ភ្នំពេញ៖ ​គណៈរដ្ឋមន្រ្តីថ្មី ដែលមានឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី នៃព្រះរាជា​ណាចក្រ​កម្ពុជា បានស្បថចូលកាន់តំណែងជាផ្លូវការហើយកាលពីរសៀលថ្ងៃទី២២ ខែសីហា ឆ្នាំ២០២៣ ក្រោមព្រះរាជអធិបតីភាព​ដ៏ខ្ពង់ខ្ពស់បំផុតរបស់ព្រះមហាក្សត្រ។

ឯកឧត្តម ហួត ហាក់ ជាសមាសភាពរដ្ឋមន្រ្តីថ្មីមួយរូប ក្នុងចំណោមសមាភាពរដ្ឋមន្រ្តីថ្មីៗជាច្រើនរូបទៀត នៃគណៈរដ្ឋមន្ត្រីរបស់រាជរដ្ឋា​ភិបាល​អាណត្តិថ្មី ដែលកាន់តំណែងជារដ្ឋមន្រ្តីក្រសួងអធិការកិច្ច។

យោងតាមឯកសារសង្ខេបបង្ហាញថា គិតនៅត្រឹមឆ្នាំ២០២៣ លោក ហួត ហាក់ មានវ័យ៥០ឆ្នាំ។ ឯកឧត្តមបានកើតនៅភូមិត្រពាំងគង ឃុំត្រពាំងគង ស្រុកសំរោងទង ខេត្តកំពង់ស្ពឺ ដែលមានលោកឪពុកឈ្មោះ ហួត ឈុន អ្នកម្តាយឈ្មោះ យឹម ហុង និងមានភរិយាឈ្មោះ សុង ធីតា ព្រមទាំងមានកូនប្រុសស្រី ចំនួនបីនាក់។

ប្រវត្តិសិក្សា៖
លើការសិក្សាអប់រំ ឯកឧត្តម ទទួលបានការអប់រំបណ្តុះបណ្តាលទាំងក្នុង និងក្រៅប្រទេស។ ឯកឧត្តមបានបញ្ចប់ការសិក្សាថ្នាក់បរិញ្ញាបត្រ​នីតិសាស្រ្តនៅមហាវិទ្យាល័យនីតិសាស្ត្រ និងវិទ្យាសាសស្រ្តសេដ្ឋកិច្ច និងសញ្ញាបត្រជាមន្ត្រីជាន់ខ្ពស់ផ្នែកការទូត នៅសាលាភូមិន្ទរដ្ឋបាល (ERA) នៅឆ្នាំ២០០១។ ឯកឧត្តម ក៏បានបន្តបញ្ចប់សញ្ញាបត្រថ្នាក់បរិញ្ញាបត្រជាន់ខ្ពស់វិទ្យាសាស្ត្រនយោបាយ នៅឆ្នាំ២០០៥ និងថ្នាក់​បណ្ឌិតគ្រប់គ្រងធុរកិច្ច ពីសកលវិទ្យាល័យ Preston (Preston University) នៅឆ្នាំ២០០៨។

ដោយស្រឡាញ់​ការសិក្សា និងការតស៊ូព្យាយាមឯកឧត្តម ហួត ហាក់ ក៏បានទៅបន្តការសិក្សានៅតាមបណ្តាប្រទេសមួយចំនួនដូចជា ចក្រភព​អង់គ្លេស ប្រទេសសឹង្ហបុរី សាធារណៈរដ្ឋប្រជាមានិតចិន ជាពិសេស ឯកឧត្តម ក៏មានឱកាសទទួលបានអាហារូបករណ៍ ទៅសិក្សា​នៅ​ប្រទេសបារំាង និងទទួលបានសញ្ញាបត្រជាន់ខ្ពស់ផ្នែកគ្រប់គ្រងសាធារណៈ ពីសាលាជាតិរដ្ឋបាលបារាំង (ENA) ដែលជាសាលា​ដ៏ល្បី​ល្បាញ​មួយរបស់អឺរ៉ុប ក្នុងការបណ្តុះបណ្តាលអ្នកនយោបាយ អ្នករដ្ឋបាល អ្នកសេដ្ឋកិច្ច និងអ្នកការទូតជាន់ខ្ពស់។ ចំពោះភាសាបរទេស​ ឯកឧត្តមអាចប្រើប្រាស់ភាសាបារាំង និងអង់គ្លេសបានយ៉ាងស្ទាត់ជំនាញ។

ប្រវត្តិការងារ៖
ទោះធ្លាប់មានបទពិសោធន៍លើការងារជំនាញផ្សេងៗ ជាច្រើនដូចជា សាស្រ្តាចារ្យច្បាប់ និពន្ធនាយកសារព័ត៌មាន អ្នករដ្ឋបាល អ្នកច្បាប់ មុខជំនាញការទូត ឯកឧត្តម ហួត ហាក់ មិនមែនជាឥស្សរជនថ្មីនោះទេ នៅក្នុងវិស័យអធិការកិច្ចនេះ ឯកឧត្តមបានប្រឡូកក្នុងការងារ​នេះ​ប្រមាណ៣០ឆ្នាំមកហើយ ដោយធ្លាប់ចូលបម្រើការតាំងពីជាមន្រ្តីធម្មតា ជាប្រធានការិយាល័យ ជាប្រធាននាយកដ្ឋានរដ្ឋបាល និងបុគ្គលិក។ ពីឆ្នាំ២០០១ ដល់ឆ្នាំ២០០៨ ជាអនុរដ្ឋលេខាធិការរយៈពេល១០ឆ្នាំ ពីឆ្នាំ២០០៨ ដល់ឆ្នាំ២០១៨ និងជារដ្ឋលេខាធិការទទួលបន្ទុក​ការងារ​ទទួលពាក្យបណ្តឹង និងអង្កេតស្រាវជ្រាវ ពីឆ្នាំ២០១៨ ដល់ឆ្នាំ២០២៣ នៅក្រសួងនេះផងដែរ។

