ភ្នំពេញ៖ក្រសួងមហាផ្ទៃបានចេញសេចក្តីប្រកាសស្តីពីការ​បង្កើត និងដាក់ឱ្យប្រើប្រាស់នូវនិមិត្តសញ្ញារដ្ឋបាលក្រុង និងស្រុកទាំង៩ នៃខេត្តកំពង់ស្ពឺ។ នេះបើតាមសេចក្តីប្រកាសរបស់ក្រសួងមហាផ្ទៃដែលផ្សាយចេញកាលថ្ងៃទី២២ ខែសីហា ឆ្នាំ២០២៣។

​ក្រសួងមហាផ្ទៃបានលើកឡើង​​ថា និមិត្តសញ្ញារដ្ឋបាលក្រុង និងស្រុកទាំងប្រាំបួន នៃខេត្តកំពង់ស្ពឺ រួមមាន៖ រដ្ឋបាលក្រុងច្បារមន, រដ្ឋបាលស្រុកសាមគ្គីមុនីជ័យ,​ រដ្ឋបាលក្រុងឧដុង្គម៉ែជ័យ, រដ្ឋបាលស្រុកថ្ពង, រដ្ឋបាលស្រុកភ្នំស្រួច, រដ្ឋបាលស្រុកគង់ពិសី, រដ្ឋបាលស្រុកឪរ៉ាល់, ​រដ្ឋបាលស្រុកសំរោងទង និងរដ្ឋបាលស្រុកបរសេដ្ឋ។

ប្រភពដដែលបានបញ្ជាក់ថា សម្រាប់​រដ្ឋបាលក្រុងច្បារមន មាននិមិត្តសញ្ញារាងមូល មានរូបស្លឹកពោធិ៍ប ញ្ឈរ ។ចំណែក​រដ្ឋបាលក្រុងឧដុង្គម៉ែជ័យ មាននិមិត្តសញ្ញាមានរាងមូលព័ទ្ធដោយខ្សែវ័ណ្ឌពីរជាន់។ ​

រដ្ឋបាលស្រុកសាមគ្គីមុនីជ័យ​ មាននិមិត្តសញ្ញារាងមូល ព័ទ្ធដោយខ្សែវ័ណ្ឌមួយជាន់ បង្ហាញពីការគ្រប់​គ្រ​ងដែនដីរបស់រដ្ឋបាលក្រុង មានបុរសមួយរូបស្លៀកខោពណ៌ក្រហមក្រមៅកូរស្ករត្នោត ជាតំណាងនៃការប្រ​កបរបរស្ករត្នោត របស់ប្រជាជន ចាប់តាំងពីសម័យដើមរហូតដល់បច្ចុប្បន្ន។ ​

ចំណែករដ្ឋបាលស្រុកថ្ពង មាននិមិត្តសញ្ញារាងមូល ព័ទ្ធដោយខ្សែវ័ណ្ឌពណ៌ខៀវមួយជាន់ បង្ហាញពីការគ្រប់គ្រងដែនដីរបស់រដ្ឋបាលក្រុង មានសត្វទន្សោងមួយក្បាលឈរជាតំណាង មានភ្នំគ្របដណ្តប់ដោយព្រៃឈើខៀវស្រស់បំព្រង ដែលជាជម្រកសត្វព្រៃ និងជាតំបន់ទេសចរណ៍ មានផ្ទៃទឹកជាតំណាងនៃប្រព័ន្ធធារាសាស្ត្រសម្រាប់អាងទំនប់អន្លង់ជ្រៃ។ ​

រដ្ឋបាលស្រុកភ្នំស្រួច មាននិមិត្តសញ្ញារាងមូល ព័ទ្ធដោយខ្សែវ័ណ្ឌពណ៌ខៀវមួយជាន់ មានភ្នំគីរីរម្យ មានរង្វង់មូលនាគព័ន្ធ មានដើមស្រល់ប្រាំដើម មានវាលស្មៅខៀវខ្ចី ​រីឯ​រដ្ឋបាលស្រុកគង់ពិសី មាន​និមិត្តសញ្ញាមានរាងមូលព័ទ្ធដោយខ្សែវ័ណ្ឌពណ៌ខៀវមួយជាន់ ​មានរូបសម្តេច ជួន ណាត អង្គុយលើបល្ល័ង្ភពណ៌មាស ​។

