បាងកក៖ គណៈរដ្ឋមន្ត្រីថ្មីរបស់ប្រទេសថៃ ដែលដឹកនាំដោយលោកនាយករដ្ឋមន្ត្រី Srettha Thavisin កាលពីថ្ងៃអង្គារ សប្តាហ៍នេះ បានថតរូបជុំគ្នា នៅមុខវិមានរដ្ឋាភិបាល។

លោក Srettha Thavisin និងសមាជិកគណៈរដ្ឋមន្ត្រីរបស់លោកចំនួន៣៣រូបផ្សេងទៀត បានប្រមូលផ្តុំគ្នាថតរូបជាក្រុម បន្ទាប់ពីស្បថចូលកាន់តំណែង ហើយប្តេជ្ញាថា នឹងធ្វើការដោយមិនឈប់ឈរ និងបម្រើក្នុងនាមជារដ្ឋាភិបាល របស់ប្រជាជន។

លោក នាយករដ្ឋមន្ត្រី Srettha Thavisin បានទៅដល់អគារ ថៃគុនហ្វាត Thai-Khu-Fah ក្នុងរថយន្ត Lexus LM 350h ដែលរថយន្តប្រភេទនេះ មានលើកដំបូងគេ ក្នុងប្រទេសថៃ។

លោក Srettha Thavisin មកពីគណបក្ស ភឿថៃ ត្រូវបានសភាថៃតែងតាំងជានាយករដ្ឋមន្ត្រី នៅថ្ងៃទី ២២ ខែសីហា បន្ទាប់ពីការពន្យារពេលជាច្រើនសប្តាហ៍ ដោយសារតែការមិនចុះសម្រុងគ្នាលើការបង្កើតក្រុមចម្រុះ ដែលដឹកនាំដោយគណបក្សដែលទទួលបានអាសនៈច្រើនជាងគេ នៅក្នុងការបោះឆ្នោត កាលពីខែឧសភា គឺគណបក្ស ផ្លាស់ទីទៅមុខ (Move Forward) ៕ ប្រភពពី The Nation