្រុះថ្មីដែលគ្រោងនឹងបង្កើតឡើងដោយគណបក្សភឿថៃ ស្ថិតក្នុងភាពមិនប្រាកដប្រជាដូចគ្នា។

តាមការគ្រោងទុក ការបោះឆ្នោតជ្រើសរើសមេដឹកនាំថ្មីត្រូវធ្វើឡើងនៅថ្ងៃសុក្រទី៤សីហា នេះ ក៏ប៉ុន្តែត្រូវបានលុបចោលវិញភ្លាមៗដោយប្រធានសភា លោក មូហាម៉ាត់ ណរ ម៉ៈថា គឺដោយសារតែ​រង់ចាំ​ការសម្រេច​របស់​តុលាការ​ធម្មនុញ្ញ​ថៃ ជុំវិញពាក្យបណ្តឹង ​របស់​អ្នកគាំទ្រ​គណបក្ស​ឆ្ពោះទៅមុខ (MFP) ដែលចង់ឱ្យតុលាការធម្មនុញ្ញ​វិនិច្ឆ័យ ក្នុងរឿងដែល​សភាថៃបោះឆ្នោត ប្រឆាំង​បេក្ខភាពនាយករដ្ឋមន្រ្តីថៃ​របស់​លោក​ភិថា កាលពីថ្ងៃទី ១៩​ខែកក្កដា។

បើយោងតាមកាសែតបាងកកប៉ុស្តិ៍ ប្រភពមួយនៅតុលាការធម្មនុញ្ញ បានឱ្យដឹងថា មូលហេតុដែលតុលាការ ពន្យារពេលការសម្រេចរបស់ខ្លួន គឺដោយសារតែពាក្យបណ្តឹងនេះខ្វះព័ត៌មានសំខាន់ៗដែលជាមូលដ្ឋានសម្រាប់ការពិចារណារបស់ខ្លួន។

ការលើកពេលការបោះឆ្នោតនេះដែរ បានបង្ខំឱ្យគណបក្សភឿថៃលុបចោលគម្រោង បង្ហាញផែនការលម្អិតរួមរបស់ខ្លួន ជាមួយក្រុមរដ្ឋាភិបាលចម្រុះដែលខ្លួនដឹកនាំបង្កើត។ ហើយភាពមិនប្រាកដប្រជានេះ ក៏បង្ខំឱ្យអតីត​នាយក​រដ្ឋមន្ត្រី​ភាស​ខ្លួន​លោក ថាក់ស៊ីន ស៊ីណាវ៉ាត្រា ​លុប​ចោល​គម្រោងមាតុភូមិនិវត្តន៍របស់ខ្លួន​ដែលគ្រោងធ្វើឡើងនៅ​ថ្ងៃ​ទី ១០ ខែ​សីហា ផងដែរ។

ការវិវត្តន៍ចុងក្រោយបង្អស់នៃវិបត្តិនយោបាយថៃនេះបានធ្វើឱ្យ ក្នុងចំណោមអ្នកវិភាគនយោបាយ និងសាធារណជន មានការងឿងឆ្ងល់ ថាតើគណបក្សភឿថៃ អាចនឹងបង្កើតរដ្ឋាភិបាលថ្មីដោយជោគជ័យឬក៏យ៉ាងណា។

លោក Wanwichit Boonprong សាស្ត្រាចារ្យវិទ្យាសាស្ត្រនយោបាយនៅសាកលវិទ្យាល័យ Rangsit បាននិយាយថា ការពន្យារពេលបោះឆ្នោតនឹងជះឥទ្ធិពលអាក្រក់ដល់ភឿថៃ និងលោក ស្រេតថា ដែលជាបេក្ខជននាយករដ្ឋមន្ត្រីថ្មី។ ខណៈមជ្ឈដ្ឋានខ្លះ ជឿថា កាលៈទេសៈនេះក៏អាចនាំឱ្យមានបេក្ខជននាយករដ្ឋមន្ត្រីថ្មីមកពីគណៈបក្សផ្សេងបន្តបន្ទាប់ទៀត ជំនួស លោក ស្រេថា ថាវីស៊ីន ដែលជាបេក្ខជននាយករដ្ឋមន្ត្រីនៃគណបក្សភឿថៃ។

ក្រោយការលើកពេលបោះឆ្នោតរបស់សភា អនុប្រធានគណបក្សភឿថៃ លោក Phumtham Wechayachai បាននិយាយថា គណបក្សក៏នឹងពន្យារពេលប្រកាសបង្កើតរដ្ឋាភិបាលថ្មីផងដែរ៕

ដោយៈ ស្រ៊ុន សិរីវឌ្ឍនៈ

ប្រភព៖ https://www.bangkokpost.com/thailand/politics/2623073/pheu-thai-suffers-pm-vote-delay