សមាគមសម្ព័ន្ធសហគមន៍កសិករកម្ពុជា បង្កើតសៀវភៅមូលដ្ឋានគ្រឹះកិច្ចគាំពារសង្គមក្នុងវិស័យកសិ-ស្បៀងអាហារ
ភ្នំពេញ៖ សមាគមសម្ព័ន្ធសហគមន៍កសិករកម្ពុជា (CCFC) បាននឹងកំពុងចងក្រងសៀវភៅ «មូលដ្ឋានគ្រឹះកិច្ចគាំពារសង្គមក្នុងវិស័យកសិ-ស្បៀងអាហារ» សម្រាប់ជាផែនទីចង្អុលផ្លូវមួយដល់អ្នកធ្វើការងារចងក្រងសហគមន៍ ពិសេសដល់កសិករដែលធ្វើការងារពាក់ព័ន្ធនឹងវិស័យស្បៀងអាហារអាចប្រើប្រាស់សម្រាប់ជំរុញដល់រដ្ឋាភិបាលឱ្យយកចិត្តទុកដាក់ និងលើកកម្ពស់វិស័យស្បៀងអាហារនៅកម្ពុជា។
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជាប្រាប់ឱ្យដឹងនៅថ្ងៃទី១៣ ខែសីហាថា សៀវភៅនេះ នឹងរួមចំណែកជំរុញដល់រដ្ឋាភិបាលឱ្យគិតគូរ និងយកចិត្តទុកដាក់បញ្ចូលកសិករខ្នាតតូចក្នុងវិស័យស្បៀងអាហារ ក្នុងប្រទេសកម្ពុជាឱ្យទទួលបាននូវប្រព័ន្ធការពារសង្គម និងអត្ថប្រយោជន៍ផ្សេងៗទៀត ដូចកម្មករ កម្មករិនីកាត់ដេរផងដែរ។
លោកបន្តថា នៅកម្ពុជា ភាគច្រើននៃកសិករជាអ្នកផលិតស្បៀង មិនបានយល់ដឹងស៊ីជម្រៅពីវិស័យស្បៀង និងផលប៉ះពាល់នៃសុខភាព រួមជាមួយនឹងការថែទាំសុខភាពច្រើននោះទេ។
លោក ថេង សាវឿន បានរំលេចថា ៖ «សម្រាប់ថេរវេលានៃការចងក្រងសៀវភៅនេះ គឺយើងចាប់ផ្តើម សរសេរពីចុងឆ្នាំ២០២២ ហើយយើងគ្រោងបញ្ចប់ និងផ្សព្វផ្សាយសៀវភៅគាំពារសង្គមក្នុងវិស័យកសិ-ស្បៀងអាហារនេះ នៅក្នុងខែតុលា ឆ្នាំ២០២៣នេះ។ សម្រាប់ការគាំទ្រឧត្ថម្ភសៀវភៅនេះ យើងទទួលបានមូលនិធិពីរាជរដ្ឋាភិបាលប៊ែលហ្សិកតាមរយៈអង្គការអុកស្វាមប្រចាំកម្ពុជា»។
សមាគមសម្ព័ន្ធសហគមន៍កសិករកម្ពុជា បានរៀបចំវគ្គសិក្ខាសាលាមួយស្តីពី ការពង្រឹងសមត្ថភាព និងចងក្រងសៀវភៅ «មូលដ្ឋានគ្រឹះកិច្ចគាំពារសង្គមក្នុងវិស័យកសិ-ស្បៀងអាហារ» រយៈពេលពីរថ្ងៃកាលពីថ្ងៃទី៩ ដល់ថ្ងៃទី១០ ខែសីហា កន្លងទៅនេះដល់បុគ្គលិកទាំងអស់របស់មាគម ដើម្បីបង្កើនការយល់ដឹងពីរបៀបរៀបចំតាក់តែងចងក្រងសៀវភៅមូលដ្ឋានគ្រឹះកិច្ចគាំពារសង្គមក្នុងវិស័យកសិ-ស្បៀងអាហារ តាមរយ:ការពង្រីកវិសាលភាព និងចំណេះដឹងពីយន្តការជំរុញឱ្យមានកិច្ចគាំពារសង្គមប្រកបដោយបរិយាបន្ន។
កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានប្រាប់ឱ្យដឹងនៅថ្ងៃទី១៣ ខែសីហា ផងដែរ ដោយកញ្ញាថា ក្រសួងគាំទ្រចំពោះការចងក្រងសៀវភៅ «មូលដ្ឋានគ្រឹះកិច្ចគាំពារសង្គមក្នុងវិស័យកសិ-ស្បៀងអាហារ» នេះ ព្រោះវាជារឿងល្អ និងជារួមចំណែកមួយរបស់អង្គការសង្គមស៊ីវិល នៅក្នុងការជួយគាំទ្រដល់ប្រជាកសិករ សម្រាប់ការចងក្រងជាសហគមន៍នេះ។
កញ្ញាបានប្រាប់ថា ការចងក្រងជាសហគមន៍កសិករ គឺជារឿងដែលក្រសួងកសិកម្ម រុក្ខាប្រមាញ់ និងនេសាទ បានយកចិត្តដាក់ និងលើកទឺកចិត្តឱ្យមានការចងក្រងជាសហគមន៍ឱ្យបានច្រើន ព្រោះការចងក្រងសហគមន៍នេះ អនុញ្ញាតឱ្យប្រជាកសិករមានឱកាសឈានទៅទទួលបាននូវចំណេះដឹង និងបច្ចេកទេសក្នុងការធ្វើកសិកម្ម ជាពិសេសគឺធ្វើឱ្យកសិករ មានអំណាចក្នុងការតថ្លៃជាមួយឈ្មួញ និងអាជីវករនៅក្នុងទីផ្សារដោយផ្ទាល់ផងដែរ។
កញ្ញា អ៊ឹម រចនា បញ្ជាក់ថា ៖ «នៅក្នុងអាណត្តិថ្មីនេះ ការចងក្រងជាសហគមន៍កសិករ គឺជាគោលនយោបាយអាទិភាពមួយដែលក្រសួងដាក់ចេញ និងជំរុញសម្រេចឱ្យបានកាន់តែល្អប្រសើរ នៅក្នុងអាណត្តិនេះ» ។
យោងតាមសមាគមសម្ព័ន្ធសហគមន៍កសិករកម្ពុជា បានលើកឡើងដែរថា ការប្រមូលចងក្រងសៀវភៅនេះ គឺជាការប្រមូលនូវបទពិសោធន៍បច្ចេកទេស ការណែនាំពីវិធីសាស្រ្តរៀបចំផែនការចងក្រង និងកំណត់ក្រុមគោលដៅស្រ្តីក្នុងវិស័យកសិ-ស្បៀងអាហារ ដោយឱ្យប្រជាកសិករទទួលបានប្រយោជន៍នៃគោលនយោបាយ និងច្បាប់គាំពារសង្គមរបស់រាជរដ្ឋាភិបាលផងដែរ។
ប្រភពដដែលបន្តថា ដើម្បីជាការឆ្លុះបញ្ចាំងកត្តាខាងក្នុង និងខាងក្រៅដែលបានរួមចំណែកដល់ភាពជោគជ័យ ឧបសគ្គ កត្តាប្រឈមហានិភ័យ នៃការចងក្រង និងដាក់បញ្ចូលធាតុចូលសំខាន់ៗនៃយន្តការគន្លឹះអាទិភាពរបស់សមាគមក្នុងការឆ្លើយតបការអភិវឌ្ឍន៍ស្ថាប័នប្រកបដោយអភិបាលកិច្ច។
សមាគមសម្ព័ន្ធសហគមន៍កសិករកម្ពុជា បញ្ជាក់ទៀតថា ៖ «ការរពង្រីកប្រព័ន្ធគាំពារសង្គម គឺជាគោលដៅមួយក្នុងចំណោមគោលដៅដើម្បីបញ្ចប់ភាពក្រីក្រក្រោមគោលនយោបាយក្របខ័ណ្ឌកិច្ចគាំពារសង្គមរបស់ប្រទេសកម្ពុជាឆ្នាំ២០២៥»៕ដោយ៖គឹម យុត្ថារ៉ូ
