មនុស្សជិត ២០នាក់ ស្លាប់ក្នុងហេតុការណ៍ផ្ទុះឡានបំពាក់គ្រាប់បែកនៅភាគកណ្ដាលប្រទេសសូម៉ាលី
សូម៉ាលី៖ មន្ត្រីប៉ូលិសមូលដ្ឋានម្នាក់បាននិយាយកាលពីថ្ងៃសៅរ៍ថា មនុស្សយ៉ាងហោចណាស់ ១៨ នាក់បានស្លាប់ និងរាប់សិបអ្នកផ្សេងទៀតរងរបួស បន្ទាប់ពីរថយន្តដឹកទំនិញបំពាក់គ្រាប់បែកមួយគ្រឿងបានផ្ទុះនៅត្រង់ចំណុចកណ្ដាលនៃកន្លែងត្រួតពិនិត្យសន្តិសុខក្នុងទីក្រុង Beledweyne ក្នុងរដ្ឋ Hirshabelle នៃប្រទេសសូម៉ាលី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
រដ្ឋមន្ត្រីក្រសួងមហាផ្ទៃរដ្ឋ Hirshabelle លោក Abdirahman Dahir Gure បានប្រកាសពីចំនួនអ្នកស្លាប់ចុងក្រោយបង្អស់នេះកាលពីយប់ថ្ងៃសៅរ៍។
មុននោះ ប៉ូលិសក្រុង Beledweyne លោក Ahmed Aden បានប្រាប់រ៉យទ័រថា ចំនួនអ្នកស្លាប់មានត្រឹមតែ១០នាក់ប៉ុណ្ណោះ រួមទាំងទាហាន និងជនស៊ីវិល ហើយថាចំនួនអ្នកស្លាប់នឹងកើនឡើង»។ លោកបានបន្ថែមថា អគារ និងហាងលក់ទំនិញក្បែរកន្លែងកើតហេតុ ក៏ក្លាយជាគំនរបាក់បែក រួមជាមួយប៉ុស្តិ៍ត្រួតពិនិត្យដែលរងគ្រោះនោះផងដែរ។
ចំណែកឯអគ្គនាយកនៃក្រសួងមនុស្សធម៌ និងការគ្រប់គ្រងគ្រោះមហន្តរាយរដ្ឋ Hirshabelle លោក Abdifatah Mohamed Yusuf វិញ បាននិយាយប្រាប់ទីភ្នាក់ងារសារព័ត៌មាន AP ថា មនុស្សចំនួន ៤០ នាក់ផ្សេងទៀត បានរងរបួស។
លោកបាននិយាយថា ៖ «អ្នករបួសចំនួន ២០ នាក់ ត្រូវបានបញ្ជូនទៅមន្ទីរពេទ្យ Beledweyne ខណៈ ២០ នាក់ផ្សេងទៀត ស្ថិតក្នុងស្ថានភាពធ្ងន់ធ្ងរ ដែលត្រូវបញ្ជូនពួកគេតាមជើងយន្តហោះទៅកាន់រដ្ឋធានី Mogadishu ដើម្បីទទួលការព្យាបាលកម្រិតខ្ពស់»។
គិតត្រឹមថ្ងៃសៅរ៍ដដែល គេមិនទាន់ឃើញមានក្រុមណាមួយចេញមុខទទួលខុសត្រូវចំពោះការវាយប្រហារនេះនៅឡើយទេ។
យ៉ាងណាមិញ គួរបញ្ជាក់ថា រដ្ឋ Hirshabelle ដែលស្ថិតនៅតំបន់ភាគកណ្ដាលនៃប្រទេស គឺជាចំណុចកណ្តាលនៃការវាយលុកយោធាចុងក្រោយបង្អស់របស់រដ្ឋាភិបាលសូម៉ាលី ប្រឆាំងនឹងពួកជ្រុលនិយមមកពីក្រុម Al Shabaab ។
ក្រុម Al Shabaab បាន និងកំពុងប្រយុទ្ធជាមួយរដ្ឋាភិបាលភាញកណ្តាលរបស់ប្រទេសសូម៉ាលីអស់រយៈពេលជាង១ទស្សវត្សរ៍មកហើយ ក្នុងគោលបំណងបង្កើតស្វ័យគ្រប់គ្រងដោយផ្អែកលើការបកស្រាយយ៉ាងតឹងរឹងនៃច្បាប់អ៊ិស្លាមរបស់ខ្លួន៕
ប្រែសម្រួល៖ហួន ឌីណា
ប្រភព៖ Deadly truck explosion hits checkpoint in central Somali town https://www.aljazeera.com/news/2023/9/23/deadly-truck-explosion-hits-checkpoint-in-central-somali-town
