ឥណ្ឌូណេស៊ីដាក់គុកស្រ្តីម្នាក់ចំនួនពីរឆ្នាំ ដោយសារបង្ហោះវីដេអូ តិកតុក បង្ហាញពីការអធិដ្ឋានព្រះមុនពេលបរិភោគសាច់ជ្រូក
ហ្សាការតា៖តុលាការឥណ្ឌូណេស៊ីបានកាត់ទោសស្ត្រីម្នាក់ឱ្យជាប់ពន្ធនាគាររយៈពេលពីរឆ្នាំ និងពិន័យជាប្រាក់ បន្ទាប់ពីនាងបានអធិដ្ឋានព្រះក្នុងសាសនាអ៊ិស្លាម មុនពេលបរិភោគសាច់ជ្រូកនៅក្នុងវីដេអូដែលបង្ហោះលើបណ្ដាញសង្គម តិក តុក (TikTok) ហើយរងការរិះគន់យ៉ាងធ្ងន់ធ្ងរពីចំណោមមូស្លីមក្នុងប្រទេស។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
យោងទៅតាមសាលក្រម នាង Lina Mukherjee អាយុ ៣៣ ឆ្នាំ ត្រូវបានតុលាការរកឃើញថាជាប់ពិរុទ្ធពីបទ«ផ្សព្វផ្សាយព័ត៌មានដែលមានគោលបំណងញុះញង់ឱ្យមានការស្អប់ខ្ពើមប្រឆាំងនឹងបុគ្គលសាសនា និងក្រុមជាក់លាក់» កាលពីថ្ងៃអង្គារ នៅក្នុងទីក្រុង Palembang នៃខេត្តកោះស៊ូម៉ាត្រាខាងត្បូង។
ការកាត់ទោសនេះ ធ្វើឡើងបន្ទាប់ពីនាង Mukherjee ត្រូវបានគេរាយការណ៍ទៅប៉ូលិសកាលពីខែមីនា ចំពោះការបង្ហោះវីដេអូដែលទទួលបានការចូលមើលរាប់លានដង ដែលក្នុងនោះ នាងបាននិយាយពាក្យអធិដ្ឋានរបស់មូស្លីមថា «ក្នុងព្រះនាមនៃព្រះ» មុនពេលទទួលទានស្បែកជ្រូកបំពង ខណៈសាច់ជ្រូក ត្រូវបានហាមឃាត់នៅក្រោមសាសនអ៊ិស្លាម ដែលជាសាសនាដ៏ធំជាងគេនៅក្នុងប្រទេសឥណ្ឌូណេស៊ី។
នាង Mukherjee កំណត់ខ្លួនជាមូស្លីម ហើយសកម្មភាពរបស់នាង រងការថ្កោលទោសដោយក្រុមអភិរក្ស រួមទាំងស្ថាប័នបព្វជិតមូស្លីមកំពូលរបស់ប្រទេស ក្រុមប្រឹក្សា Ulema របស់ឥណ្ឌូនេស៊ី (IUC) ដែលបានចេញសេចក្តីសម្រេចហៅវីដេអូនេះ ថា ជាការប្រមាថសាសនា។
ក្រោមសាលក្រមថ្មីនេះផងដែរ នាង Mukherjee រងការពិន័យជាប្រាក់រហូតដល់ ២៥០ លានរូព្យ៉ាឥណ្ឌូណេស៊ី (១៦ ២០០ ដុល្លារអាមេរិក) ហើយបើមិនបង់ប្រាក់ពិន័យនេះទេ ទោសជាប់ពន្ធនាគាររបស់នាងនឹងត្រូវបន្ថែមរហូតដល់បីខែ។
គួរបញ្ជាក់ថា នេះគឺជាសំណុំរឿងប្រមាថសាសនាចុងក្រោយបំផុតនៅក្នុងប្រទេសឥណ្ឌូណេស៊ី។ កាលពីឆ្នាំមុន ប៉ូលិសឥណ្ឌូនេស៊ីបានចាប់ខ្លួនមនុស្សប្រាំមួយនាក់ ដោយចោទប្រកាន់ពីបទប្រមាថសាសនាជុំវិញការផ្ដល់គ្រឿងស្រវឹងដោយឥតគិតថ្លៃទៅឱ្យបុរសម្នាក់ឈ្មោះ Mohammed ហើយធ្វើការផ្សព្វផ្សាយលើបណ្ដាញសង្គម។
អស់រយៈពេលជាច្រើនឆ្នាំមកហើយ ក្រុមសិទ្ធិមនុស្សបានធ្វើយុទ្ធនាការប្រឆាំងនឹងច្បាប់ប្រមាថសាសនា ដែលខ្លួននិយាយថា ត្រូវបានប្រើដើម្បីកំណត់គោលដៅលើក្រុមកាន់សាសនាភាគតិច។
ក្នុងឆ្នាំ ២០១៧ អតីតអភិបាលក្រុងហ្សាកាតា លោក Basuki Tjahaja Purnama រងការកាត់ទោសឱ្យជាប់ពន្ធនាគារជិតពីរឆ្នាំ ពីបទប្រមាថសាសនាដ៏ចម្រូងចម្រាស។លោក Purnama ដែលជាគ្រិស្តសាសនិកម្នាក់ បានចាប់ដាក់គុកដោយសារការអត្ថាធិប្បាយមួយដែលលោកធ្វើឡើងនៅពេលធ្វើយុទ្ធនាការបោះឆ្នោត ហើយត្រូវបានគេមើលឃើញថាជាការប្រមាថសាសនាអ៊ិស្លាម៕
ប្រែសម្រួល៖ ហួន ឌីណា
ប្រភព៖ Indonesia woman jailed for TikTok video praying before eating pork https://www.thaipbsworld.com/indonesia-woman-jailed-for-tiktok-video-praying-before-eating-pork/