នៅក្នុងអាណត្តិថ្មីនេះ រាជរដ្ឋាភិបាលបានដាក់ចេញឱ្យអនុវត្តនូវកម្មវិធីនយោបាយនានា និងយុទ្ធសាស្រ្តបញ្ចកោណដំណាក់កាលទី១ ដែលបន្តផ្តោតការយកចិត្តទុកដាក់ជាសំខាន់ ទៅលើការកែទម្រង់កាន់តែស៊ីជម្រៅ និងកាន់តែទូលំទូលាយជាងមុន ក្នុងន័យចូលរួមថែរក្សា​សមិទ្ធផលចាស់ ដែលអ្នកដឹកនាំរៀមច្បងជំនាន់មុនបានកសាង ហើយអ្នកបន្តវេនជំនាន់ថ្មីនេះក៏រួមគ្នាប្តេជ្ញាបង្កើតសមិទ្ធផលថ្មីបន្ថែម​ទៀត។

ក្នុងនាមជារដ្ឋមន្រ្តីកាន់តំណែងថ្មី ឯកឧត្តម ហួត ហាក់ បានប្តេជ្ញាយ៉ាងមុតមាំ ចងចាំជានិច្ចនូវអភិក្រមការងារទាំង៥យ៉ាង របស់សម្តេចអគ្គ​មហាសេនាបតីតេជោ ហ៊ុន សែន មហាវីរៈបុរសជាតិខ្មែរ ដែលបានដឹកនាំប្រទេសអស់រយៈកាលជាង៤០ឆ្នាំនោះគឺ “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់”។

លើសពីនោះឯកឧត្តមរដ្ឋមន្រ្តីអធិការកិច្ចថ្មី ក៏បានរៀបចំនូវការដ្ឋានកំណែទម្រង់ជាអាទិភាពមួយចំនួន សំដៅអនុវត្តឱ្យបានជោគជ័យនូវ​បេសកកម្ម​ចម្បងរបស់ក្រសួង ដែលរាជរដ្ឋាភិបាលអាណត្តិទី៧ ប្រគល់ជូនដើម្បីធានាបាននូវវប្បធម៌សុចរិតភាព តម្លាភាព គណនេយ្យភាព មនសិកាវិជ្ជាជីវៈ និងការពង្រឹងវិន័យការងារ ក៏ដូចជាការតាំងចិត្តយ៉ាងមុតមាំ ក្នុងការចូលរួមអនុវត្តឱ្យបានជោគជ័យ កម្មវិធីនយោបាយនានា របស់រាជរដ្ឋាភិបាលអាណត្តិទី៧ និងផែនការយុទ្ធសាស្រ្តបញ្ចកោណដំណាក់កាលទី១ នៃអាណត្តិទី៧នេះ។

តាមរយៈចំណេះដឹងដ៏សម្បូរបែប បទពិសោធន៍ការងារប្រមាណជា៣០ឆ្នាំ រួមជាមួយការតាំងចិត្តដ៏ម៉ឺងម៉ាត់ឥតងាករេ ឯកឧត្តម ហួត ហាក់ ពិតជានឹងបន្តរួមចំណែកយ៉ាងសំខាន់ដល់ការអនុវត្តគោលនយោបាយរបស់រាជរាដ្ឋាភិបាល ក្រោមការដឹកនាំដ៏ខ្ពង់ខ្ពស់របស់ឯកឧត្តម​កិត្តិទេសាភិបាលបណ្ឌិត ហ៊ុន ម៉ាណែត ជាពិសេសក្នុងវិស័យអធិការកិច្ចនេះ តាមរយៈការពង្រឹងសកម្មភាពនានា ដែលរួមមានជាអាទិ៍​ការងារ​តាមដានត្រួតពិនិត្យ ការធ្វើអធិការកិច្ចលើគ្រប់វិស័យ ការទទួល និងដោះស្រាយពាក្យបណ្តឹង ការការពារទ្រព្យសម្បត្តិរដ្ឋ និងទ្រព្យសម្បត្តិ​ស្របច្បាប់របស់ប្រជាពលរដ្ឋ ការប្រឆាំងនឹងអំពើពុករលួយ ការរំលោភដោយអំណាច និងបាតុភាពអសកម្មនានា ការលើកម្ពស់អភិបាល​កិច្ចល្អ និងការពង្រឹងប្រសិទ្ធភាព នៃការអនុវត្តច្បាប់ និងលិខិតបទដ្ឋានគតិយុត្តផ្សេងៗ អាចជាការចំណែកយ៉ាងសំខាន់ជួយដល់រាជរដ្ឋា​ភិបាល ក្នុងការអភិវឌ្ឍប្រទេសប្រកបដោយចិរភាព ធ្វើឱ្យរដ្ឋបាលសាធារណៈកាន់តែស្អាតស្អំ មានគុណភាព ដែលជាការឆ្លើយតបនឹង​បំណង​ប្រាថ្នារបស់ប្រជាពលរដ្ឋទូទៅ៕
ដោយ៖សារ៉ាត