រុស្ស៊ីបញ្ជាក់ការស្លាប់របស់មេក្រុមទាហានស៊ីឈ្នួលវ៉ាក់ណែ ក្រោយចេញលទ្ធផលតេស្តហ្សែនអ្នកស្លាប់ដោយសារធ្លាក់យន្តហោះ
មូស្គូ៖ អាជ្ញាធររុស្ស៊ីបានបញ្ជាក់ពីការស្លាប់របស់មេក្រុមទាហានស៊ីឈ្នួលវ៉ាក់ណែ លោក យីវជីនី ប្រ៊ីហ្គោហ្ស៊ីន ក្នុងឧបទ្ទវហេតុធ្លាក់យន្តហោះកាលពីថ្ងៃពុធសប្ដាហ៍មុន ក្រោយពេលធ្វើតេស្តហ្សែនសាកសពជនរងគ្រោះក្នុងហេតុការណ៍នោះ។ នេះបើតាមការរាយការណ៍របស់បណ្ដាញព័ត៌មាន Al Jazeera។
អ្នកនាំពាក្យគណៈកម្មាធិការស៊ើបអង្កេតរុស្ស៊ីលោកស្រី Svetlana Petrenko បាននិយាយក្នុងសេចក្តីថ្លែងការណ៍កាលពីថ្ងៃអាទិត្យថា ការធ្វើតេស្តហ្សែនលើសាកសពទាំង ១០ ដែលបានរកឃើញពីកន្លែងយន្តហោះធ្លាក់ បានស៊ីគ្នាទៅនឹងបញ្ជីមនុស្ស ដែលជិះលើយន្តហោះនោះ។
អាជ្ញាធរអាកាសចរណ៍ស៊ីវិលរុស្ស៊ីបាននិយាយថា លោក ប្រ៊ីហ្គោហ្ស៊ីន និងអនុសេនីយឯកកំពូលមួយចំនួនរបស់លោក ស្ថិតក្នុងបញ្ជីមនុស្សទាំង១០នាក់ រួមមានអ្នកដំណើរប្រាំពីរនាក់ និងសេវិកយន្តហោះបីនាក់ទៀត។
ទោះយ៉ាងណាក៏ដោយ គណៈកម្មាធិការស៊ើបអង្កេតរុស្ស៊ី មិនបានបង្ហាញពីមូលហេតុ ដែលបណ្តាលឱ្យយន្តហោះឯកជនរបស់លោក ប្រ៊ីហ្គោហ្ស៊ីន ធ្លាក់នោះទេ ខណៈមានការចោទប្រកាន់ថា លោកប្រធានាធិបតី វ្ល៉ាឌីមៀរ ពូទីន ជាអ្នកបញ្ជាឱ្យមានការសម្លាប់លោក ប្រ៊ីហ្គោហ្ស៊ីន ចំពោះការដឹកនាំទាហានវ៉ាក់ណែធ្វើការបះបោរប្រឆាំងនឹងយោធារុស្ស៊ី កាលពីពីរខែមុន។ ការចោទប្រកាន់យ៉ាងដូច្នេះ ត្រូវបានវិមានក្រឹមឡាំងច្រានចោល។
គួររំឭកថា កាលពីខែមិថុនា លោក ប្រ៊ីហ្គោហ្ស៊ីន អាយុ ៦២ ឆ្នាំ បានដឹកនាំការបះបោរដ៏ខ្លី ប្រឆាំងនឹងយោធារុស្ស៊ី ដោយនាំទាហានស៊ីឈ្នួលរបស់លោកឱ្យដង្ហែរក្បួនពីអ៊ុយក្រែនឆ្ពោះទៅកាន់ទីក្រុងម៉ូស្គូ។ លោក ពូទីន បានចាត់ទុកទង្វើនេះថាជា «អំពើក្បត់ជាតិ» ហើយបានប្តេជ្ញាដាក់ទណ្ឌកម្ម ចំពោះអ្នកដែលពាក់ព័ន្ធ។
យ៉ាងណាមិញ វិមានក្រឹមឡាំងបានកាត់បន្ថយភាពតានតឹង ដោយសម្រេចបានកិច្ចព្រមព្រៀងភ្លាមៗមួយ ជាមួយ លោក ប្រ៊ីហ្គោហ្ស៊ីន ដោយសន្យាអនុញ្ញាតឱ្យលោកមានសេរីភាពដើរហើរ ទទួលបានការលើកលែងទោស និងការការពារសុវត្ថិភាព រួមទាំងការនិរទេសខ្លួនទៅប្រទេសបេឡារូស៕
ប្រភព៖ Wagner boss Yevgeny Prigozhin confirmed dead in crash
