(ភ្នំពេញ)៖ ការប្រកួតកីឡាវាយកូនគោលប្រសិទ្ធិនាមថាCity Golf & Honma Championship 2023ដែលរៀបចំដោយទីលានកីឡាវាយកូនគោលស៊ីតធីហ្គោល នាថ្ងៃទី២៣ ខែ កញ្ញា នៅទីលានកីឡាវាយកូនគោលស៊ីធីហ្គោល ស្ថិតនៅក្នុង សង្កាត់ទួលសង្កែ ខណ្ឌ ឬស្សីកែវ បានបញ្ចប់ដោយជោគជ័យជាមួយការគាំទ្រលើកសសើរពីសំណាក់កីឡាករកីឡាការិនីចូលរួមប្រកួត។

កីឡាករ មួន បញ្ញា ដែលប្រជែងដណ្តើមបានជ័យលាភីលេខ១គ្រងជើងឯក City Golf & Honma Championship 2023 បានលើកឡើងថា លោកពិតជាមានអារម្មណ៍រំភើបខ្លាំងណាស់ចំពោះការយកឈ្នះជ័យលាភីក្នុងការប្រកួតលើកនេះ ។

លោក សូមអរគុណចំពោះទីលានកីឡាវាយកូនគោលស៊ីធីហ្គោលខ្លាំងណាស់ ដែលបានរៀបចំការប្រកួតជាញឹកញាប់ក្នុងមួយឆ្នាំៗជាច្រើនលើក ដើម្បីផ្តល់ឱកាសដល់កីឡាករកីឡាការិនីមិនមែនអាជីពដូចជាពួកគាត់បានប្រកួតប្រជែងបញ្ចេញនូវសមត្ថភាព និងបានបង្កើតការជួបជុំសាមគ្គីភាពនិងមិត្តភាព។

លោក លីគា អ្នកចាត់ការទូទៅទីលានកីឡាវាយកូនគោលស៊ីធីហ្គោល មានប្រសាសន៍ថា ការប្រកួតកីឡាវាយកូនគោលពានរង្វាន់City Golf & Honma Championshipឆ្នាំ២០២៣ ដែលរៀបចំដោយទីលានកីឡាវាយកូនគោលស៊ីធីហ្គោល មានគោលបំណង ផ្តល់ឱកាសឲ្យកីឡាករជាតិនិងអន្តរជាតិដែលមិនមែនអាជីពបានប្រកួតប្រជែងគ្នាបញ្ចេញនូវសមត្ថភាព ពីសេស បង្កើតទំនាក់ទំនងមិត្តភាព និងសាមគ្គីភាព រវាងថ្នាក់ដឹកនាំជាមន្រ្តីរាជការក្នុងជួររដ្ឋភិបាល និងអ្នកវិនិយោគក្នុងស្រុកនិងក្រៅស្រុកផងដែរ។ អ្នកចាត់ការទូទៅរូបនេះ បានបញ្ជាក់ទៀតថា ការប្រកួតនេះ ក្រៅពីការបង្កើតឱកាសជួបជុំគ្នាសប្បាយរីករាយប្រកួតជាលក្ខណៈមិត្តភាពសាមគ្គីភាព ព្រឹត្តិការណ៍ប្រកួតមួយនេះ ក៏ជាការរួមចំណែកបំផុសផ្សព្វផ្សាយអំពីវិស័យកីឡាវាយកូនគោលនៅកម្ពុជាឲ្យកាន់តែផុសផុលដូចបណ្តាប្រទេសនានា នៅក្នុងតំបន់និងពិភពលោក។ជាមួយគ្នានេះ លោកក៏បានបញ្ជាក់បន្ថែមទៀតថា ក្នុងមួយឆ្នាំៗទីលានស៊ីធីហ្គោល បានបង្កើតការប្រកួតសម្រាប់កីឡាករកីឡាការិនីមិនមែនអាជីពឲ្យមានឱកាសបានចូលរួមប្រកួតប្រជែងយ៉ាងហោចណាស់ពី៣ទៅ៤ដងដែលជាផ្តល់ឱកាសសម្រាប់កីឡាករកីឡាការិនីថ្មីៗដែលទើបតែចូលហ្វឹកហាត់បានចូលរួមប្រកួតធ្វើតេសសមត្ថភាព។

ក្នុងនាម តំណាងឲ្យទីលានស៊ីធីហ្គោល លោក ប្តេជ្ញាចិត្ត បង្កើតព្រឹត្តិការណ៍ប្រកួតឲ្យបានច្រើនជាងនេះបន្ថែមទៀត ជាការបំផុសផ្សព្វផ្សាយលើកស្ទួយវិស័យកីឡាវាយកូនគោលនៅកម្ពុជា ដើម្បីរួមចំណែកទាក់ទាញភ្ញៀវទេសចរណ៍អន្តរជាតិមកកាន់កម្ពុជា។

ទន្ទឹមជាមួយគ្នានេះ អ្នកឧកញ៉ា ឈុន អូន ម្ចាស់ទីលាន កីឡាវាយកូនគោលស៊ីធីហ្គោល បានថ្លែងអំណរគុណដល់កីឡាករកីឡាការិនីជាតិ និងអន្តរជាតិ ពិសេស ក្រុមហ៊ុនHonma និងក្រុមដៃគូជាច្រើនទៀត ដែលបានចូលរួមឧបត្ថម្ភគាំទ្រ និងចូលរួមប្រកួតយ៉ាងច្រើនកុះករធ្វើឲ្យការប្រកួតបានប្រព្រឹត្តិទៅដោយភាពសប្បាយរីករាយប្រកបដោយមិត្តភាពសាមគ្គីភាព។ អ្នកឧកញ៉ា សង្ឈឹមជឿជាក់ថា តាមរយៈការរួមចំណែកពីទីលានកីឡាវាយកូនគោលស៊ីធីហ្គោល និងបានរួមចំណែកផលិតនូវធនធានកីឡាករកីឡាការិនីវាយកូនគោលនៅកម្ពុជាបានកាន់តែច្រើន។

សូមបញ្ជាក់ថា ការប្រកួតកីឡាវាយកូនគោលពានរង្វាន់ City Golf & Honma Championshipឆ្នាំ២០២៣ កីឡាករដែលប្រជែងដណ្តើមបានជ័យលាភីលេខ១ កីឡាករ មួន បញ្ញា វាយបានពិន្ទុ-16និងវាយ HOLE IN ONE នៅឡូលេខ៤ ដែលមានរង្វាន់ សាំង កម្ពុជាតេលា ចំនួន២០០០ លីត្រផងដែរ។ ជ័យលាភីលេខ២បានទៅលើកីឡាការិនី ប៊ុន ជាតិវាយបានពិន្ទុ-7ខណៈជ័យលាភីលេខ៣បានទៅលើកីឡាករ ឧក តុលា វាយបានពិន្ទុ-7៕

រូបភាព ងីម ឆៃហួត អត្ថបទៈជាវ ចន្ធូ