បារាំងនិងអាមេរិកស្រុះស្រួលគ្នាបន្តបេសកកម្មរក្សាសន្តិភាពនៅប្រទេសលីបង់
អ.ស.ប៖ នាថ្ងៃទី ៣១ ខែសីហាកន្លងទៅនេះ ក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតដើម្បីបន្តបេសកកម្មរក្សាសន្តិភាពយូរអង្វែងនៅក្នុងប្រទេសលីបង់សម្រាប់រយៈពេលមួយឆ្នាំទៀត។ ការសម្រេចនេះធ្វើឡើង ក្រោយប្រទេសបារាំង និងអាមេរិកបានស្រុះស្រួលគ្នាដោយឈរលើគោលការណ៍រក្សាសេរីភាពនៃការធ្វើសកម្មភាពររបស់កងទ័ពអង្គការសហប្រជាជាតិ។
ដោយឡែក កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់នេះ (UNIFIL) បានបង្កើតឡើងក្នុងឆ្នាំ១៩៧៨ សម្រាប់ការល្បាតព្រំដែនភាគខាងត្បូងនៃប្រទេសលីបង់ជាមួយអ៊ីស្រាអែល។ យ៉ាងណាមិញ កិច្ចព្រមព្រៀងនៃកិច្ចសហប្រតិបត្តិការនេះត្រូវបានបន្តជារៀងរាល់ឆ្នាំ ហើយដែលថ្ងៃព្រហស្បិ៍កន្លងទៅនេះ គឺជាថ្ងៃផុតកំណុត។
មុនពេលឈានដល់ព្រមព្រៀងបន្តបេសកកម្មនេះបារាំងបានបោះឆ្នោតលើសេចក្ដីព្រាងច្បាប់មួយដោយមានសំឡេងគាំទ្រចំនួន១៣ និងការបោះអនុប្បវាទ ដោយរុស្ស៊ី និងចិន។ ការបោះឆ្នោតផ្លូវការដែលគ្រោងទុកនៅថ្ងៃពុធក៏ត្រូវបានពន្យារពេលខណៈប្រទេសបារាំង សហរដ្ឋអាមេរិក និងអេមីរ៉ាតអារ៉ាប់រួមមានការខ្វែងគំនិតគ្នាបន្តិចបន្តួច។
ដោយឡែក នៅក្នុងការសម្របសម្រួលជាមួយសហរដ្ឋអាមេរិក និង អេមីរ៉ាតអារ៉ាប់រួមបារាំង បាន បញ្ចូលនូវខ្លឹមសារនៅក្នុងសេចក្តីសម្រេចរបស់ក្រុមប្រឹក្សាកាលពីឆ្នាំមុនឡើងវិញ និងបានទាមទារ ឱ្យ ភាគីទាំងអស់មានការគាំទ្រចំពោះការបន្តរក្សាសន្តិសុខនេះ។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បានប្រាប់ក្រុមប្រឹក្សាថា៖ «លទ្ធភាពរបស់កងទ័ព UNIFIL ក្នុងការអនុវត្តការទទួលខុសត្រូវរបស់ពួកគេ ដោយមិនមានការរឹតបន្តឹងណាមួយ គឺជារឿងចាំបាច់បំផុត»។
លោកស្រីបានបន្តថា៖ «យើងមានកង្វល់ជាយូរមកហើយទាក់ទងនឹងសកម្មភាពរបស់តួអង្គមួយចំនួនក្នុងការរារាំងសេរីភាពនៃការបំពេញបេសកកម្ម ហើយដំណោះស្រាយដែលបានអនុម័តនៅថ្ងៃនេះជាការបញ្ជាក់ពីជំហរយ៉ាងរឹងមាំឡើងវិញនូវសេរីភាពក្នុងការធ្វើសកម្មភាពរបស់ក្រុមកងទ័ពUNIFIL» ។
គួរបញ្ជាក់ថា ការបន្តរក្សាសន្តិភាពរបស់អង្គការសហប្រជាជាតិទៅលើប្រទេសលីបង់នេះកើតឡើងចំពេលមានសង្គ្រាមពាក្យសម្តីកាន់តែខ្លាំងឡើងរវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់នៅក្នុងប្រទេសលីបង់ ដោយភាគីនីមួយៗសុទ្ធតែបាន ត្រៀមខ្លួនសម្រាប់ការវាយប្រហារណាមួយ។
កាលពីខែធ្នូកន្លងទៅផងដែរ កងរក្សាសន្តិសុខជនជាតិអៀរឡង់ម្នាក់ត្រូវបានសម្លាប់ ក្នុងហេតុការណ៍ឆេះរថយន្ត នៅភាគខាងត្បូងប្រទេសលីបង់។ តុលាការយោធាលីបង់បានចោទសមាជិកក្រុមហេសបូឡាថាមានជាប់ពាក់ព័ន្ធនឹងករណីនេះ ប៉ុន្តែក្រុមហេសបូឡាបានបដិសេធ៕
ដោយ៖ កែវ បុស្បាhttps://www.reuters.com/world/france-us-compromise-renew-un-peacekeeping-mission-lebanon-2023-08-31/
