រដ្ឋមន្ត្រីក្រសួងមុខងារសាធារណៈ និងឯកអគ្គរដ្ឋទូតអូស្រ្តាលី សាទរចំពោះការរីកចម្រើន និងភាពរឹងមាំនៃទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា-អូស្ត្រាលី
ភ្នំពេញ៖ រដ្ឋមន្ត្រីក្រសួងមុខងារសាធារណៈ និងឯកអគ្គរដ្ឋទូតអូស្រ្តាលីប្រចាំនៅប្រទេសកម្ពុជា បានសាទរចំពោះការរីកចម្រើន និងភាពរឹងមាំនៃទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងអូស្ត្រាលី ខណៈដែលប្រទេសទាំងពីរបានបន្ត និងរក្សាទំនាក់ទំនងលើវិស័យចម្បងៗ នានា នៅគ្រប់កម្រិត។ ការសាទរនេះ បានធ្វើឡើងនៅក្នុងជំនួបពិភាក្សាការងាររវាងឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ជាមួយឯកឧត្តម Justin Kevin Whyatt ឯកអគ្គរដ្ឋទូតអូស្រ្តាលីប្រចាំនៅកម្ពុជា នៅថ្ងៃទី១៨ ខែកញ្ញា ឆ្នាំ២០២៣ នៅទីស្តីការក្រសួងមុខងារសាធារណៈ។
![](https://asset.ams.com.kh/central/media/2023/09/photo_2023-09-18_21-16-18-1024x817.jpg)
នៅក្នុងជំនួប រដ្ឋមន្ត្រីក្រសួងមុខងារសាធារណៈ និងឯកអគ្គរដ្ឋទូតអូស្រ្តាលី បានសាទរចំពោះការរីកចម្រើន និងភាពរឹងមាំនៃទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងអូស្ត្រាលី ខណៈដែលប្រទេសទាំងពីរបានបន្ត និងរក្សាទំនាក់ទំនងលើវិស័យចម្បងៗ នានា នៅគ្រប់កម្រិត។ ជាមួយគ្នានេះ ឯកអគ្គរដ្ឋទូត បានបង្ហាញការចាប់អារម្មណ៍ខ្ពស់ចំពោះបេសកកម្មរបស់ក្រសួងជាពិសេសលើការងារកំណែទម្រង់មុខងារសាធារណៈ។
![](https://asset.ams.com.kh/central/media/2023/09/photo_2023-09-18_21-16-22-1024x722.jpg)
ក្នុងជំនួបនេះដែរ ឯកឧត្តម ហ៊ុន ម៉ានី បានគូសបញ្ជាក់ពីសាវតារនៃកិច្ចការកែទម្រង់រដ្ឋបាលសាធារណៈ ដែលត្រូវបានចាប់ផ្តើមអនុវត្តជាផ្លូវការតាំងពីឆ្នាំ១៩៩៩ មកម្ល៉េះ តាមរយៈការបង្កើតឧត្តមក្រុមប្រឹក្សាកំណែទម្រង់រដ្ឋ។ បន្ទាប់មក កំណែទម្រង់រដ្ឋបាលសាធារណៈ ត្រូវបានបញ្ចូលជាស្នូលក្នុងយុទ្ធសាស្ត្រចតុកោណដំណាក់កាលទី១ ក្នុងឆ្នាំ២០០៤ ហើយបានបន្តក្លាយជាស្នូល និងគោលដៅយុទ្ធសាស្ត្រអាទិភាពក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ក្នុងន័យនេះ ក្រសួងមុខងារសាធារណៈ ក្នុងនាមជាសេនាធិការលើការងារកំណែទម្រង់មុខងារសាធារណៈ មានការប្តេជ្ញាចិត្ត និងខិតខំប្រឹងប្រែងក្នុងការអនុវត្ត និងការសម្រេចនូវចក្ខុវិស័យរបស់សម្តេចនាយករដ្ឋមន្ត្រី ជាពិសេសលើគោលនយោបាយអាទិភាព ការរៀបចំយន្តការថ្នាក់ជាតិសម្រាប់ការជ្រើសរើសមន្ត្រីរាជការស៊ីវិល ព្រមទាំងផ្តោតការយកចិត្តទុកដាក់លើការពង្រឹងសមត្ថភាពមន្ត្រី និងការគិតគូររៀបចំប្រព័ន្ធលើកទឹកចិត្តគាំទ្រផ្អែកលើសមិទ្ធកម្ម។
ក្រៅពីនោះ កិច្ចពិភាក្សា បានផ្តោតបន្ថែមលើការផ្លាស់ប្តូរបទពិសោធន៍ការងារ និងស្វែងយល់ពីឱកាសផ្សេងៗ ក្នុងទិសដៅឈានឆ្ពោះទៅរកការពង្រីក និងពង្រឹងទំនាក់ទំនងកិច្ចសហប្រតិបត្តិការរវាងស្ថាប័នពាក់ព័ន្ធនៃប្រទេសទាំងពីរឱ្យកាន់តែប្រសើរ៕
ដោយ៖ពលជ័យ
រូបភាព៖ ក្រសួងមុខងារសាធារណៈ
![](https://asset.ams.com.kh/central/media/2023/09/photo_2023-09-18_21-16-21-1024x641.jpg)