ហ្សេលេនស្គី អះអាងពីការរុលឆ្ពោះទៅមុខរបស់កងទ័ពវាយបកអ៊ុយក្រែនក្នុងសមរភូមិ ដោយច្រានចោលការរិះគន់
កៀវ៖ប្រធានាធិបតីអ៊ុយក្រែនលោក វ្ល៉ូឌីមៀរ ហ្សេលេនស្គី កាលពីថ្ងៃសៅរ៍បានថ្លែងថា កងទ័ពអ៊ុយក្រែនកំពុងរុលឆ្ពោះទៅមុខ ក្នុងប្រតិបត្តិការវាយបកកងទ័ពឈ្លានពានរុស្ស៊ីនៅសមរភូមិ ដោយច្រានចោលការអះអាងរបស់មន្ត្រីលោកខាងលិចដែលថា ប្រតិបត្តិការទ័ពរបស់អ៊ុយក្រែនដើរគើមៗ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
លោក ហ្សេលេនស្គី បានសរសេរនៅលើបណ្ដាញសារតេឡេក្រាមថា ៖ «កងកម្លាំងអ៊ុយក្រែនកំពុងរុលឆ្ពោះទៅមុខ។ ទោះបីជាមានរឿងអ្វីកើតឡើង និងមិនថានរណាម្នាក់និយាយអ្វីក៏ដោយ យើងកំពុងឈានទៅមុខ ហើយនោះជារឿងសំខាន់បំផុត»។
គួរបញ្ជាក់ដែរថា តាមរយៈប្រតិបត្តិការវាយបក ដែលឈានជិតដល់បីខែទៅហើយនោះ អ៊ុយក្រែនបានដណ្តើមយកបានភូមិរាប់សិបមកវិញពីកងទ័ពរុស្ស៊ី ។ប៉ុន្តែមិនដណ្ដើមបានកន្លែងសំខាន់ៗនោះទេ ដោយសារតែទាហានអ៊ុយក្រែនត្រូវប្រឈមមុខនឹងវាលមីន និងកងការពារនៅសមរភូមិជួរមុខដ៏ធំរបស់រុស្ស៊ី។
ថ្មីៗនេះ មន្ត្រីអាមេរិកមិនបញ្ចេញឈ្មោះ បានសម្ដែងការខកចិត្តចំពោះដំណើរការយឺតយ៉ាវនៃប្រតិបត្តិការវាយបករបស់អ៊ុយក្រែន រួមទាំងកំហុសយុទ្ធសាស្ត្ររបស់អ៊ុយក្រែន។ នេះបើតាមសេចក្ដីរាយការណ៍លោកខាងលិចផ្សេងៗ ដែលបង្កឱ្យមានការខឹងសម្បារពីអ៊ុយក្រែន។
បច្ចុប្បន្នមានការភ័យខ្លាចដែលថា ការគាំទ្ររបស់បស្ចិមប្រទេសអាចចាប់ផ្តើមធ្លាក់ចុះ ដោយសារបញ្ហាអាកាសធាតុចុះត្រជាក់ ដែលធ្វើឱ្យដំណើរការលើសមរភូមិប្រព្រឹត្តទៅយឺតយ៉ាវនារដូវរងាខាងមុខនេះ។ លោកខាងលិចបានចំណាយប្រាក់រាប់ពាន់លានដុល្លារ ដើម្បីជួយដល់ការវាយបក ប៉ុន្តែក្រុងកៀវបាននិយាយថា ខ្លួនត្រូវការជំនួយបន្ថែមទៀត។
ទោះបីជាយ៉ាងណាក៏ដោយ ខណៈរុស្ស៊ីនិយាយថា ប្រតិបត្តិការវាយបករបស់អ៊ុយក្រែនបានបរាជ័យ សន្ទុះនៅសមរភូមិអ៊ុយក្រែនបានកើនឡើងជាអន្លើរនៅសមរភូមិនៃតំបន់ហ្សាប៉ូរីចា ជាកន្លែងដែលអនុរដ្ឋមន្ត្រីការពារជាតិអ៊ុយក្រែន លោកស្រី Hanna Maliar បានអះអាងកាលពីថ្ងៃសុក្រថា កងទ័ពអ៊ុយក្រែនបានទម្លុះខ្សែការពារដំបូងរបស់រុស្ស៊ី៕
ប្រែសម្រួល៖ហួន ឌីណា
