មូស្គូ៖ មេដឹកនាំកូរ៉េខាងជើង លោក គីម ជុងអ៊ុន ទស្សនាការតាំងពិព័រណ៍យោធា នៅទីក្រុង Vladivostok ប្រទេសរុស្ស៊ី ក្នុងពេលធ្វើទស្សនកិច្ចផ្លូវការ។

រូបភាពដែលបានចេញផ្សាយនៅលើបណ្តាញ Telegram ផ្លូវការ របស់អភិបាលរដ្ឋ Primorsky Krai របស់រុស្ស៊ី បានបង្ហាញពីសកម្មភាពមេដឹកនាំកូរ៉េខាងជើង លោក Kim Jong Un ទស្សនាការតាំងបង្ហាញសម្ភារៈយោធា នៅសាកលវិទ្យាល័យសហព័ន្ធរុស្ស៊ី Far Eastern Federal ក្នុងទីក្រុង Vladivostok ។

យោងតាមសេចក្តីថ្លែងការណ៍មួយដែលបានចេញផ្សាយជាមួយនឹងវីដេអូនោះ លោក Kim បានទទួលអំណោយ “គំរូជាច្រើន” នៃយន្តហោះគ្មានមនុស្សបើកយោធា និងអាវកាក់ការពារគ្រាប់កាំភ្លើងដែលផលិតនៅក្នុងតំបន់ ហើយត្រូវបានដាក់តាំងពិពណ៌ នៅទីនោះ។

គួរបញ្ជាក់ថា មេដឹកនាំកូរ៉េខាងជើង Kim Jong Un បានទៅបំពេញទស្សនកិច្ចនៅប្រទេសរុស្ស៊ី តាមការអញ្ជើញរបស់ប្រធានាធិបតីរុស្ស៊ី លោកវ្ល៉ាឌីមៀ ពូទីន។ លោក Kim ធ្លាប់បានទៅបំពេញទស្សនកិច្ចនៅប្រទេសរុស្ស៊ី កាលពីខែមេសា ឆ្នាំ ២០១៩៕ ប្រភពពី AFP ប្រែសម្រួល៖ សារ៉ាត