សហភាពអឺរ៉ុប បើកការស៊ើបអង្កេតលើការឧបត្ថម្ភធនរបស់ចិន សម្រាប់ក្រុមហ៊ុនអ្នកផលិតរថយន្តអគ្គិសនី
អឺរ៉ុប៖ សហភាពអឺរ៉ុបបើកការស៊ើបអង្កេតលើការឧបត្ថម្ភធនរបស់ប្រទេសចិនសម្រាប់ក្រុមហ៊ុនអ្នកផលិតរថយន្តអគ្គិសនី ចំពេលមានការព្រួយបារម្ភថា ជំនួយបែបនេះរបស់ចិនកំពុងជះផលប៉ះពាល់ដល់ក្រុមហ៊ុនអឺរ៉ុប។ នេះបើតាមការចុះផ្សាយរបស់ទីភ្នាក់ងារសារព័ត៌មានផ្សេងៗ រួមមានរ៉យទ័រ។
ប្រធានគណៈកម្មការអឺរ៉ុបលោកស្រី អួរស៊ូឡា វ៉ុនឌែរ ឡេយែន បានប្រាប់សមាជិកសភាសហភាពអឺរ៉ុបកាលពីថ្ងៃពុធថា៖ «ឥឡូវនេះ ទីផ្សារពិភពលោករងការជោរជន់ដោយរថយន្តអគ្គិសនីរបស់ចិន ដែលមានតម្លៃថោក ហើយតម្លៃឡានទាំងនោះនៅតែថោក ដោយសារតែការឧបត្ថម្ភធនធំពីរដ្ឋ។ នេះគឺជាការបង្ខូចទីផ្សាររបស់យើង»។
លោកស្រី វ៉ុនឌែរ ឡេយែន ថ្លែងទៀតថា៖ «ដោយសារតែយើងមិនទទួលយកការបង្ខូចទីផ្សារទាំងពីខាងក្នុង និងពីខាងក្រៅ ខ្ញុំអាចប្រកាសនៅថ្ងៃនេះថា គណៈកម្មការនឹងចាប់ផ្តើមការស៊ើបអង្កេតប្រឆាំងនឹងការឧបត្ថម្ភធនលើរថយន្តអគ្គិសនីដែលមកពីប្រទេសចិន»។
ការស៊ើបអង្កេតនាពេលនេះរបស់សហភាពអឺរ៉ុប គឺជាករណីកម្រិតខ្ពស់បំផុតប្រឆាំងនឹងប្រទេសចិន រាប់ចាប់តាំងពីការស៊ើបអង្កេតរបស់ប្លុកលើបន្ទះស្រូបពន្លឺព្រះអាទិត្យចិន ដែលបញ្ចៀសសង្គ្រាមពាណិជ្ជកម្មកាលពីមួយទសវត្សរ៍មុន។
គណៈកម្មការនឹងមានពេលរហូតដល់ ១៣ ខែ ដើម្បីវាយតម្លៃថាតើត្រូវដាក់ពន្ធលើរថយន្តលើសពីស្តង់ដារ ១០ ភាគរយរបស់ សហភាពអឺរ៉ុប ឬយ៉ាងណា។
បើតាមរ៉យទ័រ ការស៊ើបអង្កេតលើការឧបត្ថម្ភធនរបស់ចិន នឹងគ្របដណ្តប់លើរថយន្តអគ្គិសនីពីចិន រួមមានទាំងម៉ាករថយន្តដែលមិនមែនជារបស់ចិន ប៉ុន្តែផលិតនៅទីនោះដូចជារថយន្ត Tesla រថយន្ត Renault និង BMW ជាដើម។
ជំហានរបស់សហភាពអឺរ៉ុបនាពេលនេះ ត្រូវបានគេមើលឃើញថា គឺជាជ័យជម្នះសម្រាប់ប្រទេសបារាំង ដែលបានសម្តែងការព្រួយបារម្ភថា ប្លុកនឹងមានភាពយឺតយ៉ាងក្នុងអំឡុងពេល «ការផ្លាស់ប្តូរបៃតង» ដែលសំដៅលើគោលនយោបាយប្រកបដោយនិរន្តរភាព ប្រសិនបើខ្លួនមិនក្អេងក្អាងពេលត្រូវប្រឈមមុខជាមួយចិនលើបញ្ហានេះ។
ទន្ទឹមនេះប្រទេសសមាជិកសហភាពអឺរ៉ុបមួយចំនួន រួមទាំងប្រទេសអាល្លឺម៉ង់ មានការប្រុងប្រយ័ត្នលើការប្រឆាំងនឹងចិន ដោយសារតែការពឹងផ្អែកលើទំនាក់ទំនងពាណិជ្ជកម្មជាមួយប្រទេសនេះ ទោះបីជាទីក្រុងប៊ែរឡាំង បានស្វាគមន៍ការស៊ើបអង្កេតកាលពីថ្ងៃពុធក៏ដោយ។
គួរបញ្ជាក់ថា មេដឹកនាំរបស់ចិន បានជួយធ្វើឱ្យប្រទេសខ្លួនក្លាយជាទីផ្សារដ៏ធំបំផុតសម្រាប់យានជំនិះអគ្គិសនី ដោយការវិនិយោគប្រាក់ឧបត្ថម្ភធនរាប់ប៊ីលានដុល្លារ ដើម្បីនាំមុខមុនគេក្នុងឧស្សាហកម្មដ៏ជោគជ័យមួយនេះ។ ការណ៍នេះ ធ្វើឱ្យក្រុមហ៊ុនផលិតរថយន្តសកល ប្រឈមមុខនឹងការប្រកួតប្រជែងកាន់តែខ្លាំងនៅក្នុងតំបន់របស់ខ្លួន ពីម៉ាកយីហោចិនដែលកំពុងដណ្តើមចំណែកទីផ្សារ៕
ប្រែសម្រួល៖ ហួន ឌីណា
ប្រភព៖ EU launches probes into Chinese subsidies for electric vehicles