រដ្ឋបាលស្រុកឪរ៉ាល់ មាន​និមិត្តសញ្ញាមានរាងមូលព័ទ្ធដោយខ្សែវ័ណ្ឌពណ៌ខៀវមួយជាន់ បង្ហាញ​ពីការគ្រប់គ្រងដែនដីរបស់រដ្ឋបាលក្រុង មានរូបភ្នំឪរ៉ាល់ និងអក្សររដ្ឋបាលស្រុកឪរ៉ាល់ មានពណ៌ស រំលេចក្នុងខ្សែបូពណ៌ក្រហម។

សម្រាប់​រដ្ឋបាលស្រុកសំរោងទង មាន​និមិត្តសញ្ញាមានរាងមូលព័ទ្ធដោយខ្សែវ័ណ្ឌពណ៌ខៀវមួយជាន់ ​មា​នរូបតេជោមាសជិះសេះមានដាវអាជ្ញាសឹក ​និងរដ្ឋបាលស្រុកបរសេដ្ឋ មាន​និមិត្តសញ្ញាមានរាងមូលព័ទ្ធដោយខ្សែវ័ណ្ឌពណ៌ខៀវមួយជាន់ បង្ហាញ​ពីការគ្រប់គ្រងដែនដីរបស់រដ្ឋបាលក្រុង មានសិលាចារឹកឈ្មោះសុវណ្ណភូមិ តម្កល់លើទម្រពណ៌ប្រផេះ។​

ឯកឧត្តម វ៉ី សំណាង អភិបាលខេត្តកំពង់ស្ពឺ នៅថ្ងៃទី២៣ ខែសីហា បានប្រាប់​ឱ្យដឹងថា ​កា​របង្កើត និងដាក់ឱ្យប្រើប្រាស់និមិត្តសញ្ញាក្រុង និងស្រុកទាំង៩ នៃខេត្តកំពង់ស្ពឺ គឺជារឿងចាំបាច់ និងផ្តល់ផ​លចំណេញច្រើនសម្រាប់ប្រជាពលរដ្ឋទូទៅ ពិសេសជួយទាកទាញ់ការវិនយោគ លើកកម្ពស់សេដ្ឋកិច្ច និ​ងវិស័យទេសចរណ៍របស់ខេត្តថែមទៀត។

លោក​បានអះអាងថា ៖ «មុនសម្រេច និងដាក់ឱ្យប្រើប្រាស់និមិត្តសញ្ញារបស់ក្រុងស្រុកនីមួយៗ គឺយើងបា​នសរសេររៀបរាប់យ៉ាងលម្អិតពីព័ត៌មានប្រជាជន ផ្ទៃដី តំបន់ភូមិសាស្រ្ត សក្តានុពលនានារបស់ក្រុង ស្រុកនីមួយៗរួចរាល់អស់ហើយ។ អីចឹង! វានឹងបង្កភាពងាយស្រួយដល់ប្រជាពលរដ្ឋ ក៏ដូចជាបណ្តារអ្នកវិនិយោ​គទាំងឡាយងាយស្រួលបោះទុន និងសិក្សាស្វែងយល់ផងដែរ»។

បើតាម​សេចក្តីប្រកាសរបស់ក្រសួងមហាផ្ទៃ ក៏បាន​ណែនាំ​ឱ្យរដ្ឋបាលក្រុង និងស្រុកទាំង៩នេះ​ ត្រូវប្រើប្រា​ស់ជាផ្លូវការនូវនិមិត្តសញ្ញាទាំងនោះ ដោយត្រូវដាក់នៅកន្លែងធ្វើការ​ងារ​នូវ​រដ្ឋបាលក្រុង និងស្រុកនីមួយៗ ត្រូ​វប្រើប្រាស់​លើលិខិត ស្រោមសំបុត្រ និងឯកសារផ្លូវការពាក់ព័ន្ធរបស់រដ្ឋបាលក្រុង/ស្រុក និងសម្រាប់ប្រើប្រា​ស់ក្នុងពិធីនានាដែលសមស្រប និងប្រើប្រាស់ក្នុងកិច្ចការជាផ្លូវការផ្សេងៗ តាមការចាំបាច់៕

ដោយ៖បូរ ពេជ្រហ្សាលីន