អគ្គមេបញ្ជាការនៃកងយោធពលខេមរភូមិន្ទ៖ ពាក្យថា «សន្តិភាព» បានក្លាយជាពាក្យពេញនិយមនៅលើសកលលោក
ភ្នំពេញ៖ អគ្គមេបញ្ជាការ នៃកងយោធពលខេមរភូមិន្ទ នាយឧត្ដមសេនីយ៍ វង្ស ពិសេន បានបញ្ជាក់ថា ពាក្យថា «សន្តិភាព» បានក្លាយជាពាក្យពេញនិយមនៅលើសកលលោក ព្រោះបើគ្មានសន្តិភាព កុំនិយាយឡើយពីការអភិវឌ្ឍ ប្រជាធិបតេយ្យ និងសិទ្ធិមនុស្ស។ បច្ចុប្បន្នប្រទេសមួយចំនួនកំពុងជួបប្រទះសង្រ្គាមនៅឡើយ ហើយផលលំបាកជាច្រើនបានកើតចេញពីសង្រ្គាមនេះ។ ការបញ្ជាក់នេះ ក្នុងពិធីប្រកាសតែងតាំងមុខតំណែង ឧត្តមសេនីយ៍ឯក ហួត ឈាង ជាមេបញ្ជាការរង និងជានាយសេនាធិការកងទ័ពជើងគោក កាលពីព្រឹកថ្ងៃទី១៨ ខែកញ្ញា ឆ្នាំ២០២៣ នៅបញ្ជាការដ្ឋានកងទ័ពជើងគោក។
![](https://asset.ams.com.kh/central/media/2023/09/photo_2023-09-18_17-54-03-1024x505.jpg)
នាយឧត្ដមសេនីយ៍ វង្ស ពិសេន បានបន្តថា សម្រាប់កម្ពុជាដែលធ្លាប់រងគ្រោះដោយសារសង្គ្រាមរាប់ទសវត្សរ៍ បានបញ្ចប់សង្គ្រាម និងអភិវឌ្ឍប្រទេសពីបាទដៃទទេ ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ដែលបានយកជីវិតធ្វើជាដើមទុន និងបានដាក់ចេញនូវនយោបាយឈ្នះ ឈ្នះ ធ្វើឲ្យកម្ពុជាទទួលបានសន្តិភាពពេញលេញទូទាំងផ្ទៃប្រទេស។ ដោយសារសន្តិភាពបានមកដោយការលំបាក សម្តេចតេជោ ហ៊ុន សែន បានដាក់ចេញនូវពាក្យ «អរគុណសន្តិភាព» ដើម្បីរំលេចពីសារៈសំខាន់សម្រាប់មនុស្សជាតិគ្រប់រូប។ ក្នុងន័យនេះ កងយោធពលខេមរភូមិន្ទ ប្តេជ្ញាការពារសន្តិភាព ការពារសមិទ្ធផលដែលជាស្នាដៃដ៏ឧត្តុង្គឧត្តមបំផុតជាប្រវត្តិសាស្ត្រ បន្សល់ទុកពីសម្ដេចតេជោ ហ៊ុន សែន មគ្គុទ្ទេសក៍ នៃសន្តិភាព។
![](https://asset.ams.com.kh/central/media/2023/09/photo_2023-09-18_17-54-02-1024x649.jpg)
នាយឧត្ដមសេនីយ៍ វង្ស ពិសេន បានបញ្ជាក់ថា កងយោធពលខេមរភូមិន្ទ សូមប្តេជ្ញាការពាររាជរដ្ឋាភិបាលស្របច្បាប់ដែលកើតចេញពីការបោះឆ្នោត ដឹកនាំដោយសម្តេចមហាបវរធិបតី ហ៊ុន ម៉ាណែត និងកម្ទេចរាល់អំពើក្បត់ជាតិ មនោគមន៍ជ្រុលនិយមដែលមានបំណងចង់ផ្តួលរំលំរាជរដ្ឋាភិបាល តាមរយៈការញុះញង់បង្កឱ្យមានចលាចលក្នុងសង្គម។
អគ្គមេបញ្ជាការ នៃកងយោធពលខេមរភូមិន្ទ ក៏បានផ្តាំផ្ញើដល់មេបញ្ជាការគ្រប់ថ្នាក់ និងបណ្តាប្រភេទទ័ពត្រូវយកចិត្តទុកដាក់ការគ្រប់គ្រងនិងប្រើប្រាស់អាវុធជាតិផ្ទុះឲ្យបានម៉ឺងម៉ាត់បំផុត ដើម្បីធានាដល់កិច្ចការពារសន្តិសុខជាតិ។ ជាមួយនេះ ត្រូវចូលរួមសហការជាមួយសមត្ថកិច្ច ដើម្បីទប់ស្កាត់ការចរាចរ ការប្រើប្រាស់គ្រឿងញៀនគ្រប់ប្រភេទដែលកំពុងមាននៅក្នុងប្រទេស៕
ដោយ៖ពលជ័យ